Sena Mulazyibelesya Nzyomwakaiya Kumuswaangano Wacooko wa “Bamayi ba Jwi lya Leza”?
1 Kufwumbwa wakajanika kumuswaangano ooyu wacooko wamwaka uuno, ulakonzya kubona kuti bantu ba Jehova balilibambide kuzuzikizya mulimo wabo wakuba bamayi ba Jwi lya Leza. (Mt. 28:19, 20) Ciindi nimwakajokela kumunzi, ino twaambo nzi tupati-pati twamalailile tumwaakanzide kubelesya mubuumi bwanu alimwi amumulimo?
2 Imagwalo Aakasololelwaa Muuya Alagwasya Mukuyiisya: Mutwe wabuzuba bwakusaanguna wakali kwaamba ibbuku lya 2 Timoteo. 3:16. Makani aantalisyo akatondezya kuti, ikutegwa ‘Tuzulile Katuli Bamayi ba Jwi lya Leza,’ Ijwi lyakwe tweelede kulisumpula, kulilemeka kwiinda muzeezo wamuntu naa zilengwa zyabo alimwi akulibelesya lyoonse cakusyomeka. Tweelede kuti lyoonse katupailila muuya uusalala kutegwa kuutugwasya mumulimo wesu alimwi akuyandaula mucelo wawo—iluyando. Alimwi tweelede kuzumizya mbunga ya Jehova yaanyika kuti ituyiisye katuli basimilimo mumiswaangano yoonse yambungano.
3 Makani aakusiilana aakuti, “Ikuliyiisya Tobeni Eelyo Notuyiisya Bamwi,” akapandulula kuti tweelede kubaa cikonzyanyo cibotu (1) mukuccilila milawo ya Leza mumbazu zyoonse zyakulilemeka kwa Bunakristo, (2) mukuzumananaa cilengwa cibotu cakuliyiisya alimwi (3) akuzwisya mizeezo mibi mumoyo yalo Diabolosi njakonzya kubelesya. Citobela, twakayiya nzila zyibeleka mbuli mbotukonzya kukwabilila mikwasyi yesu kuteebelela zintu zyanyika ziletela muzeezo wakoonana. Bazyali bakakulwaizyigwa kuba cikonzyanyo cibotu cakutabbida kulanga zintu zijatikizya koonana alimwi akulanga-langa bana babo mbuli mbobabelesya Internet alimwi azyeezyo nzyobeebelela acipekupeku. Ino twaambo nzi tuzwa mupulogilamu yakusaanguna ntomwakatalika kale kubelesya?
4 Makani aamamanino aabuzuba oobo akatugwasya kukkomanina mumuni wa Jehova ikuba afwiifwi a Leza wabana Israyeli alimwi akuya ampela mukusumpula luumuno lwabantu ba Jehova. Sena mwakalibala bbuku lipya lyakamwaigwa lya Isaiah’s Prophecy—Light for All Mankind II?
5 Ibakonzya Kuyiisya Bamwi: Lugwalo lwamutwe wabuzuba bwabili lwakali lwa 2 Timoteo 2:2. Nomwakali kuswiilila kumakani aakusiilana aacifwumofwumo, sena mwakaamvwa malailile aakapegwa mbuli mbotukonzya (1) kulangaula beelela (2) kubusya luyandisisyo lwabo alimwi (3) akubayiisya kuti bajatisye makani woonse Kristo ngaakalailila? Sena mulazyibelesya eezyo nzyomwakaiya—akutondezya bamukamwini ŋanda kaambo kamu Magwalo kutegwa mukajane aakutalikila lweendo luboola?
6 Ipulogilamu yakumazuba yakaambisya bubotu bwakwiiya Mwiyi Mupati, Jesu. Ino muunzila nzi momusoleka kutegwa mube mbulinguwe? Kuzwa kuli zyeezyo nzyomwakaiya mumakani aakusiilana aabuzuba bwabili, ino mbuti mbomulimvwa ikuti mulakonzya ‘Kugwasyigwa Kapati Alwiiyo lwa Teokrasi’? Ino twaambo nzi tomwakabelesya kutegwa kamucikonzya kubikkila maano ciindi nomuliyiisya alimwi anomuli kumiswaangano yambungano?
7 Cakutadooneka, ibbuku lipya lya Amugwasyigwe Alwiiyo Lupegwa Kwiinda Mucikolo Camulimo Weendelezyegwaa Leza liyootugwasya kuba bamayi ibambaula kabotu Ijwi lya Leza. Ikuba baambi babotu mbuli bwakali babelesi basyomeka ba Leza bakuciindi ca Bbaibbele, eeci ncecibeela cipati ciyoobikkilwa maano. Ciiyo aciiyo mubbuku eeli lipya cilijisi kabeela katondezya ncotweelede kucita, ncicaabikkilwa alimwi ambomukonzya kucita. Twaambo tubeleka tulibikilizyidwe. Ibacizi bana kujisi zibeela zili 29 mwalo mobanakujana twaambo ciindi nobalibambila makani aabo. Kwaakwiinda ciindi cili mbocibede, kuyooba kwaambilizya kujatikizya kucinca mbocinakweendelezyegwa cikolo. Sena mulizyibilide kubala alimwi akulibambila kutegwa kamugwasyigwa bweelede Mucikolo Camulimo Wateokrasi nsondo ansondo?
8 Amube Bamayi Akaambo Kaciindi: Mubuzuba bwatatu lugwalo lwa Ba-Hebrayo 5:12, lwakabagwasya baswiilizi kuswiililisya. Makani aakusiilana aamafwumofwumo aakuti, “Ibusinsimi bwa Malaki Butugwasya Kulibambila Buzuba bwa Jehova,” akatukulwaizya ikubelekela Leza camoyo woonse alimwi akusula njiisyo zyoonse zyabasiluleyo ikutegwa tukafwutuke mubuzuba bupati bwa Jehova alimwi ibuyoosya kapati. Icisobano camutwe wakuti, “Amubulemeke Bweendelezi bwa Jehova,” cakutainda ambali cakatutondezya mbuli kulisumpula, kuyandisisya kucita cintu kutali mumulawo, munyono alimwi akunyongana kwalusyomo lwa Kora wansiku alimwi abeenzinyina cakabapa kuzangila Jehova buya kumugama. Makani aakazyi kuccilila akaambisya kujatikizya kulibombya kubweendelezi bwa Leza kuzintu ziyandika kapati mazubaano mumukwasyi alimwi amumbungano. Makani aabuleya akuti, “Mbaani Bali Mukuyiisya Bantu Kasimpe Mumasi Oonse?” akapa bumboni buzwide bwakuti Bakamboni ba Jehova balacita oobo kwiinda Kristendomu iile kulitaminina buyo kuti iyiisya kasimpe kamu Bbaibbele.
9 Masimpe, Jehova uli mukutuyiisya kutegwa tube basikuyiisya Jwi lyakwe bali kabotu. Atuzyibelesye eezyo nzyotwakaiya, ‘Katulibikkila maano tobeni alimwi akufundisya kwesu, kutegwa swebo alimwi abaabo batuswiilila tukafwutuke.’—1 Tim. 4:16.