Amubulemeke Busena bwa Jehova Bwakukombela
1 Ciindi notuswaya muŋanda yamuntu umwi, tulatondezya bulemu kumpasya zyamuntu oyo, tatuciti cintu cinga cazinyonyoona, alimwi tatusinkilizyi bubambe bwakucita zintu bwabaabo mbotwaswaya. Elo tweelede kulilemeka kwiinda waawa ciindi notuli beenzu ba Jehova! Tweelede kuziba mbotweelede kulilemeka notuli muŋanda yakwe. (Int. 15:1; 1 Tim. 3:15) Kwiina makani naa muswaangano wesu wa Bunakristo ucitilwa mu Ŋanda ya Bwami, muŋanda yamuntu, naa mubusena bwakubuleya, ibunji bwesu lyoonse tulatondezya bulemu kubusena bwesu nkotukombela katubulanga kuba mbuli ŋanda ya Jehova, walo uuwambwa kuti ‘ibulemu bwakwe bulainda nyika ajulu.’—Int. 148:13.
2 Ibakwesu bamwi tabatondezyi bulemu pe ciindi camiswaangano, balacita obo kwiinda mukuyobeka naa kutondezya muuya wakuti imakani aali mukwaambwa taali mapati. Ibapati bamwi balabandika mibandi iinyinaa mpindu mukkoce, muzimbuzi nokuba anze aa Ŋanda ya Bwami ciindi miswaangano noili mukucitwa. Ciindi mwana mupati napegwa mukuli wakulela mwana musyoonto, zimwi ziindi aba bobile inga batalika kusobana akuleka kubikkila maanu kupulogilamu, elyo kwiina nobajana mpindu. Miswaangano noyamana, ibakubusi bamwi balabonwa aanze aa Ŋanda ya Bwami kabasobana, kabayobeka kapati, bamwi mane balacita azisobano zyabasizibbakela. Iziindi zimwi balabanyonganya kapati ibantu bakkede munsi lyabo naa kunyonganya bweende bwamyootokala kuzwa mpiisiigwa nomuba mumugwagwa.
3 Mbokunga Kweelebwa Ikubula Bulemu: Ikuti bukombi bwesu katububona mbuli cintu cabulemu alimwi cisetekene, cakutadooneka kwiina notunga twayanda kunyonganya bamwi kwiinda mukuvwiya-vwiya, kulya, ikutafwuna maccungamu, ikulizya-lizya mapepa, ikuunka ntubili-ntubili kucimbuzi, naa lyoonse kumuka kumiswaangano. Ibazyali balaabulemu alimwi ibazi kusetekana kwaciindi eco kwiina nobazumizya bana babo ikubikka matombe akkaapeti naa acibuye, aazisani zyazyuuno, kubwaanda bwa Ŋanda ya Bwami naa aŋanda ciiyo cabbuku nkocicitilwa. Alimwi toonse cakutadooneka tulazumina kuti tazyeelede abuniini zintu zyacisapi, kukanana kwabufwubafwuba naa masesya aakucapa ciindi camiswaangano yesu.—Ef. 5:4.
4 Ikuti lyoonse katuyeeya ikaambo ncokuli miswaangano yesu ya Bunakristo, tuyakubona kuti swebo alimwi abana besu twatondezya bulemu bweelede kubukombi bwa Jehova mubusena mbotwakasala ‘ibwakatubotela.’—Int. 84:10.