Sena Mubona Buyo Ciwa?
1 Notucita mulimo wesu wakukambaukila buleya, inzila njotubalanga kusaanguna bantu inga yatupa kuti tweenke-enke kubakambaukila makani mabotu. Mucikozyanyo, ino inga mwacita buti kuti umwi muntu lyoonse umulanga aameso aabukali nomuswaya simukobonyina wakatondezya luyandisisyo mukasimpe? Umwi mucizi mupainiya iwakali muciimo eci wakayeeya kuti asikile mwaalumi oyu akubandika anguwe. Oyu mwaalumi wakaanzya mucizi calunyansyo. Pele cigambya ncakuti wakauswiilila mulumbe wa Bbaibbele, mpoonya calukkomano wakazumina kwiiya. Akaambo kakuti mucizi oyu taakalanga ciwa, oyu mwaalumi amukaintu wakwe bakakonzya kwiiya kasimpe.
2 Uumbi mucizi kusaanguna wakali kumuyoowa umwi musankwa wakajisi masusu malamfwu akaambo kaciwa cakwe, pele wakazumanana kumukambaukila asyoonto-syoonto ciindi cili coonse aboola kucintoolo nkwaakali kubelekela mucizi oyu. Mukusola-sola kwakwe Wakazwidilila, aboobo ooyu musankwa lino ngu Kamboni uubbapatizidwe. Ncinzi cinga catukasya kubukaa kuyeeya kuti bantu bamusyobo oyu tabakoomvwa?
3 Nkutobela Cikozyanyo ca Jesu: Jesu wakalizi kuti uyooaba buumi bwakwe kugwasya muntu woonse. Aboobo tanaakali kutyompezegwa aciwa cabamwi. Wakalizi kuti nobaba baabo batakali ampuwo mbotu inga bayanda kucinca kufwumbwa kuti bagwasigwa kabotu alimwi akukulwaizigwa. (Mt. 9:9-13) Wakasoleka kugwasya bantu bavwubi abacete boonse. (Mt. 11:5; Mk. 10:17-22) Tutalangi ciwa cabantu mbotuswaanganya mumulimo, eci cilatupa kuti tutaboni moyo wabamwi mubotu. (Mt. 7:1; Joh. 7:24) Ncinzi cinga catugwasya kwiiya cikozyanyo ca Jesu cibotu kapati?
4 Ikwiinda mukwiiya Bbaibbele, twabona kuti Jwi lya Leza lilijisi nguzu zyakucinca kuyeeya kwamuntu abukkale bwakwe alimwi abube bwakwe. (Ef. 4:22-24; Heb. 4:12) Aboobo tutayoowi muntu, tuzisiye buyo mumaanzaa Jehova walo uubona myoyo yabantu.—1 Sam. 16:7; Inc. 10:34, 35.
5 Ikutasala kwesu notukambaukila bantu bamisyobo yoonse makani mabotu, nobalibonya buti akutugwasye mumulimo mupati wakutebula uucitwa mumazuba aya aamamanino.—1 Tim. 2:3, 4.