Kabbokesi Kamubuzyo
◼ Ciindi mbungano noyalombwa kugwasya kweendelezya dilwe, mibuzyo eeyi iitobela inga yabuka:
Nguni Weelede kupa makani aajatikizya dilwe? Ibeelede kusala kumakani aaya mbanamukwasyi. Balakonzya kusala kufwumbwa mukwesu uubbapatizidwe uujisi mpuwo mbotu. Ikuti naa kabunga kabaalu kalombwa kujana mwaambi, kalakonzya mbuli cilengwa kusala mwaalu uusimide kupa makani kubelesya makani aakazwa ku Sosaiti. Nokuba kuti tatukoociindizya kulumbaizya sikwaazwa, inga calulama kwaamba ciimo cibotu ncaakajisi.
Sena Ŋanda ya Bwami inga yabelesegwa? Ilakonzya kubelesegwa kufwumbwa kuti yazumizigwa akabunga kabaalu alimwi akuti dilwe elyo talicitwi aciindi camiswaangano. Iŋanda ya Bwami ilakonzya kubelesegwa kuti sikwaazwa wakajisi mpuwo mbotu alimwi wakali umwi wabamumbungano naa mwana muniini waumwi wamumbungano. Ikuti naa sikwaazwa wakajisi mpuwo mbyaabi akaambo kabukkale butali bwa Bunakristo, naa ambweni kuli azimbi zintu ziliko izinga zyabisya zina lyambungano, ibaalu balakonzya basala kutazumizya kubelesya Ŋanda ya Bwami.—Amubone bbuku lya Uministala Wathu, mapeeji 62-3.
Kanjikanji, Maanda aa Bwami taabelesegwi mumadilwe aabantu batasyomi. Muziindi zimwi inga azumizigwa kubelesegwa kuti naa banamukwasyi ibacaala mbaasikumwaya babbapatizidwe ibasungu, alimwi akuti sikwaazwa wakalizizilwe abamumbungano banjaanji kuti wakajisi ciimo cibotu kukasimpe kubikkilizya ampuwo mbotu kumakani aabukkale bululeme mumunzi, alimwi akuti kunyina zilengwa zyanyika izizumizigwa kweendelaamwi abweende bwadilwe.
Nobayeeya kuzumizya kuti Ŋanda ya Bwami ibelesegwe, ibaalu bayakuyanda kuziba naa kweelana acilengwa ibbokesi lilayandika kubako adilwe. Ikuti naa lilayandika, balakonzya balizumizya kuletwa mu Ŋanda ya Bwami.
Mbuti zyamadilwe aabantu banyika? Ikuti naa sikwaazwa wakajisi mpuwo mbotu mumunzi, mukwesu ulakonzya kupa makani aa Bbaibbele aaumbulizya kuŋanda kucitilwa dilwe naa kunamaumbwe. Imbungano ilakaka kweendelezya dilwe lyamuntu wakazizilwe kuba abukkale bubyaabi, naa buteendelani amulawo nobuba bukkale buteendelani kapati anjiisyo zya Bbaibbele. Cakutadooneka, mukwesu tayelede pe kuvwelana antoomwe amusololi wacikombelo ca Babuloni Mupati mukweendelezya dilwe nokuba kunjila mucikombelo eco ciindi cadilwe.
Ino kuti sikwaazwa wakagwisigwa mumbungano? Kanjikanji mbungano taakwe noitola lubazu, nokuba kuzumizya kubelesya Ŋanda ya Bwami. Ikuti naa oyo muntu wali kutondezya kuti weempwa alimwi walikuyanda kupilusigwa, mukwesu ulakonzya wapa makani aa Bbaibbele kuŋanda yadilwe naa kunamaumbwe ikupa bukamboni kubantu batasyomi alimwi akuumbulizya banamukwasyi kufwumbwa kuti manjezeezya aakwe kaamuzumizya kucita boobo. Pele katana sala kucita boobo, inga cabota kuti mukwesu oyo wabuzya saansi kukabunga kabaalu akumvwa ncobanga bayeeya. Muziindi nocinga tacikonzyi kululama kumukwesu kutola lubazu, inga cabota kuti umwi mukwesu wamumukwasyi wasikwaazwa wapa makani kuumbulizya banamukwasyi.
Malailile aambi alakonzya kujanwa mumamagazini aa Ngazi Yamulindizi ya mu Cichewa ya October 15, 1990, amapeeji 30-1; March 15, 1982, peeji 31; September 15, 1980, amapeeji 5-7; December 1, 1978, amapeeji 5-8; December 1, 1977, amapeeji 550-51; October 1, 1970, amapeeji 454-5; a Galamukani! ya September 8, 1990, amapeeji 26-7 a ya January 8, 1978, amapeeji 16-20.