Bubotu Bwamumulimo Waciindi Coonse
1 Mbwaanga mucili bana, tacidoonekwi buya kuti mwakasala kale mbuli buumi bwanu bwakumpela mbomubuyanda kuti bukabe. Ibbuku lya Tusimpi 21:5 litwaambila kuti: “Makanze aabasungu alaleta zilyo zinji.” Ciyakugwasya ikuti naa mwabikkila maano kwiinda mukusala kabotu mbaakani mubuumi bwanu. Eelyo nomuli mukuyeeya ncomuya kucita mubuumi bwanu bwakumpela, mulakonzya kubikilizya amulimo waciindi coonse. Nkaambo nzi?
2 Amubabuzye aabo ibakacita bupainiya bwaciindi coonse nobakacili bana, mulamvwa zintu zyibotu zyikozyene nzyobakajana mumulimo ngweena ooyu. Umwi wabaabo wakati: “Eeyo yakali myaka iinda kubota mubuumi bwangu!” Mukwesu umwi wakali kkomenyi mumulimo waciindi coonse kuzwa kubwana, wakaamba boobu naakakomena: “Cilandipa kukkomana nondiyeeya mazuba aamusyule nondakacili mukubusi alimwi ndilakonzya kwaamba kuti ndakalumvwida lulayo lwakuti: ‘Koyeeya Mulengi wako mumazuba aabulombe bwako.’” (Muk. 12:1) Eeci nciindi ncomuyandika kuyeeya kabotu nywebo alimwi abazyali banu akumujanina nzila mbotu kutegwa mukkomane kuciindi cabukubusi bwanu.
3 Nobazyali, Amubakulwaizye Kuba Mumulimo Waciindi Coonse: Jehova mbwali muzyali uulanganya, ulatondezya nzila iini-ini njomweelede kutozya. (Is. 30:21) Mbuli mbwapa busolozi bwaluyando buli boobu, ulapa cikonzyanyo cibotu kulindinywe nobazyali Banakristo. Muciindi cakwiile kulekela bana banu akuti balisalile nzila yabo beni, cabusongo amubayiisye nzila njobeelede kutozya kutegwa bajane zyilongezyo zya Jehova. Eelyo baakukomena, luyiisyo lwanu luyakubagwasya “kusala cibotu [a]cibi.” (Heb. 5:14) Kweelana aluzibo lwabo bapati ndobajisi, balizyi kuti tabakonzyi kulisyoma lyabo beni pe; beelede kusyoma muli Jehova kutegwa beende munzila zyiluleme. (Tus. 3:5, 6) Eeci ciyandika ikapati kubakubusi balo batajisi luzibo lunji.
4 Nobazyali, ciindi myaka yabana banu noilondelela kusika kumyaka yabukubusi ambweni buya kiitanasika, amwaambaule ambabo kujatikizya makanze aabo. Bapati bazikolo, bamayi alimwi ambociiya limwi mucikolo baya kusoleka kubacenga bana banu kutegwa basale zintu zyakumubili zyakunyika. Amubagwasye bana banu kusala ziiyo kucikolo izyigwasya kutegwa bazulile akuti kabakonzya kujana zyakumubili zyeelede akutanyonganya zintu zya Bwami. (1 Tim. 6:6-11) Muziindi zinji, ikuba alwiiyo lusumpukide kubikkilizya alwiiyo luyandika kubeleka mulimo naa kwiiya mulimo, cilakonzya kuba ncecintu ciyandika kuti muntu akonzye kuligwasya eelyo natalika mulimo wabupainiya bwaciindi coonse.
5 Amubakulwaizye bakubusi kuti bazumanane acipego cakutakwatwa naa kukwatwa. Caakusika ciindi cakukwata naa kukwatwa, bayakuba bantu bakonzya kweendelezya twaambo twamulukwatano. Ikwiinda mukwaamba cakusinizya kujatikizya mulimo wabupainiya, mumasena muyandika lugwasyo, kubelekela ku Beteli alimwi amulimo wakukambauka, kamuzyaamba kubana banu bakubusi kufwumbwa kabacili amyaka misyoonto kutegwa kabajisi luyandisisyo lwakukkomanisya Jehova mubuumi bwabo, akugwasya bamwi alimwi eeci ciyoobapa kukkomana.
6 Nobakubusi, Amubikke Mulimo Waciindi Coonse Mubusena Bwakusaanguna: Nobakubusi, mweelede kuba aluyandisisyo akubona mulimo wabupainiya mboubede. Mulakonzya kuusola kwaciindi buyo cisyoonto kwiinda mukucita bupainiya bwakugwasyilizya kufwumbwa nocakonzyeka mazuba oonse acikolo aamwaka alimwi aciindi nomujala zikolo. Eelyo nomuya kuzyiba bubotu mboujisi mulimo ooyu wabupainya! Sena inga mwakonzya kuliyeeya ciindi kaciliko kutegwa mukacite bupainiya bwakugwasyilizya mwezi uuboola?
7 Ikuti koli mukwesu uucili mwana-mwana mumbunga ya Leza, amucibikke mumizeezo kutegwa musike azyeelelo ziyandika zyakuba mukutausi. (1 Tim. 3:8-10, 12) Kuyunguzya waawo, mwaakukkwanya myaka yakuzyalwa iiyandika, inga mwalembela kumulimo waku Beteli naa kunjila Cikolo Cakwiiya Mulimo. Ziya kumucitikila mumulimo wabupainiya, ziya kumugwasya mbuli kucita zintu kweelena amulongo wanu, kweenda aciindi, mbomukonzya kupona kabotu abantu alimwi ambomukonzya kuunyamuna mukuli. Zyoonse eezyi ziyoomugwasya mukulibambila kucoolwe cipati camulimo kumazuba aazya kumbele.
8 Icintu cipati mukuzwidilila mulimo waciindi coonse nkuba amuuya mubotu wateokrasi wakubeleka canguzu. Mwaapostolo Paulo wakaukulwaizya muzeezo ooyo alimwi wakabwaamba bubotu bukonzya kujanwa naakati: “Kufumbwa cintu ncimucita, milimo yanu ibe yamoyo woonse, ibe mbuli milimo iicitilwa [Jehova], . . . Nkaambo mulizi kuti [kuli Jehova] nkomuzootambula bulumbu.” (Kol. 3:23, 24) Jehova amuleleke kutegwa kamukkomenyi lyoonse mumulimo wanu waciindi coonse!