Nkaambo Nzi Ncotuzumanana Kupilukila?
1 Sena kuli nomwakalibuzya kale mubuzyo ooyu, ndiza nomwakali kulibambila kuba mumulimo wakumuunda buzuba bumwi? Mumasena amwi mabazu eesu aamulimo nkwaabelekwa lyoonse, basiŋanda balakonzya kutuziba ancotweendela aboobo balafwambaana kututanda. Mbasyoonto kapati banga bazumina. Pele, kuli twaambo tupati-pati tunji ncotuzumanana kupilukila.
2 Cakusaanguna, tupedwe mulawo wakuzumanana kukambauka mulumbe wa Bwami kusikila mane mamanino akasike. (Mt. 24:14; 28:19, 20) Isaya musinsimi wakabuzya ciindi cakasyeede cakuzumanana mumulimo wakwe wakukambauka. Ikwiingula nkwaakapegwa kulilembedwe kuli Isaya 6:11. Masimpe buya—kuti wakaambilwa kuzumanana kupilukila kubantu amulumbe wa Leza. Amazubaano mbubwena buyo, nokuba kuti balatutanda, Jehova uyanda kuti tuzumanane kuni kubaswaya bantu boonse bali mubbazu lyesu. (Ezk. 3:10, 11) Ooyu mukuli uusetekene wapegwa kulindiswe.—1 Kor. 9:17.
3 Akambi kaambo kakuti tuzumanane kupilukila nkakuti kucita boobo kutupa coolwe cakutondezya luyando lwesu kuli Jehova mboluli lupati. (1 Joh. 5:3) Kunze kwaceeci, ciindi notuyeeya mbokuyoomubeda muntu kumbele, muunzila nzi mbotunga twalilesya kukusoleka canguzu acaluyando kucenjezya basimukoboma? (2 Tim. 4:2; Jak. 2:8) Kusyomeka kwesu mukucita mulimo wesu camoyo woonse kupa ziindi zinji zyakuti aaba bautambule mulumbe wa Leza walufwutuko, kutegwa batakabi nobabeja kuti tiibakacenjezegwa.—Ezk. 5:13.
4 Alimwi cimbi ncakuti, tatuzi ciindi bamwi bantu aaba nobaya kucinca mizeezo yabo. Ooku kucinca kulakonzya kwaletwaa bukkale bwabo, manyongwe mumukwasyi, naa zintu zicitika munyika zibapa mizeezo minji yakumbele kwabo. Mpoona ndiza, ncotuya kwaamba amulyango wabo ciya kubakulwaizya kwaazumina makani. (Muk. 9:11; 1 Kor. 7:31) Alimwi, bantu balalonga. Mulabona twajana basiŋanda bapya mubbazu lyesu baya kwaaswiilila makani mabotu—ndiza bakubusi bakkede balikke pele balimukuyeeya kapati azintu nzyobanga bakanza kucita mubuumi.
5 Sena tuyakuzumanana kupilukila? Inzya! Magwalo alatukulwaizya kapati kuti tweelede kupilukila kubantu cakutaleka. Kumamanino, eelyo mulimo wabukambausi ooyu waakumana, Jehova uya kutulongezya nkaambo kakuzumanana kwesu mumulimo wakumuunda, alimwi uya kubalongezya abaabo bakaatambula camaanza obilo makani mabotu aa Bwami.—1 Tim. 4:16.