Sena Mulapandulula Jwi lya Leza Mbukweelede?
1 Jesu Kristo ngomwiiyi mupati wakaponede. Wakali kwaambaula munzila yakali kukondelezya myoyo yabantu, yakali kubapa kuyeeya alimwi akubakulwaizya kuti bacite milimo mibotu. (Mt. 7:28, 29) Wakali kubelesya Jwi lya Leza ciindi coonse mukuyiisya kwakwe. (Lk. 24:44, 45) Wakali kulumba Jehova Leza kuli zyoonse zyaakazi alimwi azyaakali kukonzya kucita. (Joh. 7:16) Jesu wakapa citondezyo cibotu kuli basikumutobela kwiinda mukupandulula Jwi lya Leza mbukweelede.—2 Tim. 2:15.
2 Awalo mwaaposotolo Paulo wakaba citondezyo cibotu kwiinda mukupandulula Jwi lya Leza kabotu-kabotu. Taakali kubalila buyo bamwi Magwalo; wakali kupandulula akubandika zyaakali kubala, ikutondezya kuzwa mu Jwi lya Leza kuti Jesu ngowakali Kristo. (Inc. 17:2-4) Mbubwena buyo, siciiya wakali kunongosola kwaamba Apolo “wakalaazi kapati Malembe” alimwi wakali kwaapandulula mbukweelede naakali kwaamba kasimpe munzila mbotu kapati.—Mili. 18:24, 28, Ci.
3 Koba Mwiiyi wa Jwi lya Leza: Basikwaambilizya Bwami basunu bazwidilila kapati mukuyiisya bantu babombe myoyo kwiinda mukubelesya Bbaibbele akupandulula makani kweelana ancolyaamba. Imukwesu umwi wakakonzya kubelesya bbuku lya Ezekiele 18:4 aamwi magwalo aakozyenye ikubandika amufundisi antoomwe abantu bakwe botatwe makani aajatikizya ciyoocitika kubantu babyaabi abaluleme. Kuzwa waawo basicikombelo bamwi bakatalika kwiiya Bbaibbele nkabela omwe akati kabo wakazumina kasimpe. Alimwi umwi mucizi wakalombwa kuti apandulude mulumi sikukazya wamukaintu umwi wakali kuyanda kwiiya, kaambo Bakamboni ba Jehova ncobatasekeleli Kkilisimasi amazubaa kuzyalwa. Naakali kubala kwiingula kwamu Magwalo kuzwa mubbuku lya Kukambitsirana imwaalumi wakalitondezya kumvwa. Imukaintu wakwe wakakkomana kapati akaambo kakuteelela kwamulumi cakuti wakati: “Tunooboola kumiswaangano yanu.” Awalo mulumaakwe wakazuminizya!
4 Amubelesye Lugwasyo Luliko: Mulimo Wesu Wabwami aprogilamu ya Muswaangano Wamulimo ilatupa busolozi buli kabotu bukonzya kutugwasya kupandulula Jwi lya Leza. Basikumwaya banji balalumba akaambo kanzila zyandeene-andeene zipedwe zyalo zimwaigwa akutondezyegwa mbuli mbozibeleka kutegwa tugwasigwe, calo casinizya kuba cintu ncetuyanda lino alimwi cibeleka kapati. Ibbuku lya Kukambitsirana za M’malemba lijisi nzila zinjaanji zijatikizya mbotunga twapandulula kabotu makani aajatikizya mitwe yamakani mipati-pati iinda ku 70 iitondezyedwe mu Jwi lya Leza. Ibbuku lya Luzibo Lutola Kubuumi Butamani lilabandika cakukosaula-kosaula njiisyo zya Bbaibbele zyoonse zyantalisyo nzyobeelede kuteelela bapya. Iciiyo ca 24 alimwi aca 25 mubbuku lya Bbuku Lolangiza la Sukulu Yateokratiki lilatutondezya mbuli bamayi basongo ncobeni mbobayelede kutalika kabotu makani, kubala alimwi akubelesya magwalo. Tweelede kulubelesya kabotu loonse olu lugwasyo ndotujisi.
5 Ikuti katupandulula Jwi lya Leza mbukweelede tulajana kuti “lili abuumi, lili anguzu . . . alimwi lilabeteka kuyeeya akuyanda kwamoyo” kwabaabo mbotukambaukila. (Heb. 4:12) Ikuzwidilila nkotubaa kwalo kujatikizya Jwi lya Leza kuyootupa kuti twaambe kasimpe cabusicamba kapati!—Mili. 4:31, Ci.