“Kamucita Obo Kuti Cibe Ciibalusyo Candime”
1 Mukuya kwaciindi ibantu kanjikanji inga bayabuleka kulemeka zintu zipati. Nkakaambo kaako Jesu ciindi naakali kutalisya “Mulalilo wa-Mwami” wakalailila basikwiiya bakwe kuti: “Kamucita obo kuti cibe ciibalusyo candime.” Aboobo kuzwa leelyo, Banakristo mubuzuba bwaciibalusyo calufwu lwa Jesu ‘balatondezya lufu lwa-Mwami mane do akasike.’—1 Kor. 11:20, 23-26.
2 Ino-ino Jesu uyoobatambula kujulu ‘bakatanga kaniini’ bamamanino ibasyeede ibayabuceya. (Lk. 12:32; Joh. 14:2, 3) Kono bananike baceede antoomwe abankamu mpati ‘bambelele zimwi’ ibayabuvwula bayooba acoolwe alimwi cakusekelela Mulalilo wa Mwami mu April 11. (Joh. 10:16; Ciy. 7:9, 10) Ciyootupa kuti tumulumbe kapati Jehova kuluyando lupati ndwaakatondezya mukutuma Mwanaakwe simuzyalwaalikke kuti azoogwasye bantu. Kuyoobandikwa cikozyanyo cibotu ca Jesu, luyando lwakwe, kusyomeka kwakwe kusikila wafwa kutegwa ape cinunuzyo alimwi akuti lino Mwami uulela mu Bwami bwa Leza bwakakkazikizigwa kubikkilizya azileleko zya Bwami ziyooletelwa bantu. Masimpe eci nciindi cakwiibaluka!
3 Amulibambilile Limwi Lino: Atusole kucita kuti iswebo kubikkilizya abaabo bayooyanzana andiswe tukakkomane kapati alimwi akulumba aciindi eci ca Ciibalusyo. Tulakonzya kulibambila mumyoyo yesu kwiinda mukwiinduluka kubala zibalo zya Bbaibbele zijatikizya mulimo wa Jesu ngwaakacita mumazuba masyoonto aamamanino alimwi azintu zyakacitika katanafwa buyo. Munsondo zili mbozibede kacitana citwa Ciibalusyo, tulakonzya twabelesya bbuku lya Munthu Wamkhulu mitwe 112-16 muciiyo cesu ca Mukwasyi.
4 Mbangaye mbomuyeeyela kuti inga baboola kuti naa mwasola kubagwasya kubona bubotu bwa Ciibalusyo, mwabatamba akubatondezya kuti balayandika? Amubalembe mazina lino alimwi musole mbuli mbomukonzya kubagwasya kuboola. Kuzwawaawo, amubagwasye kuzumanana kuyaambele munzila yakumuuya kwiinda mukubakulwaizya kujanika kumiswaangano lyoonse.
5 Muciindi ca Ciibalusyo, kuyoocitwa bubambe bwakugwasya boonse kuyungizya ciindi cakukambauka. Ikuti naa mwacibamba kabotu ciindi canu, sena inga tamukonzyi kucita bupainiya bwakugwasilizya mu April? mu May? Inzila yomwe mpati njotunga twatondezya kuti tulaciyeeya alimwi tulalumba kuli ncaakatucitila Jesu kwiinda mucinunuzyo cakwe, njakubandika zya Leza wesu Jehova alimwi azileleko ziyooletwaa bulelo bwa Bwami bwa Mwanaakwe.—Int. 79:13; 147:1.