Amulibambile Nzila Yanu Njomunga Mwabelesya Kumwaya Mamagazini
1 Alatukkomanisya mamagazini aa Ngazi Yamulindizi alimwi a Awake! akaambo kazibalo zyawo izyeenda aciindi alimwi izijisi luzibo, zyalo izibandika zintu zyoonse kutalikila kumakani aajatikizya nyika yoonse kusikila “[ku]makani malamfu aabulondo bwa-Leza.” (1 Kor. 2:10) Toonse tulatuyeeya twaambo tupya tunji itukulwaizya ntotwakabala mumamagazini aya, alo Jehova ngalimukubelesya buce-buce kuyubununa kasimpe. (Tus. 4:18) Tuyanda kuba bantu bayandisisya kwaamwaya kubantu banji mbuli mbotukonzya.
2 Amuvwuntauzye Bube Bwacilawo Ncomupedwe: Mbantu bamusyobo nzi bakkala mucilawo ncomukambaukila? Kuti naa mbantu babindide lyoonse, inga mwayandika kulibambila mubandi mufwaafwi pesi uugaminina. Ikuti kamuli mucilawo bantu mobakkalikide, mulakonzya mwaulansya mubandi wanu. Ikuti naa bunji bwabalaaŋanda kababeleka masikati, ndiza inga cagwasya kapati kubaswaya mumaanda abo kumazuba kwini naa kumangolezya. Mulakonzya kucita bukamboni bwamumigwagwa kwiinda mukukambaukila bantu beenda mumigwagwa ciindi camasikati, naa kuyabukambauka mutuntoolo. Bamwi basikumwaya bazwidilila kwiinda mukukambaukila bantu mumasena mobasiya myootokala alimwi amumisika.
3 Amwaazibe Mamagazini Ngomujisi: Kamubala yomwe-yomwe magazini mbomwaitambwida buyo. Amusale zibalo nzyomuyeeya kuti inga zyabakonda bantu bamucilawo canu. Nzintu nzi zibapenzya? Amuyandaule kaambo keni-keni nkomunga mwazubulula kuzwa mucibalo ncomukanza kubelesya. Amuyeeye mubuzyo ngomunga mwabuzya kukulwaizya muntu kuteelela. Amusale lugwalo lweelede ndomutikabale kuli ulaaŋanda kufwumbwa mwaakupegwa ciindi cakucita boobo. Amuyeeye mbomunga mwayaka ntalisyo yanyendo zyakupilukila.
4 Amulibambile Majwi Ngomuyakutalisya: Amusalile limwi kabotu-kabotu majwi aambomuya kutalika kulipandulula kwenu akutalika mubandi. Bamwi bajana kuti bazwidilila kwiinda mukutalisya majwi aakuti: “Cibalo ncindabala mumagazini eyi cilakondelezya, elyo ndiyanda kuti ndicibandike abamwi.” Banji batalika amubuzyo uujatikizya kaambo kakubandisya nkobakanza kubelesya. Mucikozyanyo:
5 Nomubandika cibalo cijatikizya kuvwula kwamilandu, mulakonzya kubuzya kuti:
◼ “Ncinzi cinga cayandika kutegwa lyoonse katukonzya koona masiku kakunyina kulibilika kubbidwa naa kucisigwa?” Amupandulule kuti mulijisi makani aatondezya cintu cinga camana penzi eli. Alimwi eeci cintu ino-ino ciyakugwisya manyongwe ambi oonse. Amwaambe cimwi cintu mumagazini icipa bulangizi obo. Ciindi nomwapilukila mulakonzya mwabandika aulaaŋanda cibalo 1 cabbuku lya Luzibo.
6 Nomubelesya cibalo cijatikizya buumi mumukwasyi, mulakonzya mwaamba kuti:
◼ “Ibunji bwabazyali cilabayumina kulanga mukwasyi mazubaano. Mabbuku manji aabandika makani aya alembwa, pele nobaba bahaabupampu balakazyanya. Sena kuli uunga watupa malailile aasyomeka?” Amubandike kaambo kamwi kuzwa mumagazini ikatondezya lulayo lwamaanu ilujanika mu Bbaibbele. Ciindi nomwapilukila, amubandike caamba Magwalo kumakani aakulela bana mubbuku lya Luzibo, apeeji 145-8.
7 Nomubelesya cibalo cijatikizya penzi lyabukkale, mulakonzya mwaamba kuti:
◼ “Bantu banji abakkazika bubi mazuba aya aakatazya ngotukkede. Sena muyeeya kuti Leza mbwayanda kuti katupona oobu?” Amujule kucibalo citondezya mbotukonzya kulwana mapenzi aasunu naa citondezya cinga catugwasya kulangila ciindi nokutakoonoolibilikwa. Ciindi nomwapilukila, amubandike cifwanikiso alimwi amajwi aacisindikizya apeeji 4 kusikila ku 5 mubbuku lya Luzibo, kuzwa waawo amutalisye ciiyo ca Bbaibbele.
8 Amweendelezye zintu kweelana aciimo caulaaŋanda: Mulaswaangana bantu basiyene-siyene. Amulibambile ntalisyo yamakani njomukonzya kunyona oku akooku kweelana amuntu ngomwajana. Amuyeeyele limwi mbomunga mwaunyona mubandi wanu nomubandika amwaalumi, mwanakazi, mudaala, naa mukubusi. Kunyina mulawo weelede kutobelwa kuzintu nzyomunga mwaamba. Amubelesye kufwumbwa nzila ikonzya kuzwidilila eyo inga yamuubaubila. Pele, amubandike cabusungu amoyo oonse alimwi amube bantu baswiilila kabotu. Aabo “basalidwe buumi butamani” balakubona kululama kwamakani aanu, elyo balaatambula.—Inc. 13:48.
9 Amugwasyanye: Kwiinda mukupana mizeezo, tulayiya nzila zimbi zyakwaambaula. Ikulibambila nzila zyakutalisya makani antoomwe kulatupa kuti tuzibile alimwi tube bantu balisyoma mukwaambaula kwesu. (Tus. 27:17) Kuti naa mwalibambila kuzintu nzyomuyakwaamba, moyo wanu unookkede nomwasika amulyango. Bazyali balayandika kapati kugwasya bana babo kulibambila, kabaswiilila nobayiisyanya ntalisyo zyamakani alimwi akubagwasya mumasena mobeelede kujatisya. Aabo bacili bapya balakonzya kugwasyigwa kwiinda mukubeleka abasikumwaya bakazibila.
10 Ikulibambila mbomunga mwamwaya magazini tacikatazyi pe. Iciyandika buyo nkuziba cakwaamba alimwi akucaamba munzila iikulwaizya. Kwiinda mukubelesya maanu alimwi akuyeeyela limwi, mulakonzya mwalijanina nzila mbotu yakutalisya makani iikonzya kuzwidilila.
11 Ikumwaya mamagazini ninzila imwi mpati yakumwaya mulumbe wa Bwami munyika yoonse mbwiizulwa. Kuti kamukonzya kumwaya Ngazi Yamulindizi alimwi a Awake! kubantu bamyoyo iluzi, aya mamagazini alakonzya kulyaambilila. Lyoonse kamuyeeya bubotu bwao alimwi ambwaanga afwutula bantu kwiinda mumakani aawo. Ikucita ‘zibotu kuli boobu akupana’ nkokukkomanisya Jehova kapati.—Heb. 13:16