Amwaapandulule Mbukweelede Majwi aa Leza
1 “Filipo wakajula mulomo wakwe, wasaanguna kulugwalo [lumwi] kumwaambila [makani] aa-Jesu,” eelyo naakali kupa bumboni kumubelesi wamfwulumende imwi. (Inc. 8:35) Filipo wakali ‘kwaapandulula mbukweelede majwi aabwini.’ (2 Tim. 2:15) Pele imazubaano, balangizi beendeenda bajana kuti basikumwaya banji tabavwuli kulibelesya Bbaibbele ciindi nobakambauka. Sena mulalibelesya Bbaibbele mumulimo wanu?
2 Zyoonse nzyotusyoma alimwi akuyiisya zijanika mu Jwi lya Leza. (2 Tim. 3:16, 17) Ndelipa kuti bantu babe acilongwe a Jehova alimwi akubapa lwiiyo luyoobagwasya mubuumi bwabo boonse. Nkakaambo kapati ncotweelede kubelesya Bbaibbele mumulimo wesu muciindi cakwiile kubandika makani aatukkomanisya. (Heb. 4:12) Mbwaanga bantu banji tabalizyi kabotu Bbaibbele, tuyandika kubala mulindilyo akubatondezya bulosolozi bugwasya mbolipa alimwi abuumi bwakumbele mbolisyomezya bantu.
3 Amubale Buya Kuzwa mu Bbaibbele: Mulakonzya kusoleka kuunka kuyookambauka kamunyina cibbeeke camabbuku. Mulakonzya kubikka bbuku naa magazini njomuyanda kuyoomwaya mufailo alimwi akubweza Bbaibbele mumaanza. Mpoonya mwatalika kubandikaa muntu, mulakonzya kulibelesya Bbaibbele kakunyina kumupa muzeezo wakuti muli mukukambauka buya. Amwiime kabotu kutegwa muswiilizi wanu amutobelezye kabotu ciindi nomubala mu Bbaibbele lyanu. Ambweni mulakonzya kumulomba kuti abale kapango kamwi cakupozya. Ciyoomugwasya ikwiibaluka nzyabala mu Bbaibbele ciindi nalibonena mwini ncolyaamba muciindi cakuzimvwa kulindinywe. Masimpe, ikutegwa agwasyigwe kumvwisya kaambo ikaambwa mulugwalo, amukankaizye majwi aagwasya kupandulula icaambwa.
4 Intalisyo Yakubelesya Lugwalo Lomwe: Mwamana kulipandulula, mulakonzya kwaamba kuti: “Ibantu bayandaula busolozi mubuumi bwabo kuzintu ziindene-indene. Ino muyeeya kuti nkuli nkotukonzya kujana busolozi bugwasya ncobeni? [Amulindile bwiinguzi.] Ino muyeeya buti kujatikizya makani aaya? [Amubale Tusimpi 2:6, 7, mwamana mulindile bwiinguzi.] Busongo bwabuntunsi taakwe nobugwasya pe, pele bwabatyompya bantu banji. Pesi bwalo busongo bwa Leza bwali kusyomeka alimwi bulagwasya lyoonse.” Mpoonya amutondezya bbuku naa magazini ndyomuli mukumwaya alimwi mupe citondezyo comwe cili mubbuku naa mumagazini citondezya busongo bwa Leza ibugwasya.
5 Jesu wakabelesya Magwalo ikugwasya bantu babombe myoyo. (Lk. 24:32) Paulo wakatondezya kuzwa mu Magwalo zintu nzyaakali kuyiisya. (Inc. 17:2, 3) Notuyaabuyungizya luzibo lwesu mukwaapandulula mbukweelede Majwi aa Leza, alwalo lusyomo alimwi alukkomano lwesu mumulimo luyooyaambele.