Jehova Ulapa Inguzu Zigambya
1 Icoolwe citaliboteli camulimo uusetekene—imulimo wa Bunakristo wamumuunda—capegwa kuli basikwiiya ba Jesu boonse. (Mt. 24:14; 28:19, 20) Pele ikutalondoka alimwi amapenzi aabweende bwazintu buno zimwi ziindi inga zyatucitya kuti tulibone kuba bantu ibateelede kapati.
2 Iciindi eci nocicitika tulakonzya kuumbulizigwa alugwalo lwamwaapostolo Paulo ndwaakalembela Banakristo bananike ku Korinto. Wakalemba kuti: “Cintu eci ciyandisi tulicijisi munongo zyabulongo.” (2 Kor. 4:7) Paulo wakalisinizizye kaamba kuti: “Nkaambo kaako, mbuli mbutujisi eyi milimo . . . , tatulengaani mumyoyo.” (2 Kor. 4:1) Masimpe, mulimo ooyu mmuyumu kulindiswe toonse, tube bananike naa tube ba “mbelele zimwi,” pele tweelede kuzumanana kunookambauka makani mabotu ‘cakutalengaana mumyoyo.’ Tuyandika nguzu zizwa kuli Leza, uupa “inguzu zigambya.”—Joh. 10:16; 2 Kor. 4:7b.
3 Cikkomanisya ncakuti, ibunji bwa Bakamboni mbakambausi bankutwe nokuba kuti balakazigwa kapati, bamwi balaciswa-ciswa, naa kubula mali mabotu aakubagwasya. Toonse tweelede kuziba kuti imulimo wesu wakukambauka weendelezegwaa Jehova. Muciindi cakulekela kutyompokelwa naa kuyoowa kututolwaazya kukambauka, atuzumanane ‘kuyuma mu-Mwami amunguzu zyakwe zyipati.’—Ef. 6:10; Tus. 24:10.
4 Mbotunga Twajana Inguzu zya Leza: Amujatisye kukomba, kamulomba lugwasyo lwa Leza anguzu zyakwe. (Rom. 12:12: Flp. 4:6, 7) Mpoonya, camoyo woonse, amusyome muli Jehova kuti inga wamwaabila inguzi zigambya. (Tus. 3:5) Amubale makani aaluula bukkale bwababelesi bamazubaano mumamagazini eesu, nkaambo kayi oku kupa citondezyo cakuti nomuba mumazubaano, Jehova uli mukubagwasya balanda bakwe kukakatila akuzunda masukusyo. Atuyanzane lyoonse abakwesu mumbungano, alimwi tutaleki kujanika amiswaangano yambungano.—Rom. 1:11, 12; Heb. 10:24, 25.
5 Atucite mpotugolela kuti tube muciimo cakupegwa nguzu zya Jehova—inguzu zigambya alimwi zinga zyatugwasya kutalengaana mumulimo mupati kapati wakukambauka zyamakani aa Bwami.