Ipulogilamu Mpya ya Muswaangano Wabbazu
1 Simaleleesu wakasinsima kuti basikwiiya bakwe bayoojana mapenzi. (Mt. 24:9) Ino mbuti mbotweelede kwaalanga masukusyo? Ino ncinzi ciyootugwasya kuliyumya notuli mumapenzi? Ipulogilamu yamuswaangano wabbazu yamumwaka wamulimo wamu 2004, iyooyingula mibuzyo eeyi. Ijisi mutwe wakuti: “Amube Abulangizi Cakukondwa, Alimwi Amukakatile Nikuba Kuciindi Camapenzi.”—Rom. 12:12.
2 Zibeela Zyobile Zyamakani Aakusiilana: Cibeela cakusaanguna camakani aakusiilana, icijisi mutwe wakuti, “Amuzyale Micelo Cakuliyumya,” ciyoolanga-langa nzila mbotuzyala micelo. Basikumwaya bali mbobabede bayoobuzyigwa-buzyigwa mbobali mukukambauka akuyiisya cakubindaana. Ikapati bazyali beelede kulombozya kuyoobikkila maano kucibeela cakuti, “Notwalaigwa a Jehova,” eeco ciyoobandika mbuli bazyali mbobakonzya kusalazyanya abana babo. Mwaambi wamamanino mumakani aakusiilana, uyootondezya ncotweelede kucita kutegwa tutalekeli nyika kutunyonganya alimwi akutupa kuba bantu batazyali micelo.—Mk. 4:19.
3 Cibeela cabili camakani aakusiilana cijisi mutwe wakuti, “Amuzuzaane Cakuliyumya.” Makani aaya ayootondezya mbuli buumi mbotupona mbobukozyenye amuzundano wakuzuzaana. Ino nkaambo nzi ncotweelede kuzuza kweelana amilawo yakusiyana? Ino mbuti mbotunga twazwidilila mukusowa zyoonse zitucelesya alimwi akutalengaana mukusiyana kwakubuumi? Lulayo lwamu Magwalo lwamuciindi ceelede luyoopegwa, luyootugwasya toonse kuti tuzumanane kuzuzaana cakuliyumya.
4 Kuliyumya Kupa Kukkomaninwa a Leza: Makani aayookananwa abalangizi beendeenda ayooyumya lusyomo lwabaabo ibamvwa alimwi akulutobela lulayo. Amwi makani aamulangizi wacooko ajisi mutwe wakuti, “Kuliyumya Kusololela Kubukkale Butambulika Kuli Leza.” Makani aabuleya ayooyingula mibuzyo eeyi: Ino muuzina lyani bamasi mobeelede kusyoma, alimwi ino ncinzi cijatikizyidwe mukucita boobo? Makani aamamanino aakuti, “Kwiinda Mukuliyumya Muyoolivwuna Nobeni,” ayoolanga-langa mbuli Jesu mbwaakaliyumya kakunyina kukalala naakacitilwa calunya.
5 Mutalubi kubwezelezya bbuku lyanu lya Cikolo Camulimo alimwi a Ngazi Yamulindizi iyoolangwa-langwa nsondo eeyo. Amulembe twaambo kutegwa mubikkile maano kuzintu zili mukwaambwa alimwi akuti mukatubelesye kumbele. Kwiinduluka twaambo mupulogilamu kuyoocitwa kumbele mumbungano.
6 Jehova kumugama ngonguwe wabamba pobwe eeli lyacakulya cakumuuya. Amukaboole kaka! Muzoolye! Tuyoongolola cakukondwa ikuti naa tukajanike kutegwa tugwasyigwe kupulogilamu yoonse.—Is. 65:14.