Amube Bantu Babandika!
1 Ikutegwa tuzuzikizye mulimo ngotupedwe wakukambauka alimwi akugwasya bantu kuba basikwiiya, tweelede kubandikila bamwi makani. (Mt. 24:14; 28:19, 20) Nokuba akati kabalongwe, kubandika zimwi ziindi kulakonzya kuba cintu cikatazya. Ino ncinzi cikonzya kutugwasya kwaabandika kabotu imakani mabotu abantu mbotutazyi?
2 Amulitondezye Kuba Balongwe Kutali Beenzu Buyo ku Mwini Ŋanda: Amusole kulibikka muciimo cabantu aabo mbomusikila nomuli mumulimo wamumuunda. Akaambo kazintu zicitika munyika sunu, kuli twaambo tubotu tukonzya kupa kuti bamwi batalike kulibilika nokuba kuyoowa beenzu. Eeci cilakonzya kutyompya mubandi. Ino mbuti mbomukonzya kuzwidilila mukugwasya baabo ibanga baliyoowede ciindi cakusaanguna nomubasikila? Katutanaamba jwi lili loonse tweelede kuti katulibonya kabotu munsamino alimwi a mukulibamba kwesu. Ikusama kabotu alimwi akulilemeka kwesu kubotu kulakonzya kucesya kuyoowa ibantu nkobakonzya kubaankuko.—1 Tim. 2:9, 10.
3 Acimbi cikonzya kugwasya kutegwa mubandike kabotu nkukanana cakulikwaya alimwi akuba balongwe. Eeci cipa kuti bamwi balimvwe kwaanguluka alimwi akubapa kuti baswiililisye. Aboobo kulayandika kapati kulibambila. Twanoozizyi kabotu nzyotuya kwaamba, tulakonzya kuba bantu bakkalikenyi. Alimwi ikuliiba kuli boobu mumizeezo kuyoopa kuti bamwi baukkomanine mulumbe wesu. Mboobu mbwaakaamba mwanakazi umwi kujatikizya Kamboni wakamuswaya wakati: “Icintu ncondiyeeya kumwanakazi ooyu Kamboni, wakali kulibonya kukkomana alimwi tanaakali kulibonya kuba sinkondo. Aboobo ndakaba aluyandisisyo kapati.” Eeci cakapa kuti mwanakazi ooyu aswiilile makani mabotu.
4 Bube Ibupa Kuti Bantu Baswiilile: Tweelede kubabikkila maano kapati bantu bamwi. (Flp. 2:4) Inzila imwi mbotunga twacicita eeci nkwiinda mukubapa ciindi bamwi cakutola lubazu mumubandi. Kayi kubandika kulabikkilizya akuswiilila. Eelyo notubapa ciindi baswiilizi cakwaamba mbobayeeya alimwi akuswiililisya nobabandika, balabona kuti tulababikkila maano. Aboobo ciindi bamuswiilila nobali mukukanana, tamweelede kufwambaana kupilukila kumakani aanu ngomulibambilide pe. Amubalumbaizye ikuti kamukonzya kucita boobo cakusinizya alimwi akusola kweendelanya twaambo twanu aamakani ngobaamba. Ikuti twaambo ntobakanana katutondezya kuti kuli cimwi cintu ncobabikkilide kapati maano, amucince mubandi wanu kutegwa weendelane atwaambo ntobayandisisya kumvwa.
5 Kubaa moyo mubombe alimwi akulicesya kupa kuti kacitakatazyi kubandika abantu. (Tus. 11:2; Inc. 20:19) Ibantu bakakwelelezyegwa a Jesu akaambo kakuti wakali ‘mubombe alimwi mutete moyo.’ (Mt. 11:29) Kulubazu lumbi, kulisumpula kulakonzya kupa kuti bantu batutantamuke. Aboobo, nokuba kuti tulisinizizye kapati kuti tulikajisi kasimpe, tatweelede kukanana cakulisumpula pe.
6 Ino ncinzi cikonzya kucitwa ikuti naa zintu nzyakanana muntu kazitondezya lusyomo luteendelani ancoliyiisya Bbaibbele? Sena tuleelede kumululamika? Inzya, mukuya kwaciindi tweelede kucita oobo, pele tatweelede kusola kumululamika notwamuswaya ciindi cakusaanguna. Ikanji-kanji cilagwasya kapati kukanana zintu nzyotuzuminana abaswiilizi besu katutana kubayiisya njiisyo zya Bbaibbele eezyo zikonzya kubayumina kuzizumina. Kucita boobo kuyanda kukkazika moyo alimwi abupampu. Paulo wakapa citondezyo cibotu mumakani aaya naakali kukambaukila babetesi munkuta yaku Areopagi.—Inc. 17:18, 22-31.
7 Icipati kwiinda zyoonse, luyando lwini-lwini luyootugwasya kucizyiba kabotu kubandika. Mbubwenya mbuli Jesu, tweelede kubafwida luzyalo bantu aabo ‘bakatede akumwaika mbuli mbelele zitakwe mweembezi.’ (Mt. 9:36) Eeci cilatukulwaizya kubatolela makani mabotu alimwi akubagwasya kweenda mumugwagwa uusololela kubuumi. Mulumbe wesu ngwaluyando, aboobo tweelede kuzumanana kuukanana munzila yaluyando. Kwiinda mukucita boobo, twiiya Jehova Leza alimwi a Jesu Kristo Basikubandika bahaazibwene mububumbo boonse.