Nobana—Mulatukkomanisya!
1 Nobana basankwa abasimbi, sena mulizi kuti Jehova umwaambila kuti mweelede kujatikizigwa mumilimo yambungano? (Dt. 31:12; Int. 127:3) Ncintu cikkomanisya kubaantoomwe andinywe notukomba Jehova! Mukkazika myoyo yesu ciindi nomukkala kamuumwine wii kamuswiilila notuli kumiswaangano. Cilatukkomanisya, ikapati nomusola kwiingula mumajwi eenu nobeni. Imbungano yoonse ilakkomana ciindi nomubandika makani ngomupedwe mu Cikolo Camulimo Wateokrasi, nomutola lubazu andiswe mumulimo wamumuunda alimwi anotumvwa kuti mulakambauka cabusicamba kuli basicikolonyoko alimwi abamayi.—Int. 148:12, 13.
2 Tuyanda kumuzibya kuti tulakkomana kapati andinywe notubona mbomulilemeka kabotu, kusama kwanu kwabulondo, bukkale bwanu busalala, alimwi ambomulemeka bapati. Tulakkomana cini-cini, ikapati nomutondezya kuti ‘mulamuyeeya Mulengi wanu’ kwiinda mukulibikkila mbaakani zyateokrasi.—Muk. 12:1; Int. 110:3.
3 Amutwaambile Mbaakani Zyanu: Umwi mwana musankwa wamyaka iili lusele wakaambila mulangizi wacooko kuti: ‘Kusaanguna ndiyanda kuti ndibbapatizigwe, mpoona ndiyanda kuti nkenoogwasya mumbungano, nkebeleka mucibeela cilanga zyamincini yakwaambawida, nkeli sikugwasilizya, nkegwasya mukulanga zyamabbuku, nkebala ciindi nokucitwa ziiyo zyabbuku alimwi azya Ngazi Yamulindizi. Kwamana njanda kuti nkabe mukutausi, kuzwa waawo nkabe mwaalu. Alimwi njanda kuti nkabe mupainiya nkaunke kucikolo cabapainiya. Mpoona njanda kuti nkaye ku Beteli, nkabe mulangizi wabbazu naa wacooko.’ Taluliboteli luyando ndwaakatondezya mucoolwe cakubelekela Leza!
4 Mbomuyabukomenena munzila yakumubili ayakumuuya, tulakkomana kumubona kamuzuzikizya mbaakani zyenu. (Amweezyanisye Luka 2:52.) Mwaka amwaka, zyuulu-zyuulu zyandinywe mulaba basikumwaya batabbapatizidwe mpoona muleelela kubbapatizigwa kuba babelesi ba Jehova balyaabide. Lukkomano lwesu luyabuyaambele twamubona kamubweza ntaamu yakuba bapainiya bakugwasilizya alimwi akunjila mulimo wabukambausi waciindi coonse. Inzya, nobana mulatukkomanisya alimwi mupa kuti Taateesu wakujulu atembaulwe. Jehova amuleleke kapati!—Tus. 23:24, 25.