Kabbokesi Kamubuzyo

◼ Ncinzi ceelede kucitwa ciindi nokucitika ntenda mpati yalo iibajatikizya bwini-bwini ibakwesu?

Kuti Kwacitika Ntenda Mpati Nkomuzwa: Mutagubingani pe. Amukkazike moyo, amugamike mizeezo yenu aliceeco iciinda kuyandika—ibuumi, kutali lubono. Amulanganye zyakumubili nzyobayandika mpoona-mpoona ibaŋanda yenu. Amubazibye baalu ciimo ncomubede alimwi abusena nkomubede. Ibaalu abakutausi balaa lubazu lupati kapati mukwaabila lugwasyo. Kuti kwaba kucenjezya kujatikizya ntenda eyo kakucili ciindi, mbuli muguwo lyamvwula, aaba bakwesu beelede kusinizya kuti boonse bali kubusena bukwabilidwe, alimwi kuti ciindi cazumizya, beelede kujana akumwaya mpasya zinga zyayandika.

Kwainda ciindi, beendelezya ciiyo cabbuku beelede kuujana nkuubede umwi aumwi mukwasyi akubuzya mbuli mbobabede. Mulangizi weendelezya naa umbi mwaalu weelede kuzibisigwa mboubede umwi aumwi mukwasyi, nokuba kuti zintu zili buyo kabotu. Kuti kwaba uulicisa, ibaalu bayoosola kumujanina lugwasyo lwabusilisi. Alimwi bayooabila zintu zyakumubili iziyandika mbuli zilyo, zyakusama, mayusilo, naa ziyandika muŋanda. (Joh. 13:35; Gal. 6:10) Ibaalu banyenzi bayoopa bugwasilizi munzila yakumuuya alimwi akumizeezo kumbungano alimwi bayoosola kufwambaana kutalisya miswaangano yambungano alimwi. Kwamana kulingula cakulomya, imwaalu umwi weelede kusisya makani kumulangizi wabbazu kaiminina kabunga kabaalu ikumuzibya balicisa, kunyonyooka kwa Ŋanda ya Bwami, naa kunyonyooka kwaminzi yabakwesu, alimwi azili zyoonse zilibedelede izinga zyayandika. Imulangizi wabbazu mpoona uyootumina opesi lyamutabi luwaile akucita lipooti yamakani ayo. Iba opesi lyamutabi mbabayooendelezya ntaamu zipati ziyootolwa mukupa lugwasyo luyandika.

Kuti Kwacitika Ntenda Mpati Kumbi: Amubayeeye ibakwesu abacizi mumipailo yenu. (2 Kor. 1:8-11) Ikuti mwayanda kupa lugwasyo lwamali, inga mwatuma kusanga kwenu ku Sosaiti, mulimo oyu nkuubikkilidwe nkomo yalugwasyo ambali. Ikkeyala ngu: Watchtower, Box 33459, Lusaka 10101. (Inc. 2:44, 45; 1 Kor. 16:1-3; 2 Kor. 9:5-7; amubone Ngazi Yamulindizi ya Cingisi yamu December 1, 1985, mapeeji 20-2.) Mutabi nomutuma zintu naa mpasya kubusena bwantenda ccita kuti mwalaililwa buya abakwesu beendelezya. Eeci ciyoosinizya kuti mulimo walugwasyo oyu ucitwe mubulondo alimwi akwaabanya kabotu mpasya. (1 Kor. 14:40) Mwalombwa mutabatumini luwaile ba Sosaiti kakutakwe akaambo kaya kwamoonga, nkaambo eeci inga cajalila luwaile luyandika kukutambula milumbe kuzwa kubusena ikuli ntenda.

Kwamana kulingulwa kabotu-kabotu, iba Sosaiti bayoobona naa kuyandika kubamba kkomitii yalugwasyo. Ibakwesu balaa mikuli bayoozibisigwa. Boonse beelede kubelekelaamwi abaalu ibasololela kutegwa iziyandika kapati kubakwesu boonse zizulile kwaabilwa.—Amubone Jehovah’s Witnesses—Proclaimers of God’s Kingdom, mapeeji 310-15.