Kabbokesi Kamubuzyo
◼ Ino makwebo aacitilwa mumbungano ayelede kulangwa buti munzila yeelede?
Ikuti katuzi kaambo ncokuli miswaangano alimwi ncotuyanzanina abakwesu, imubuzyo oyu taukatazyi kuuingula. Tulajanika kumiswaangano alimwi tulayanzana abakwesu ikutegwa tukulwaizigwe munzila yakumuuya. (Heb. 10:23-25) Aboobo, inga taceeleli kuleta makani aambi, kubikkilizya amakani aajatikizya makwebo, aanga alatuleesya kutwaambo twamu Magwalo ntotuswaanganina.
Naakamana myaka iili yotatwe kali mumbungano yaku Efeso, imwaapostolo Paulo, amanjezeezya aasalala wakaanguluka kwaamba kuti: “Nsikalikumbuzizye nsiliva yamuntu, niiba ngolida, naaba masani pe.” (Inc. 20:33) Paulo tanaakakaka buyo kulikumbuzya zintu zyakumubili zyabamwi pele kwiina naakabelesya kasimpe ikutegwa avwubile mpawo.
Ŋanda zya Bwami naa maanda mucitilwa ciiyo ca Bbaibbele naa aamiswaangano ya Bakamboni ba Jehova taali masena aakwaambilizila makani aajatikizya makwebo naa kulembwa milimo pe, pele muciindi caboobo, aaya mmasena aacitilwa buyo mibandi yakumuuya, miswaangano kaitana talika, noili mukucitwa alimwi aciindi noyamana. Aboobo, ikubisya-bisya bubotu bwakuyanzana kwesu kwa Bunakristo kwiinda mukubandika makani aamakwebo inga kwatondezya kuti kwiina abuniini notuzilemeka zintu zyakumuuya.
Bamwi, akaambo kakuti balizi kuti ibunji bwabakwesu banyina mincini iigusya zifwoto, aba makwebo aabo ikufwotola bantu ciindi camiswaangano mipati aziindi zimwi bantu ba Jehova nobayanzana antoomwe. Kwiina cilubide pe naa bakwesu bayanda kufwotolwa ciindi camiswaangano eci caalubazu. Ikuti mukwesu watufwotola mpoonya walomba kuti kube kusanga kutegwa mafwoto akasanzigwe, aaya taali makwebo pe. Pele, ibunji bwabaabo ibafwotola bali mukujana mali manji aatala, aboobo bali mukucita makwebo. Tabeelede kuzumizigwa kubisya bubotu bwakuyanzana kwesu kwa Bunakristo kwiinda mukujatikizya makani aamakwebo alimwi toonse tatweelede kuzumina pe kuti tunjile mumakani aali boobu. Ncimwi buyo amisyobo yamakwebo iimbi. Miswaangano yesu ibambilidwe buyo kukomba Jehova, nditafwule lyakwe lyakumuuya mpotulida alimwi nkotukkomanaa kukulwaizyanya.—Rom. 1:11, 12.