“Muntu Mwaabi Uyoolelekwa”

KUZWA kaindi zipaizyo zyali cibeela ciyandika kapati mubukombi bwakasimpe. Bana Israyeli bakali kupa zipaizyo zyabanyama, pele Banakristo lyoonse balizyibidwe kabotu akaambo kakupa “cipaizyo cantembauzyo.” Nokuba boobo kuli zipaizyo azimbi nzyakkomanina Leza. (Heb. 13:15, 16) Zipaizyo eezyi ziletela kukondwa alimwi azilongezyo, kweelana ambozitondezya zikozyanyo zitobela.

Hana, imubelesi uusyomeka wakaindi, wakali kuyandisisya kuba amwana pele tanaakali kuzyala. Mumupailo wakwe, wakakonka kuli Jehova kuti naa wazyala mwana musankwa, wakali ‘kuyoomupa kuli Jehova mazuba oonse aabuumi bwakwe.’ (1Sam. 1:10, 11) Nokwakainda ciindi, Hana wakamita, mpoonya wakazyala mwana musankwa iwakaulikwa zina lyakuti Samuele. Naakaleka kunyonka Samuele, Hana wakamutola kutente lyakukombela, kweelana ambwaakakonkede. Jehova wakamulongezya Hana akaambo kamuuya wakwe wakulyaaba. Wakaba acoolwe cakuba abana bambi bosanwe, mpoonya Samuele wakaba musinsimi alimwi amulembi wa Bbaibbele.—1Sam. 2:21.

Mbubwenya mbuli Hana a Samuele, Banakristo mazuba aano balijisi coolwe cakubelesya buumi bwabo mumulimo wakulyaaba ku Mulengi wabo. Jesu wakasyomezya kuti kufwumbwa kulyaaba kwesu nkotucita mukukomba Jehova kuyoolongezyegwa kapati.—Mk. 10:28-30.

Mumwaanda wamyaka wakusaanguna, mukaintu Munakristo wazina lya Dorika wakalizyibidwe kapati akaambo ‘kamilimo mibotu minji alimwi akupa zipego zyaluse’—kulyaaba nkwaakali kucita kugwasya bamwi. Pele cuusisya ncakuti, “wakaciswa akufwa,” calo icakaleta buumba kumbungano. Ciindi basikwiiya nobakamvwa kuti Petro nkwali mumunzi, bakamulomba kuti aboole cakufwambaana. Amuyeeye buyo mbobakakkomana ciindi Petro naakaboola akumubusya Dorika—bubuke bwakusaanguna bulembedwe ibwakacitwa amwaapostolo! (Mil. 9:36-41) Leza tanaakakuluba kulyaaba kwa Dorika. (Heb. 6:10) Bwaabi bwakwe bwakalembwa mu Jwi lya Leza kutegwa cibe cikozyanyo cibotu kulindiswe ncotweelede kwiiya.

Mwaapostolo Paulo awalo wakapa cikozyanyo cibotu kapati kwiinda mukwaaba ciindi cakwe akubabikkila maano bantu. Kalembela Banakristonyina mu Korinto, Paulo wakaamba kuti: “Mebo cilandibotela kapati kusowa zintu zyangu zyoonse akulitakata cakumaninina lwangu ndemwini akaambo kabuumi bwanu.” (2Kor. 12:15) Paulo wakazyiba kwiinda muzintu zyakamucitikila kuti ikulyaaba kutegwa tugwasye bamwi takuleteli buyo kukkutila pele alimwi—kwiinda zyoonse—kuletela zilongezyo alimwi akukkomaninwa a Jehova.—Mil. 20:24, 35.

Cakutadooneka, Jehova ulakkomana ciindi notubelesya ciindi cesu anguzu kutegwa tutole ambele ziyandika zya Bwami alimwi akugwasya basyomima. Pele sena kuli nzila azimbi motukonzya kugwasyilizya mulimo wakukambauka Bwami? Inzya! Kunze amilimo njotucita caluyando, tulakonzya kumulemeka Leza kwiinda mukusanga nkotucita cakuliyandila. Zyakusanga zilabelesyegwa kutola ambele mulimo wakukambauka munyika yoonse, ikubikkilizya akugwasya bamisyinali ababelesi baciindi coonse baalubazu bamwi. Kuyungizya waawo, kubamba alimwi akusandulula mabbuku amavidiyo, ikugwasyilizya mapenzi aacibukilambuta, alimwi akuyaka Maanda aa Bwami zyoonse eezyi zilalanganizyigwa azyakusanga nzyotusanga cakuliyandila. Tulakonzya kuba masimpe kuti “muntu mwaabi uyoolelekwa.” Kuyungizya waawo, iciindi notupa Jehova zintu ziyandisi, tulamulemeka.—Tus. 3:9; 22:9.

Nzila Bamwi Nzyobabelesya Kusanga Kumulimo Wanyika Yoonse

Mbubwenya mbuli mbocakabede mumazuba ngaakali kupona mwaapostolo Paulo, bantu banji mazuba aano balabikka “cimwi cintu ambali” naa mali kutegwa bakaabikke mukabbokesi kakusangila kumbungano kalembedwe kuti: “Mulimo Wanyika Yoonse.” (1Kor. 16:2) Mwezi amwezi mbungano zilatuma mali aaya kuofesi yamutabi ya Bakamboni ba Jehova iili mucisi eeco. Alimwi mulakonzya kusanga mali kwiinda mukwaatuma kumbunga iizumizyidwe amulawo iibelesyegwa a Bakamboni ba Jehova iili mucisi canu. Kutegwa muzyibe mbunga iizumizyidwe amulawo iibelesyegwa a Bakamboni ba Jehova iili mucisi canu, mwalombwa kuti mubandike abakuofesi yamutabi mucisi canu. Kkeyala yakuofesi yamutabi ilakonzya kujanwa a www.jw.org. Kweelana akubusena nkomukkala, izyakusanga nzyomukonzya kutuma cacigaminina kuofesi yamutabi yamucisi canu zilabikkilizya azitobela ansi aawa:

ZYAKUSANGA ZYACIGAMININA

Zyakusanga zitumwa kwiinda mukubelesya intaneti naa ma bank transfer, debit card, naa credit card. Mumitabi imwi, cilakonzyeka kutuma zyakusanga kwiinda mukubelesya webbusaiti ya jw.org naa kubelesya webbusaiti imwi iisalidwe.
Mali, ngale naa zintu zimbi ziindene-indene zilakonzya kusangwa. Mweelede kubikkilizya alugwalo ilutondezya kuti mali naa zintu eezyo nzyomwatuma mwasanga buya.

KUSANGA KWIINDA MUKUZUMINANA

Kusanga mali kwiinda mukuzuminana asikusanga kuti mali aayo ayakupiluka naa waayanda.
Mweelede kubikkilizya alugwalo ilutondezya kuti mali naa zintu eezyo nzyomwatuma mwasanga kwiinda mukuzuminana.

IKULIBAMBILA NZYOMUKONZYA KUSANGA

Kunze lyakusanga buyo mali azintu zimbi ziindene-indene, kuli nzila azimbi nzyomukonzya kubelesya ikugwasyilizya mulimo wa Bwami uucitwa nyika yoonse. Nzila eezyi zilaambidwe mumincali iitobela. Kufwumbwa nzila nzyomuyanda kubelesya, amusaangune kubandika aofesi yamutabi iili mucisi canu kutegwa mubone naa ninzila nzi zizumizyidwe mucisi canu. Mbwaanga iziyandika alimwi amilawo yamitelo iliindene-indene, cilayandika kapati ikubuzya basyaazibwene mumilawo yamitelo alimwi abaabo bagwasyilizya mumakani aamilawo kamutanasala nzila mbotu njomuyanda kubelesya kusanga.

Insyuwalansi: (Insurance) Imbunga iibelesyegwa a Bakamboni ba Jehova ilakonzya kulembwa kuti njiiyakubweza mali aabukwabilizi bwabuumi (life insurance policy) naa mali aalya aapegwa kumuntu iwasika aciimo cakuleka mulimo (retirement/pension plan).

Maakkaunti Aakubbanki: (Bank Accounts) Maakkaunti aakubbanki, mapepa aatondezya mali ngaakabikka muakkaunti naa maakkaunti aamali ngapegwa muntu iwasika aciimo cakuleka mulimo alakonzya kupegwa kumbunga iibelesyegwa a Bakamboni ba Jehova muntu afwa kweelana aziyandika kubbanki lyakubusena nkwakkede.

Mali Ngomujisi Mukkampani: (Stocks and bonds) Mali ngomujisi mukkampani alakonzya kusangwa kumbunga iibelesyegwa a Bakamboni ba Jehova kacili cipego buyo naa kacili cizuminano kuti njiiyakwaabweza mali muntu aakufwa.

Nyika Amayake: (Real Estate) Nyika amayake izikonzya kusambalwa zilakonzya kusangwa, ikuti naa muntu wasanga busena mpakkede inga wazumanana kukkala aawo ciindi nacipona.

Bwaapauzi Bwazintu: (Wills and Trusts) Zintu naa mali alakonzya kupegwa kumbunga iibelesyegwa a Bakamboni ba Jehova kwiinda mukubelesya pepa lyamalailile aabwaapauzi bwazintu lizumizyidwe amulawo naa kuti imbunga iibelesyegwa a Bakamboni ba Jehova ilakonzya kulembwa kuti njiyeelede kupegwa mali aajanika mubwaapauzi bwazintu. Bubambe oobu bulakonzya kugwasya sikusanga munzila iimwi mumakani aamutelo.

Kweelana ancaapandulula mabala aakuti “kulibambila nzyomukonzya kusanga,” nzila eezyi zyakusanga ziyanda kuti sikusanga alibambile kabotu. Ikutegwa bagwasyigwe bantu bayanda kugwasyilizya mumulimo wanyika yoonse wa Bakamboni ba Jehova kwiinda mububambe bwakusangila lubono, kwabambwa broshuwa mu Chingisi alimwi amu Chisipanishi iijisi mutwe wakuti Charitable Planning to Benefit Kingdom Service Worldwide. Broshuwa eeyi yalembwa kutegwa ipandulule nzila zinji izipego mbozikonzya kupegwa lino, antela kubwezyegwa mumulawo muntu afwa. Twaambo tuli mu broshuwa eeyi ambweni inga tiitwabeleka kulindinywe akaambo kamilawo yamitelo naa milawo iimbi iili mucisi canu. Kwiinda mukubelesya zyakusanga, ibanji bacikonzya kugwasya mubukombi bwesu alimwi amumilimo yaluzyalo iicitwa nyika yoonse alimwi ayalo mpindu njobajana yasumpuka ciindi nobacita boobo. Ibroshuwa eeyi kuti kailiko mucisi canu, mulakonzya kwiijana kwiinda mukwiilomba kumulembi wamumbungano.

Ikuti kamuyanda makani aambi, amuunke aalembedwe kuti “Make a Donation to Our Worldwide Work” anselelo aapeeji lyamatalikilo aa jw.org, naa kutumina kuofesi yamutabi.