Imulimo Wesu wa Bunakristo Ngomulimo Mupati
1 Toonse tulijisi milimo iindene-indene njotweelede kucita. Ikubajanina zyobayandika banamukwasyi, mulawo uuzwa kuli Leza. (1 Tim. 5:8) Nokuba boobo, imulawo ooyu taweelede kuba nguwo uuyandika kapati kwiinda mulimo wa Bwami wakukambauka alimwi akugwasya bantu kuba basikwiiya.—Mt. 24:14; 28:19, 20.
2 Jesu wakatupa cikonzyanyo cakuti tutobele ‘icakusaanguna kuyandaula Bwami.’ (Mt. 6:33; 1 Pet. 2:21) Nokuba kuti wakajisi buyo zintu zisyoonto zyakumubili, wakali lisungude kapati kucita kuyanda kwa Wisi. (Lk. 4:43; 9:58; Joh. 4:34) Wakalyaaba mukupa bumboni kufwumbwa ciindi ncaakajana. (Lk 23:43; 1 Tim. 6:13) Wakakulwaizya basikwiiya bakwe ikuuyandisya mulimo wakutebula.—Mt. 9:37, 38
3 Ikwiiya Jesu Sunu: Tulakonzya kwiiya cikozyanyo ca Jesu kwiinda mukusoleka kupona buumi buuba-uba ibugaminide kumulimo wa Bunakristo. Ikuti katujisi zintu zyakumubili ziyandika, atutobele lulayo lwa Bbaibbele lwakutazumanana kuyandaula zintu azimbi zyamunyika eeyi. (Mt. 6:19, 20; 1 Tim. 6:8) Elo kaka inga cainda kubota ikujana nzila mbotukonzya kutola lubazu ciindi cilamfwu mumulimo wabukambausi! Ikuti twajana buyumu-yumu, atutobele bwakacita Jesu. Tutalekeli mapenzi kuti asinkile mulimo wesu mupati wakwaambilizya makani mabotu aa Bwami.—Lk 8:14; 9:59-62.
4 Nobaba baabo bajisi mikuli minji, balaubikka ambele mulimo wabukambausi. Imukwesu uumwi uujisi mukwasyi mupati, iwakali kubeleka mulimo mupati wakumubili alimwi kaali mwaalu mumbungano ya Bunakristo, wakati: “Imulimo wamumuunda nduubona kuti ngomulimo mupati.” Imucizyi mupainiya wakati: “Imulimo wabupainiya ulainda milimo yoonse mibotu yakumubili.”
5 Kufwumbwa bukkale motukonzya kuba, atutobele cikozyanyo ca Jesu. Munzila nzi? Kwiinda mukubona mulimo wa Bunakristo kuti ngomulimo mupati.