Citupa Kupilukila Cakwiinduluka-Induluka
1. Ino mubuzyo nzi uuboola kujatikizya mulimo wesu wakukambauka?
1 Mumasena manji, cilawo cesu tulacibeleka cakwiinduluka-induluka. Tulazumanana kupilukila kumaanda ngoonya ciindi aciindi nokuba kuti uuli aŋanda watwaambila kuti tayandi. Ino nkaambo nzi ncotubaswaila aabo batakali kuyanda kubandika andiswe musyule?
2. Ino nkaambo nzi kapati katupa kukakatila mumulimo wakukambauka?
2 Luyando Ndotujisi Kuli Jehova Akubantu: Kaambo kapati katupa kukakatila mumulimo wakukambauka nduyando ndotujisi kuli Jehova. Moyo wesu utupa kuzumanana kwaambila bamwi kujatikizya Leza wesu mupati. (Lk. 6:45) Luyando ndotujisi kuli Jehova lutupa kutobela milawo yakwe alimwi akugwasya bamwi kucita mbubwenya. (Tus. 27:11; 1 Joh. 5:3) Kukakatila cakusyomeka nkotucita mumulimo ooyu takuyeeme ambobautambula mulumbe bantu pe. Nociba ciindi Banakristo bamumwaanda wamyaka wakusaanguna nobakali kupenzyegwa, bakazumanana kukambauka ‘cakutaleka.’ (Inc. 5:42) Ciindi bantu nobakaka kuswiilila, muciindi cakuti tutyompwe, tulazumanana kukakatila, kutondezya mbotumuyanda Jehova akulyaaba kwesu.
3. Mbuti luyando ndotujisi kubantu mboluyootugwasya kuzumanana kukambauka?
3 Alimwi tulakakatila akaambo kaluyando ndotujisi kuli basimukoboma. (Lk. 10:27) Jehova tayandi kuti muntu uuli oonse anyonyoonwe. (2 Pet. 3:9) Nomuba muzilawo zibelekwa-belekwa, tucijana bantu bayanda kubelekela Jehova. Mucikozyanyo, mucisi ca Guadeloupe ooko muntu omwe buyo akati kabantu bali 56 ngo Kamboni wa Jehova, bantu bali 214 bakabbapatizigwa mwaka wamana. Bantu babalilwa ku 20,000 bakajanika ku Ciibalusyo, nkokuti muntu omwe akati kabantu bali 22 mucisi ca Guadeloupe.
4. Ino muunzila nzi zilawo mbozicinca?
4 Kucinca Mucilawo: Kuli bantu baindene-indene lyoonse mucilawo cesu. Ciindi citobela twaswaya aŋanda mpotwatakajana muntu wakautambula mulumbe, muntu uumbi wamumukwasyi—ambweni ooyo uutana buzuba waumvwa mulumbe wesu—ulakonzya kututambula akutalika kuswiilila. Ambweni tulakonzya kujana bantu bamwi bajisi luyandisyo. Bana bajisi bazyali bakazya bakomena balazwa amunzi. Bantu bali boobu inga kabalisungwide kuswiilila mulumbe wa Bwami.
5. Ino ncinzi cikonzya kupa bantu kuyanda kuswiililisya?
5 Abalo bantu balacinca. Mwaapostolo Paulo cimwi ciindi wakali “sikasankusanku asikakomokomo asikazundozundo.” (1 Tim. 1:13) Mbubwenya buyo, bantu banji babelekela Jehova mazuba aano tiibakajisi luyandisyo mukasimpe kumatalikilo. Bamwi ciindi cimwi bakali kwaakazya makani mabotu. Bukkale bwamunyika mbobuyaabucinca, basikukazya bamwi naa aabo batakajisi luyandisyo balakonzya kuyanda kuswiilila. Bamwi inga bayanda kuswiililisya bacitikilwa mapenzi mapati, mbuli kufwidwa umwi wamumukwasyi, kumaninwa mulimo, penzi lyakubula mali, naa kuciswa-ciswa.
6. Ino nkaambo nzi ncotweelede kuzumanana kukambauka cabusungu?
6 Bukkale oobu bubyaabi buli afwaafwi kumana, pele mulimo wesu wakukambauka alimwi akuyiisya ulibindide. (Is. 60:22) Aboobo, tulazumanana kukambauka cabusungu alimwi akusoleka kuzibona munzila iili kabotu zintu. Muntu ngotuyoobandika limwi ciindi ciboola inga wayanda kuswiilila. Tweelede kukanana cakutaleka! ‘Kwiinda mukucita bobuya, inga twalifwutula tobeni alimwi abaabo batuswiilila.’—1 Tim. 4:16.