Ciindi Nokwacitika Ntenda Zilicitikila

Ba Andrew ibakkala ku Sierra Leone bakaamba kuti: “Kusaanguna twakalimvwa kumaninwa maano. Zintu zyoonse nzyotwakajisi zyakanyonyooka akaambo kakukolomoka kwamankandya alimwi akupaya kwamaanzi.”

Ba David ibakkala ku Virgin Islands bakaamba kuti: “Nolyakainda guwo pati, twakajokela kuŋanda yesu. Pele kunyina cakasyaala nociba comwe. Mukanwa mwakayuma nta! Mwanaangu musimbi wakafwugama akutalika kulila kapati.”

IKUTI NAA mwakacitikilwa kale ntenda zilicitikila, kweelede kuti mulizyi kabotu mbobalimvwa aabo ibakafwutuka muntenda zili boobo mbuli: kunyongana, kulimvwa kulekelezyegwa, kukopana mumizeezo, kulibilika alimwi akutilimuka masiku. Bantu banji ibafwutuka balatyompwa kapati cakuti tabajisi abulangizi bwakuti zintu inga zyaba kabotu.

Ikuti naa mwakacitikilwa kale ntenda mubuumi, ambweni andinywe inga mwalimvwa kuti mulaafwaafwi kwaalilwa kuliyumya akaambo kamapenzi aamucitikila. Mane buya inga mwatalika kulimvwa kuti tacigwasyi kuzumanana kupona. Nokuba boobo, Bbaibbele lyaamba kuti cilagwasya kuzumanana kupona alimwi akuti kuli twaambo ncomweelede kuba abulangizi bwakuti zintu ziyooba kabotu kumbele.

KUZYIBA KASIMPE KAMU BBAIBBELE KUTUPA KUBA ABULANGIZI

Lugwalo lwa Mukambausi 7:8 lwaamba kuti: “Mamanino aamakani, mabotu kwiinda matalikilo aangawo.” Ciindi noyazwa akucitika ntenda, zintu zilakonzya kulibonya mbuli kuti tazikonzyi kuba kabotu alimwi. Pele kwiinda mukubeleka canguzu, zintu zilakonzya kuba kabotu alimwi.

Bbaibbele lyakasinsima kujatikizya ciindi ‘nokutakamvwugwi limbi jwi lyakoomoka noliba jwi lyakulila akaambo kamapenzi.’ (Isaya 65:19) Eeci ciyoozuzikizyigwa ciindi nyika yakuba paradaiso mubweendelezi bwa Bwami bwa Leza. (Intembauzyo 37:11, 29) Ntenda zilicitikila kunyina noziyoocitika limbi. Zintu zyoonse zitucisizya moyo ciindi notuziyeeya alimwi akupenga mumizeezo kuli koonse kuboola akaambo kakucitikilwa ntenda ziyoomana, nkaambo Leza Singuzuzyoonse usyomezya kuti: “Zintu zyakaindi tazikaibalukwi limbi pe, nokuba kuyeeyegwa mumoyo.”—Isaya 65:17.

Amuciyeeyele buyo: Mulengi wabikka bubambe ‘bwakumupa buumi bwakumbele bubotu alimwi abulangizi,’ nkokuti buumi bwaluumuno mubulelo bwa Leza bulondokede. (Jeremiya 29:11) Sena kuba aluzyibo oolu inga kwamugwasya kubona kuti cilagwasya kuzumanana kupona? Ba Sally ibaambidwe mucibalo cakumatalikilo bakaamba kuti: “Kuliyeezya zintu zyoonse zitaliboteli nzyobuyootucitila Bwami bwa Leza kumbele kulakonzya kumugwasya kuzumanana kuliyumya mumapenzi aanu alimwi akuleka kubikkila maano kuzintu zibyaabi izyakamucitikila.”

Sena inga tiimwayanda kwiiya zinji kujatikizya Bwami bwa Leza nzyobuyoobacitila bantu ino-ino? Ikuti mwacita oobo, cilakonzya kumuyumya nokuba kuti mwacitikilwa ntenda zilicitikila. Pesi mulakonzya kuba masimpe kuti cilagwasya kuzumanana kupona lino mbwaanga kumbele mulangila kuyoopona buumi bunyina ntenda zilicitikila. Pele calino, Bbaibbele lilapa busolozi bubotu bwalo bukonzya kumugwasya kuzumanana kuliyumya mumapenzi aaboola akaambo kantenda zilicitikila. Amubone zikozyanyo zisyoonto.

Magwalo Aamu Bbaibbele Aakonzya Kumugwasya

Amube aciindi cinji cakoona.

“Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.”—Mukambausi 4:6.

Basikuvwuntauzya bamwi baamba kuti, ciindi bantu nobacitikilwa zintu ziyoosya kapati, inga balaindila kulimvwa bubi alimwi akukatazyigwa mumizeezo ikuti naa kabatajani ciindi cinji cakoona. Aboobo, cilayandika kapati kujana ciindi cinji cakulyookezya.

Amubandike abamwi kujatikizya mbomulimvwa.

“Zintu nzyalibilika muntu nzyezipa kuti moyo wakwe utyompwe, pele jwi libotu ndelipa kuti ukkomane.”—Tusimpi 12:25.

Amubandike amunamukwasyi naa mulongwe ngomusyoma kapati kujatikizya mbomulimvwa. Kunze aakumuswiilila buyo ciindi nomwaamba mbomulimvwa, banamukwasyi naa balongwe balakonzya kumuyumya-yumya kwiinda mumajwi alimwi akumupa lugwasyo ndomuyandika.a

Amulangile zintu zibotu ziboola kumbele.

“Kuli majulu mapya anyika mpya nzyotulindila swebo kweelana acisyomezyo cakwe, alimwi muli zyeezyi muyooba bululami.”—2 Petro 3:13.

a Muntu uulimvwa kutyompwa kwaciindi cilamfwu naa kulibilika kapati inga wayandika kuunka kucibbadela.