Ikulibambilila Limwi—Katujisi Mbaakani Nzi?
1 Toonse tulayeeya kujatikizya makanzeesu aakumbele. Aabo ibajisi bulangizi bwakuponaa nyika balangila ciindi nobayoopona kukabe kutamani munyika ya Leza mpya yabululami. Pele kuli zintu zikonzya kutulesya kubaa bulangizi oobu mbotujisi. Tweelede kusoleka kapati kutegwa tuzumanane amilimo iijatikizya Bwami bwa Leza mubuumi bwesu alimwi akuti tutanyonganizigwi azisusi zyanyama.—1 Joh. 2:15-17.
2 Ibantu batabikkili maanu kuzintu zyakumuuya tabakonzyi kumvwisya mbaakani nzyobajisi bantu babikkila maanu kuzintu zyakumuuya. (1 Kor. 2:14) Ibamwi babeleka canguzu kutegwa balijanine mpuwo, nguzu naa buvwubi, pele swebo tubeleka canguzu kutegwa tujane lubono lwakumuuya. (Mt. 6:19-21) Ikuti naa twasola kucinca miyeeyo yesu kutegwa yeendelane ayeeyo njobajisi banabunji munyika kujatikizya buumi bwakumbele, sena inga twazizuzikizya mbaakani zyesu zyakumuuya? Muciindi cisyoonto buyo zintu zyaanyika zitakwe mpindu zilakonzya kupa kuti tubikkile maanu eesu oonse kulinzizyo. Mbuti mbotunga twalikwabilila kuli ceeci?
3 “Amulisamike Ziyanza zya-Mwami Jesu Kristo”: Inzila yomwe njotunga twabelesya ikubona naa buumi bwesu buleendelezyegwaa milimo ya Bwami njakulingula makani ngotubandika. Sena lyoonse tubandika buyo zyazintu zyakumubili alimwi azintu zyaanyika zitakwe mpindu? Ikuti kakuli boobo, tweelede kulilanga-langa ikubona naa tucibikkila maanu kuzintu zyakumuuya. Ambweni tuyandika kubikkila maanu kapati ‘kukulisamika ziyanza zya Mwami Jesu Kristo akutayeeya kucita zisusi zyanyama.’—Rom. 13:14.
4 Ibakubusi balakonzya ‘kulisamika ziyanza zya Kristo’ kwiinda mukulibambilila limwi kabutanasika buzuba nobayootalika mulimo waciindi coonse. Mukubusi umwi iwakali kuyanda kubeleka mulimo wabupainiya bwaciindi coonse wakakomenena muciinga mwalo mocakali ciyanza buya kubakubusi ikulijanina mali manji. Aboobo wakanjila mukucita makwebo mane wakasikaa ciimo cakuti ikujanika kumiswaangano alimwi akutola lubazu mumulimo cakaba cakwiinzya buyo mulawo. Mukuya kwaciindi naakabikka lusyomo lwakwe mumajwi aa Jesu aali kuli Matayo 6:33 akucileka kucita milimo iiminya, wakatalika mulimo waciindi coonse. Kwalino ulijisi manjezyeezya mabotu, ubelekela Jehova kweelanaa mbwaamba mwini, ‘ulacita oobo anguzu zyakwe zyoonse.’
5 Ibbaibbele lyaamba kuti, ncamaanu ikulibambila limwi kujatikizya buumi bwakumbele. (Tus. 21:5) Toonse atucite oobo katubikkide kuyanda kwa Leza kumbele.—Ef. 5:15-17.