Nywebo Muleelede Kuba Bantu Bali Buti?
1 Iciindi cakubeteka bantu boonse caswena afwaafwi. Eeco ciindi ciitwa kuti “buzuba bwa-Jehova” mu Bbaibbele. Eeco nciindi Leza nayoonyonyoona bantu babi; alimwi eco nciindi alimwi nobayoofwutulwa bantu baluleme. Boonse bantu banoopona ciindi eco bayoobetekwa kujatikizya mbobalikupona buumi bwabo. Akaambo kaceeci Petro ubuzya mubuzyo uupa kuzinzibala kuyeeya, wakuti: “Nywebo muleelede kuba bantu bali buti?” Ncaambisya kapati kuti cilayandika ‘nkweenda munzila iisalala, milimo yabukombi [NW], alimwi akulangila buzuba bwa-Jehova,’ alimwi ‘akutabaa kabala nikaba kampenda alimwi akukkala muluumuno.’—2 Pet. 3:11-14.
2 Kweenda Munzila Iisalala Akucita Milimo Yabukombi: Kweenda munzila iisalala cijatikizya kukkala bukkale buli kabotu ibutondezya bulemu kunjiisyo zya Bbaibbele. (Tit. 2:7, 8) Munakristo tayelede kukkala bukkale bwanyika bwakuliyanda, ibwakoongelezegwaa zisusi zyanyama.—Rom. 13:11, 14.
3 Ibbala lyakasandululwa kuti “bukombi” lyaamba “lukakatilo lwamuntu kuli Leza iluzwa mumoyo uukulwaizigwaa luyando lupati lwaciimo cakwe cibotu.” Eeci ciimo cabukombi tulacitondezya kwiinda mubusungu bwesu notucita mulimo wakukambauka. Icitupa kukambauka takali kaambo kalikke kakuti tupedwe mulimo oyu pe; tulakambauka akaambo kakumuyanda Jehova camoyo woonse. (Mk. 12:29, 30) Akaambo kaluyando olu, mulimo wesu wakukambauka tuubona mbuli kuti ncitondezyo cipati cabukombi bwesu. Mbwaanga bukombi bwesu bweelede kuba bwalyoonse, tatweelede kulekezya-lekezya mukukambauka kwesu. Aakati kamilimo njotucita nsondo ansondo kukambauka kweelede kakuli ambele.—Heb. 13:15.
4 “Kulangila” buzuba bwa Jehova caamba kuti buzuba abuzuba cintu ncotuyeeya kapati mumoyo wesu mbuzuba mbubwena obo, lyoonse tulabubikkila maanu. Caamba kuti tusaanguna zintu zya Bwami.—Mt. 6:33.
5 Ikutabaa Kabala, Nikaba Kampenda, Alimwi Akukkala Muluumuno: Mbotuli bankamu mpati, ‘twasanzya zikobela zyesu akuzitubya mubulowa bwa-Mwanambelele.’ (Ciy. 7:14) Aboobo ‘ikutabaa kabala’ caamba kuti tweelede lyoonse kucenjelela busofwaazi bwanyika kutegwa butanyonganyi bukkale bwesu busalala mbotwakalyaaba. Tulakkala ‘cakutaba akampenda’ kwiinda mukutazumizya bukkale bubi ibwakutandila zisusi zyakumubili kunyonganya ciimo cesu ca Bunakristo. (Jak. 1:27; 1 Joh. 2:15-17) Tulatondezya kuti tukkala ‘muluumuno’ kwiinda mukutondezya “luumuno lwa-Leza” notweendelezya bantu munzila zyoonse.—Flp. 4:7; Rom. 12:18; 14:19.
6 Ikuti naa twazwidilila kutantamuka busofwaazi bwanyika, taakwe ‘notuyakukozyanizigwa aziyanza zyaciindi ecino,’ nzyatayandi Jehova. Pele, milimo yesu mibotu ilagwasya bantu kubona kwaandaana ‘akati kamululami asizibi, muntu uuyoowa Leza amuntu uutamuyoowi.’—Rom. 12:2; Malk. 3:18.
7 Ibunji bwandiswe twakaliko ku Muswaangano Wacooko wa “Lusyomo mu Jwi lya Leza,” alimwi cakulya cakumuuya icikatalusya capa kuti tuyandisisye kutondezya bukombi bwesu. Ibapya banji abalo balijisi luyando olu. Tulakonzya kuba cileleko kulimbabo kwiinda mukubagwasya kutola lubazu mumulimo wamumuunda mu October a Novermber.
8 Izina lya Jehova lilasumpulwa, imbungano ilayumizigwa alimwi bamwi balagwasigwa ikuti camoyo omwe twazumanana kucita ‘milimo mibotu.’ (1 Pet. 2:12) Atuzumanane kuba bantu baliboobo.