Ikugwasyigwa Kapati a Muswaangano Wacooko wa “Basikwaambilizya Bwami Ibasungu”
1 Ipulogilamu Iikulwaizya: Elo yakali kukulwaizya kaka ipulogilamu njotwakajisi ino-ino amuswaangano wacooko! Ikaambo kapati ncotwakabunganina antoomwe nkakuti, tuzulile kabotu mukwaambilizya cabusungu Bwami bwa Leza. Sena muliyeeyede mwaambi wakusaanguna mbwaakalipandulula bbala lyakuti “kwaambilizya”? Sena mulikuyeeyede kuvwuntauzya nkotwakakulwaizyigwa kucita mumakani aakuti, “Tutayoowi Nkaambo Tulizyi Kuti Jehova Ulaandiswe”? Ino mmakani nzi meni-meni aabuumi bwabantu ngomwakalanga-langa kale?
2 Imakani aakusiilana aajisi mutwe wakuti, “Ikuyuma kwa Lusyomo Lwesu Kulasunkwa Amasukusyo Aamisyobo-Misyobo” akapa twaambo tupati totatwe Jehova ncazumizya kupenzyegwa. Sena mulakonzya kutupandulula? Ino ntwaambo nzi twamu Magwalo itutondezya ikaambo Banakristo ncobateelede kutola lubazu mutwaambo twacisi? Ino twakakulwaizyigwa kuti tweelede kucita nzi kujatikizya kulibambila mapenzi aaboola akaambo kakutatola lubazu mutwaambo twacisi? Ino mbuti kuliyumya kwesu cakusyomeka mumasunko mbokutembaula Jehova?
3 Ino nzyibeela nzi mucisobano cakuti “Amwiime Cakutazungaana Muziindi Zikatazya” zyakamukulwaizya kapati? Ino mbuti mbotukonzya kuba mbuli Jeremiya?
4 Mumakani aabuleya aakuti “Iziyanza Zyanyika Eeyi Zili Mukucinca,” ino akapandulula ikucinca kuli buti kupati ikuyoocitika kumbele alimwi ikusololela kubuzuba bwa Leza ibuyoosya? Iciindi nomwakali kuswiilila kumakani aamamanino aakuti, “Amuzumanane Kubeleka Milimo Mibotu Mbomuli Basikwaambilizya Bwami Basungu,” mbuti mbomwakeendelanya makani aaya kumulimo wanu wamumuunda?
5 Twaambo Tupati-Pati Itweelede Kutobelwa: Mbuli mbokwakapandululwa mumakani aakuti, “Amube Amyoyo Yakulumba,” ino mbuti mbotukonzya kutondezya kulumba amoyo woonse kuli Jehova? Ino mbusungu bwani mbotwakakulwaizyigwa kutobela mumakani aantalisyo aakuti, “Basikwaambilizya Bwami Ibasungu”? Ino nkulilingula kuli buti nkotwakakulwaizyigwa kucita?
6 Ino makani aakusiilana aakuti, “Businsimi bwa Mika Butuyumya Kuzumanana Kweenda Muzina lya Jehova,” akatondezya zintu nzi zyotatwe iziyandika nzyotweelede kuzuzikizya kutegwa tutambulwe kuli Jehova? Sena cilakonzyeka kuzizuzikizya zintu eezi? (Mik. 6:8) Mbuli mbokwakaambwa mumakani aakuti, “Amuzumanane Kulilemeka Mumakani Aakoonana Kwiinda Mukukwabilila Moyo Wanu,” ino muumbazu zili motweelede kuzumanana kupona buumi busalala? Ino mmuumbazu nzi makani aakuti, “Amulucenjelele Lweeno” mwaakatucenjezya kutegwa tuteenwi naa kweena bamwi?
7 Ino ntwaambo nzi tugwasya tomwakatalika kale kubelesya mumulimo wanu kuzwa kumakani aakusiilana aakuti, “Basikwaambilizya Bwami Ibaukkomanina Mulimo Wabo”? Ibbuku lya Ba-Filipi 4:8 lyakalangwa-langwa mumakani aakuti, “Mibandi Yamakani Aakumuuya Ilayaka.” Ino mbuti lugwalo oolu mbolutugwasya kusololela mibandi yesu kutwaambo twakumuuya, alimwi ndiilili notweelede kucita boobo?
8 Imakani aakuti, “Amusyome Jehova Cakumaninina Muzyiindi Zyamapenzi” akabandika mbotukonzya kuliyumya notwacitikilwa ntenda, kubula mali, kuciswa-ciswa, mapenzi aamumukwasyi alimwi anotulubizya ciindi aciindi. Ino mbuti mbotukonzya kutondezya lusyomo muli Jehova notuli mubukkale buli boobu?
9 Izipego Zyakumuuya Zipya: Twakakkomana kapati kutambula bbuku lipya lyakuti, Amukombe Leza Mwini-Mwini Uuli Alikke. Ino mbuti kwaambilizya kwakapegwa kujatikizya mboliya kubelesyegwa bbuku eeli mbokwakamujatikizya? Ino nkaambo nzi ncoliya kutugwasya mumulimo wesu wakugwasya bantu kuba basikwiiya kalili bbuku lyabili lyakwiiya?
10 Alimwi twakatambula bbuku libotu lyakuti, Amubaa Cilongwe a Jehova. Ino lijisi zibeela nzi zimwi zibotu? Ino nzitondezyo nzi nzyomuyandisya kapati? Sena kulibala bbuku eeli kwamugwasya kubaa cilongwe a Jehova? Ino mbaani bambi ibakonzya kugwasyigwa abbuku eeli?
11 Muswaangano Wacooko wa “Basikwaambilizya Bwami Ibasungu,” wakatukulwaizya munzila yakumuuya iiyandika kutegwa tuliyumye muziindi eezi zikatazya. Ikutegwa tugwasyigwe kapati kububambe bwakumuuya oobu butaliboteli, atusoleke kapati kuziyeeya zintu zyakaambwa, ikuzilumba zintu nzyotwakatambula alimwi akuzitobela zintu nzyotwakaiya. (2 Pet. 3:14) Ikucita boobo kuyootuyumya kuzumanana kusyomeka alimwi akuba basikwaambilizya Bwami basungu, ikwiiya Mwami wesu Jesu Kristo, akucita zintu zyoonse kuti kube bulemu kuli Jehova.—Flp. 1:9-11.