Atuzumanane Kukambauka!
1 Leza uyanda kuti “bantu boonse bafutulwe akuboola kuluzibo lwakuziba lusinizyo.” (1 Tim. 2:4) Akaambo kaceeci, watupa mulimo wakukambauka makani mabotu. (Mt. 24:14) Ikuti katukazi kaambo ncotweelede kuzumanana kukambauka, ikutyompokelwa kuli koonse alimwi azisinkilizyo zilangilwa kutusikila tazikatunyonganyi pe.
2 Nkaambo nzi Ncotweelede Kuzumanana? Kuli zintu zinji munyika zinyonganya bantu zyalo zibapa kuluba naa kutabikkila maanu kuli zyeezyo nzyotubaambila. Aboobo tweelede kuzumanana kubaibalusya zyamulumbe wa Leza walufwutuko. (Mt. 24:38, 39) Kunze lyaboobo, bukkale bwabantu bulacinca ciindi aciindi. Nokuba zintu zicitika munyika zilakonzya kucinca muciindi buyo cisyoonto. (1 Kor. 7:31) Buumi bwabantu mbotukambaukila bulakonzya kucinca cifwumo, imvwiki iboola naa mwezi uboola, balakonzya kusikilwa mapenzi aamwi antela manyongwe aalo aakonzya kubapa kuti babikkile maanu kumakani mabotu ayo ngotubatolela. Sena tamumulumbi Kamboni wakamuletela kasimpe kuti wakazumanana?
3 Kwiiya Lubomba lwa Leza: Cakukkazika moyo, Jehova wapa ciindi cili mbocibede katanababeteka basizibi. Kwiinda mulindiswe wazumanana kubakombelezya babombe myoyo kuti bapiluke kulinguwe kutegwa bafwutulwe. (2 Pet. 3:9) Tuyoobaa mulandu wabulowa ikuti naa katutabakambaukili mulumbe walubomba Leza ndwaabatondezya bantu alimwi akubacenjezya zyalubeta lwa Leza luboola kuli baabo boonse ibateempwi akuleka zibi zyabo. (Ezk. 33:1-11) Nokuba kuti talili lyoonse nokukkomaninwa kukambauka kwesu, tatweelede kutolwaala mukusoleka kwesu kugwasya baabo ibasyomeka ikubona bubotu bwalubomba lwa Leza.—Inc. 20:26, 27; Rom. 12:11.
4 Kutondezya Luyando Lwesu: Ngu Jehova Leza wakapa malailile kwiinda muli Jesu Kristo aakuti makani mabotu ayelede kukambaukwa nyika yoonse mbwiizulwa. (Mt. 28:19, 20) Noliba leelyo bantu nobakaka kuswiilila mulumbe, tulijisi coolwe cakutondezya luyando alimwi akulipa kwesu kuli Leza kwiinda mukuzumananaa kucita cibotu.—1 Joh. 5:3.
5 Aabe makanzeesu kuzumanana kukambauka! Atube basungu mukucita boobo “buzuba bwalufutuko” bwa Jehova nobuciliko. 2 Kor. 6:2.