Tulitumidwe Mulimo
1 Jesu wakalailila basikumutobela kuti “baiisye bantu bamisyobo yoonse.” (Mt. 28:19) Mumanyika aali 232 kubikkilizya ansumbu nyika yoonse mbwiizulwa, basikutembaula Jehova Leza bainda kumamiliyoni osanwe balapa bumboni buzwide bwakuzuzikizigwa kwa malailile aa Jesu. Ino mbuti kutugama buya lwesu swebo? Sena tulaubikkila maanu mulimo ngotutumidwe wakukambauka?
2 Icintu Ceelede: Imulimo wakutumwa ujatikizya “malailile aakaambilwa limwi aakuucita zintu zimwi.” Kristo wakatulailila kuti tukambauke. (Inc. 10:42) Imwaapostolo Paulo wakalizi kuti wakalijisi mukuli wakwaambilizya makani mabotu. (1 Kor. 9:16) Mucikonzyanyo: Amuyeeye kuti muli babelesi mubwato bupati bwatalika kubbila. Kapitau wamwaambila kuti mucenjezye basikukkwela akubasololela kumato masyoonto-syoonto aakufutukila. Sena mulaafutatila malailile aaya akubikkila maanu kukulifutula kwanu nobeni? Peepe. Bantu aaba basyoma ndinywe. Ibuumi bwabo buli muntenda! Muleelede kucita mulimo ngomutumidwe ikubagwasya.
3 Leza ulitutumide mulimo wakucenjezya. Ino-ino Jehova uyoobugwisya bukkale bwazintu obu bubyaabi. Buumi bwa mamiliyoni tabuzibidwe nkobugama. Sena inga caba camaanu kuti twataambila bamwi akubikkila buyo maanu kukulifutula tobeni? Peepe. Tuleelede kugwasya kufutula maumi abamwi.—1 Tim. 4:16.
4 Izitondezya Zisyomeka Zyakutobela: Imusinsimi Ezekiele wakalimvwa kuti ulabaa mulandu ataambilizya mulumbe wakucenjezya kubana Israyeli batasyomeki. Jehova wakasinizya kumucenjezya cakali kunga cilacitika kuti naakaalilwa kucita mulimo wakwe naakati: “Kufumbwa ciindi nindaambila sizibi kuti, Ncobeni ulafwa, na wabula kumucenjezya, . . . , lino oyo sizibi uyoofwa mukati kamilandu yakwe, pele bulowa bwakwe ngumulandu wako.” (Ezk. 3:18) Ezekiele wakauzuzikizya cakusyomeka mulimo ngwaakatumidwe noliba ciindi naakali kukazigwa ncobeni. Aboobo wakakkomana ciindi lubeta lwa Jehova nolwakacitwa.
5 Nokwakainda myaanda yamyaka, imwaapostolo Paulo wakalemba kujatikizya mukuli wakwe wakukambauka. Wakaamba kuti: “Ndasalala kubulowa bwabantu boonse, nkaambo nsikasiside cintu pe, ndakamwaambila luyando loonse lwa-Leza.” Paulo wakali kukambauka kubuleya alimwi wakacita obo ŋanda aŋanda nkaambo wakalizi kuti kwaalilwa kucita boobo nokwakamuletela mulandu wabulowa kuli Leza.—Inc. 20:20, 26, 27.
6 Sena tulisungweede mbuli Ezekiele? Sena inga tulimvwa bwakalimvwa Paulo kuti tweelede kukambauka? Imulimo ngotutumidwe ulimbuli mbowakabede wabo. Tweelede kuzumanana kuzuzikizya mukuli wesu wakucenjezya bamwi nokuba kuti mbantu batayandi kuswiilila naa ibakazya. Izyuulu zyuulu azimbi zilakonzya kuteelela mulumbe wa Bwami akwaamba kuti: “Atweende anywebo, nkaambo twamvwa kuti Leza mpali akati kanu.” (Zek. 8:23) Luyando ndotujisi kuli Leza akubantuma alutukulwaizye kutatyompwa. Tulitumidwe mulimo wakukambauka!