Bakamantenyi a Jehova Alimwi a Mwanaakwe Cakukondwa
Mulalilo Waamwaka Uuyandika Kapati Uyakucitwa mu March 28
1 Kwiinda mukujanika ku Mulalilo wa Mwami lyaakubbila buyo zuba mu March 28, 2002, tuyootondezya kuti tuli kamantenyi a Jehova Leza alimwi a Jesu Kristo. Mubuzuba mbweena oobo bwaalubazu, bananike Banakristo baya kukkomana “[mu]luswanaano” ndobajisi abasikulelanyina mu Bwami, a Wisi alimwi a Mwaanakwe. (1 Joh. 1:3; Ef. 1:11, 12) Tuulunzuma “[twa]mbelele zimwi” baya kuzinzibala kuyeeya coolwe cabo citaliboteli cakukamantana a Jehova alimwi a Mwaanakwe, ikuba amoyo omwe amuzeezo omwe mukumaniizya mulimo wa Leza!—Joh. 10:16.
2 Kubeleka Antoomwe Calukamantano: Jehova alimwi a Jesu lyoonse balikamantenyi. Balikamantenyi kwaciindi cilamfwu katanalengwa muntu. (Mik. 5:2) Eelyo luyando lwini-lwini lwakatalika akati kabaaba bobilo. Ibusongo nibwakazyi kulitondezya kali muciimo camuntu, ooyu Mwana mutaanzi kuzyalwa katanaba muntu uulya maila wakati: “Ndakali ambali lyakwe [Jehova] mbuli mwana wakwe, ndakali muyandwi wakwe mazuba oonse, ndakali kusekelela lyoonse kubusyu bwakwe.” (Tus. 8:30) Ikupona kwamyaka iitabaliki calukamantano ayooyo Wakatalisya luyando, eeci cali cintu cikkomanisya ku Mwana aa Leza!—1 Joh. 4:8.
3 Kumwi kajisi muzeezo wakunununa bantu, Jehova wakasala Mwaanakwe simuzyalwaalikke walo wakali kuyandisisya bantu kutegwa cibe cipaizyo akuti tujane bulangizi. (Tus. 8:31) Mbweena mbuli Jehova alimwi a Mwaanakwe mbobakamantenyi mukubeleka mulimo, andiswe mbweena tulazumanana kubelekela antoomwe ambabo kumwi katutondezya luyando kuli umwi aumwi akubeleka katukamantenyi calukkomano mukucita luyando lwa Leza.
4 Ikulumba Camoyo Woonse: Kwiinda mukujanika ku Ciibalusyo alimwi akuswiililisya kumwi katutondezya bulemu, tulakonzya kulumba kuluyando lwini-lwini lwa Jehova alimwi acipaizyo ca Mwanaakwe ncaakatucitila. Cikonzyanyo cibotu ca Jesu ciyootondezyegwa, cakusyomeka kwakwe kusikila kulufwu akupa cinunuzyo alimwi bulelo bwakwe kali Mwami wa Bwami bwa Leza bubikkidwe alimwi azilongezyo Bwami nzyobuyooleta kubantu. Alimwi tuya kuyeekezyegwa mbociyandika kuzumanana kuba alusyomo lyoonse, kubeleka cabusungu antoomwe kweelana aluyando lwa Jehova katuli “basikubelekanyina mumilimo yalusinizyo.”—3 Joh. 8; Jak. 2:17.
5 Ikugwasya Bantu Ikutegwa Tubelekele Antoomwe: Ikabunga kabaalu keelede kusoleka canguzu kukulwaizya Bakamboni batacisungweede mucilawo cabo kutegwa bakajanike ku Ciibalusyo ca Lufwu lwa Kristo. (Mt. 18:12, 13) Amulembe mazina abaabo baya kutambwa kutegwa kutakabi uuya kwiindwa ambali.
6 Sena kuli mbomuzyi bakonzya kuboola ku Ciibalusyo? Cabusongo, amubakulwaizye kutegwa bakajanike kuciibalusyo. Amubatambe alimwi kamubasamausya kutegwa bazyibe kuti abalo balayandika. Atubeleke canguzu mukutamba bantu kuciibalusyo eeci ciyandika kapati camwaka, mbotwiiya limwi Bbaibbele alimwi abajisi luyandisisyo, bamukwasyi wesu alimwi ababaya mbotuyaanya naa mbotuzyi. Impindu yacinunuzyo eeci njabantu boonse bayiiya “cintu eci ciinda loko kubota cakuziba Jesu Kristo.” (Flp. 3:8) Aabo basyoma mucipaizyo ca Kristo, balakonzya kuba abulangizi bwakujana buumi butamani.—Joh. 3:16.
7 Mutacuubyi-ubyi Ciibalusyo cilakonzya kubagwasya aabo basinizyide. Myaka yobilo yainda kunsumbu yaku Papua ili ku New Guinea, ibantu balaaluyandisisyo bali 11, bakeenda mubwato busyoonto kwamawoola aali 17 mulwizi lwakali amayuwe manji ikutegwa bakajanike. Nkaambo nzi? Bakati: “Twakali kuyanda kuti tukajanike ku Ciibalusyo ca Kristo antoomwe abakombima ba Jehova; nkakaambo kaako lweendo oolu lwakali kuyandika kapati.” Amuyeeye buyo mbubakasungweede aabo bakajisi luyandisisyo alimwi akulumba nkobakaba aankuko kwiinda mukukamantana a Jehova, Mwaanakwe alimwi ababunyina bwa Bunakristo!
8 Amubaambile kuti inga baba aciiyo ca Bbaibbele boonse aabo batondezya luyandisyo. Amubayumye-yumye kuti kabajanika lyoonse kumiswaangano yambungano alimwi akwaambila bantu kasimpe nkobayiya. Amubagwasye kuti ‘kabeenda mumumuni’ alimwi amukasimpe kwiinda mukubelesya njiisyo zya Bbaibbele mubuumi bwabo. (1 Joh.1:6, 7) Amubagwasye kuti babe acilongwe a Jehova alimwi akulumba lyoonse kucoolwe eeci citaliboteli cakucita luyando lwakwe calukamantano.
9 Tulaacoolwe kaka cakukamantana “[mu]muzeezo omwe mulagwasyanya kukwabilila lusyomo ndomujisi mu Makani Mabotu.” (Bafi. 1:27, 28, Ci) Eelyo toonse atukulangile kuyanzana ooku kutaliboteli kuya kuba ku Ciibalusyo mu March 28, katulumba lyoonse kuli Jehova alimwi a Mwaanakwe!—Lk. 22:19.