Ciindi Nomulimvwa Bubi Kapati Cakuti Tamuciyandi Kuzumanana Kupona

Ba Adriana ibakkala ku Brazil bakaamba kuti: “Kulimvwa boobu kwakazumanana kwaciindi cilamfwu. Aboobo ndakatalika kuyeeya kuti ndilijaye buyo.”

SENA KULI nomwakalimvwide kale bubi kapati cakuti tiimwakacili kuyanda kuzumanana kupona? Ikuti kacili boobo, nkokuti inga mwabamvwisya ba Adriana. Bakajisi penzi lyakulibilika kapati, kuusa alimwi akubula bulangizi. Ba Adriana bakajanwa abulwazi ibupa kutyompwa ciindi coonse.

Alimwi amubone ncaakaamba mwaalumi waku Japan uutegwa Kaoru, walo iwakali kulanganya bazyali bakwe bacembeede alimwi ibakali basibukilwi bulo. Wakaamba kuti: “Aciindi eeci, ndakajisi bubi kapati kumulimo. Mukuya kwaciindi, ndakaba alusini naa penzi lyakutayanda kulya alimwi acilabila. Ndakatalika kuyeeya kuti inga ndalemununwa ikuti ndafwa buyo.”

Mwaalumi waku Nigeria uutegwa Ojebode wakaamba kuti: “Lyoonse ndakali kuusa cakuti mane ndakali kulila, aboobo ndakatalika kuyandaula nzila yakulijaya.” Cikkomanisya ncakuti, ba Ojebode, ba Kaoru alimwi aba Adriana kunyina nobakalijaya pe. Pele mwaka amwaka bantu banji balalijaya.

NKOMUKONZYA KUJANA LUGWASYO

Bunji bwabantu ibalijaya mbasankwa, kwaambisya aabo ibafwa nsoni kulomba lugwasyo. Jesu wakaamba kuti, bantu baciswa mbobayandika musilisi. (Luka 5:31) Aboobo ikuti naa mulimvwa kutyompwa kapati cakuti muyeeya zyakulijaya, akaka mutafwi nsoni kulomba lugwasyo. Bunji bwabantu ibajisi penzi lyakutyompwa bajana kuti kusilikwa kucibbadela kwabagwasya kapati kulimvwa kabotu alimwi akuzumanana kuliyumya. Ba Ojebode, ba Kaoru alimwi aba Adriana boonse bakasilikwa kucibbadela aboobo lino bali mbubo-mbubo.

Bamadokota balakonzya kubelesya musamu naa kubandika amuntu ooyo naa kuzibelesya nzila zyoonse zyobilo kusilika bulwazi bwakutyompwa kapati. Kuyungizya waawo, aabo ibaciswa bulwazi bwakutyompwa kapati bayandika banamukwasyi alimwi abalongwe ibakonzya kubamvwisya kapati, kubakkazikila moyo, kubabikkila maano alimwi akubagwasya buya. Mulongwe wiinda kubota umwi aumwi ngwakonzya kuba anguwe ngu Jehova Leza, walo uupa lugwasyo lubotu kapati mu Jwi lyakwe Bbaibbele.

SENA KULI CIKONZYA KULIMANINA LIMWI PENZI EELI?

Aabo bajisi penzi lyakutyompwa kapati inga bayandika kunoobelesya musamu kwaciindi cilamfwu alimwi ambweni inga bayandika kucinca zintu zimwi nzyobakazyibide mubuumi bwabo. Pele kuti naa mulwana penzi lyakutyompwa kapati, inga mwaba abulangizi bubotu bwakumbele mbubwenya mbobajisi ba Ojebode. Bakaamba kuti: “Ndilangila ciindi noluyoozuzikizyigwa lugwalo lwa Isaya 33:24, lwalo ilwakasinsima ciindi nokutakabi muntu naba omwe waamba kuti ‘Ndaciswa.’” Mbubwenya mbuli ba Ojebode, amujane luumbulizyo mucisyomezyo ca Leza calo icaamba ‘zyanyika mpya’ oomo “kucisa” mokutakabi limbi pe. (Ciyubunuzyo 21:1, 4) Cisyomezyo eeci cilabikkilizya akumana mapenzi oonse aalwana mizeezo. Zintu izimupa kulimvwa bubi ziyoomana mane kukabe kutamani. Alimwi zintu eezyi “tazikaibalukwi limbi pe, nokuba kuyeeyegwa mumoyo [wanu].—Isaya 65:17.

Magwalo Aamu Bbaibbele Aakonzya Kugwasya

Leza ulizyi kabotu mbomulimvwa.

“Mebo nde Jehova Leza wako, ndilikujatide kujanza lyako lyalulyo, . . . uukwaambila kuti, ‘Utayoowi pe. Mebo ndilakugwasya.’”—Isaya 41:13.

Jehova ulizyi kabotu mbotulimvwa kwiinda muntu uuli woonse, alimwi uyanda kutugwasya.

Amuzinzibale kuyeeya Jwi lya Leza.

“[Elija] wakalomba kuti afwe buyo. Wakati: ‘O Jehova, kondijaya buyo.’”—1 Bami 19:4.

Ba Ojebode bakaamba kuti: “Kuzinzibala kuyeeya Jwi lya Leza kwakandigwasya kapati. Ndakajana kuti awalo musinsimi Elija aciindi cimwi wakalimvwa mbuli mbondakalimvwide.”

Amwiiye kuzikozyanyo zyamu Bbaibbele.

‘Mebo [nkokuti Jesu] ndakukombelezyela mumupailo kuti lusyomo lwako [Petro] lutamani.’—Luka 22:32.

Ciindi mwaapostolo Petro naakamukaka Jesu ziindi zyotatwe, wakatyompwa kapati alimwi wakalila citaambiki. Ba Kaoru bakaamba kuti: “Kuzinzibala kuyeeya ncaakacita Petro alimwi ambwaakeendelezyegwa a Jesu, kwakandigwasya kubona kuti Jehova a Jesu bakamubikkila maano Petro kujatikizya mbwaakali kulimvwa. Eeci cakandikulwaizya kapati.”

Alimwi zintu eezyi “tazikaibalukwi limbi pe, nokuba kuyeeyegwa mumoyo [wanu].”—Isaya 65:17