Imulimo Uugwasilizyigwa a Leza
1 Mbasyoonto akati kababelesi ba Leza sunu ibayiide kapati, ibavwubide naa ibalaampuwo mubweende oobu bwazintu. Akaambo kaceeci, bantu bamwi tabaulemeki pe mulimo wesu. (Is. 53:3) Nokuba boobo, imulimo wakuyiisya Bbaibbele ngotucita waletela bantu banji luumbulizyo abulangizi munyika. Ino mbuti bantu buyo mbobakonzya kuzwidilila boobo? Bacikonzya kwiinda mukugwasilizyigwa a Leza. (Mt. 28:19, 20; Inc. 1:8) Imwaapostolo Paulo wakapandulula kuti: “Leza ulisalide zintu zifubafuba zyanyika kuti ausye insoni basongo, azyalo zintu zikompeme zyanyika Leza ulizisalide kuti ausye insoni basinguzu.”—1 Kor. 1:26-29.
2 Ibunji bwabaapostolo alimwi a Banakristo bamumwaanda wamyaka wakusaanguna bakali ‘bantu buyo abatakaiya.’ (Inc. 4:13) Nokuba boobo, bakali basicamba mumulimo wakukambauka makani mabotu, eelyo Jehova wakabalongezya mukusoleka kwabo. Nokuba kuti kwakali mampindamangobe alimwi akukazyigwa, ‘makani aa Jehova akazumanana kukomena akuzunda canguzu.’ Kunyina cakali kukonzya kuulesya mulimo nkaambo wakali kugwasilizyigwa a Leza. (Inc. 5:38, 39; 19:20) Mbocibede amazubaano. Nokuba kukazya kwabeendelezi balaampuwo kwakakilwa kulesya makani mabotu kuzumanana akusakana.—Is. 54:17.
3 Kutembaulwa Koonse Kuya kwa Leza: Sena icoolwe cakuba basimilimo ba Leza citupa kulisumpula? Peepe. Kaamba mulimo wa Bunakristo, Paulo wakalemba kuti: “Cintu eci ciyandisi tulicijisi munongo zyabulongo, kukutondezya kuti ezi inguzu zigambya zilazwa kuli-Leza, tazizwi kulindiswe tubeni pe.” (2 Kor. 4:7) Paulo wakalizyi kuti wakakonzya kubeleka mulimo wakwe akaambo buyo kanguzu nzyaakamupede Leza.—Ef. 6:19, 20; Flp. 4:13.
4 Aswebo tulizyi kuti nkaambo buyo ‘kakugwasigwa kuzwa kuli Leza’ imulimo wakukambauka ncouli mukuzwidilila. (Inc. 26:22) Kwiinda mumulumbe waambilizyigwa nyika yoonse, Jehova ulatubelesya munzila iigambya ikuzungaanya masi—icitondezyo cakupwaya kwalubeta kulaafwaafwi kucitika. (Hag. 2:7) Aboobo tulaacoolwe kapati kaka kuti tuli “basimilimonyina Leza” mukutebula kwakumuuya kupati!—1 Kor. 3:6-9.