Kamuyuma Kukambauka
1 Aano mmazuba aakatazya. Manyongwe mucisi, nkondo akati kamisyobo, ntenda zyacilengwaleza alimwi azintu zimwi ziyoosya zilidumide. Kwiinda lyoonse bantu bayandika makani mabotu. Pele, kusulaika zintu zyakumuuya kuli koonse-koonse. Mumasena amwi, inga cakatazya kujana bantu aŋanda alimwi cilainda kukatazya kujana bantu bakonzya kutuswiilila naa ibayanda kwiiya Bbaibbele. Nokuba boobo, tuyandika kuyuma kukambauka makani mabotu a Bwami bwakakkazyikizigwa a Leza.—Mt. 24:14.
2 Kuyanda Bantu: Kukambauka nkotucita ncitondezyo caluyando lwa Jehova kubantu. “Tayandi kuti bantu bafwidilile, ulayanda kuti boonse bajane ciindi cakweempwa.” (2 Pet. 3:9; Ezk. 33:11) Aboobo, mbuli mbwaakaambide Jesu, Jehova waamba kuti, “anzina Makani Mabotu akakambaukwe kumasi oonse.” (Mk. 13:10) Leza waambila bantu kuti baboole kulinguwe kutegwa bakafwutuke lubeta luboola kunyika ya Saatani. (Joel. 2:28, 29, 32; Zef. 2:2, 3) Tee kayi tulalumba kuti Jehova wapa mulimo ooyu kulindiswe?—1 Tim. 1:12, 13.
3 Lipooti yanyika yoonse itondezya kuti mumwaka wamulimo wa 2004, mweelwe waakati-kati waziiyo zya Bbaibbele zili 6,085,387 zyakasololelwa amwezi alimwi mweelwe waakati-kati utandila ku 5,000 wabasikwiiya bapya bakabbapatizyigwa amvwiki! Ibamwi akati kabaaba bakabbapatizyigwa caino-ino bakajanwa kwiinda mukulongezyegwa aa Jehova akaambo kakuliyumya nkobakacita basikumwaya ibakasoleka kwaambaula abantu boonse bali muzilawo zyabo. Masimpe eeci caleta lukkomano kumbungano alimwi taciliboteli kaka coolwe eeci cakuba basimilimonyina a Leza mumulimo ooyu wakufwutula bantu!—1 Kor. 3:5, 6, 9.
4 Kutembaula Zina lya Leza: Tulaliyumya mukukambauka kutegwa tutembaule Jehova kubuleya alimwi akulemeka zina lyakwe kubantu boonse. (Heb. 13:15) Saatani weena “bantu boonse baansi” ikusyoma kuti Leza takonzyi kumana mapenzi asikila bantu, akuti tabikkili maanu kukupenga kwa bantu naa kuti tako. (Ciy. 12:9) Kwiinda mukukambauka nkotucita, tukwabilila kasimpe kajatikizya Taata wesu wakujulu mubotu. Atuzumanane kutembaula zina lyakwe—lino mane kukabe kutamani.—Int. 145:1, 2.