“Twabeleka Mucilawo Cesu Kwaziindi Zinji!”
1 Sena kuli nomwakabonede kuti cilawo canu cilabelekwa-belekwa cakuti kucinyina bantu bali mbuli mbelele bacisyeede? Ambweni muyeeya kuti: ‘Ndilizi kale bantu mbobayooyingula. Ino nkaambo nzi ncondeelede kuzumanana kupilukila kulibaabo batayandi kuswiilila?’ Masimpe kuti izilawo zinji zilabelekwa-belekwa lyoonse. Nokuba boobo, ikaambo aaka keelede kulangwa munzila mbotu kutali iimbi pe. Nkaambo nzi? Amubikkile maanu kutwaambo tone tupedwe aansaawa.
2 Mipailo Yesu Yaingulwa: Jesu wakaamba kuti: “Kutebula nceo, pele basimilimo mbace, nkaako amukombelele Mwami wakutebula, kuti atume basimilimo mukutebula kwakwe.” (Lk. 10:2) Kwamakumi aamyaka aali mbwaabede, twali kumulomba Jehova kuti atugwasye. Mumasena manji, lino tulijisi babelesi bayungizidwe bayandika alimwi tulamanizya kubeleka mucilawo lyoonse. Sena ikaambo kakuti Jehova waingula mipailo yesu takeelede kutupa kuti tukkomane?
3 Kuzumanana Kuzyala Micelo Mibotu: Nomuba muzilawo zibelekwa lyoonse, bantu balawuswiilila mulumbe wa Bwami alimwi bali mukuboola kuluzibo lwakasimpe. Aboobo, tweelede kuzumanana kupilukila ciindi aciindi katujisi bulangizi bwakujana abamwi babombemyoyo. (Is. 6:8-11) Mbubonya mbubakacita basikwiiya ba Jesu bakusaanguna, ‘kamuzumanana kuunka’ kubantu bali mucilawo ncomupedwe, kamujisi makanze aakubusya luyandisisyo lwabo ku Bwami bwa Leza.—Mate. 10:6, 7, Ci.
4 Mucisi ca Portugal, imbungano zinji zilamanizya kubeleka muzilawo zyazyo ansondo, pele bacijana bantu bali mbuli mbelele. Mucizi omwe kumugama ulazilanga zintu munzila iili kabotu. Waamba kuti: “Mafwumofwumo kanditana nyamuka kuunka mumulimo, abuzuba ndilapaila kuli Jehova kutegwa andigwasye kujana muntu ujisi luyandisyo lwakwiiya Bbaibbele.” Bumwi buzuba wakacita bubambe bwaciiyo kubabelesi bamukantoolo kulukilwa naa kooselwa masusu alimwi akugelelwa masusu. Nokuba boobo, aciindi cakatobela muntu buyo omwe nguwakaboola kuciiyo. Mukaintu ooyo wakaamba kuti: “Aaba bamwi tabayandi pe, pele mebo ndilayanda.” Mumwezi omwe buyo, oyu mukaintu wakatalika kweendelezya ziiyo zya Bbaibbele zyobile zyakwe zimugemi. Muciindi buyo cisyoonto kuzwawaawo, wakabbapatizigwa alimwi kumbele wakazoonjila mumulimo wabupainiya bwaciindi coonse!
5 Imulimo uli Mukucitwa: Imakani mabotu ali mukukambaukwa mbubonya mbuli Jesu mbwakasinsima kuti mbokuyooba. (Mt. 24:14) Nomuba mumasena oomo bantu ‘mobakaka kumvwa,’ bali mukuzibisigwa kwiinda mumulimo wakukambauka. Tulizi kuti kuli bamwi bataswiilili nokuba kukazya kasimpe buya. Pele, bantu bali boobu beelede kucenjezegwa kabotu-kabotu kujatikizya lubeta luboola kuzwa kuli Jehova.—Ezk. 2:4, 5; 3:7, 8, 19.
6 Tatunamana pe: Tatulindiswe notweelede kusala mulimo wakukambauka noweelede kulekwa pe. Jehova nguuzi kabotu-kabotu noweelede kumana. Ulizi naa kuli bantu mucilawo cesu bakonzya kuswiilila makani mabotu. Sunu bamwi bantu baamba kuti tabajisi luyandisisyo, pele kucinca kupati kwabuumi bwabo—ikumaninwa mulimo, kuciswa kapati, kufwidwa muyandwa wabo—kulakonzya kubapa kubaa luyandisisyo ciindi cimbi. Akaambo kakulanga ciimo naa kubula ciindi cakuswiilila akaambo kakujata bubi, bantu banji kunyina nobakajanide ciindi cakuti baswiilile mulumbe ngotukambauka. Kuzumanana kubasikila munzila yabulongwe kulakonzya kubapa kuti babikkile maanu alimwi akuswiilila.
7 Aabo bakomena mumyaka yaino-ino alimwi bajisi mikwasyi, lino balibikkilide maanu kapati kubuumi bwabo alimwi balabuzya mibuzyo iikonzya kwiingulwa buyo a Jwi lya Leza. Umwi mukaintu mwana-mwana wakatamba bacizi bobile muŋanda yakwe akwaamba kuti: “Nondakali musimbi musyoonto, cakali kundiyumina kuteelela ikaambo bamaama ncobakali kubatandila Bakamboni alimwi akubambila kuti tibakali kuyanda kubaswiilila kakuli ncobakali kuyanda buyo nkukanana zintu zijatikizya Bbaibbele. Mpoonya ndakayeeya kuti ndaakukomena akukwatwa alimwi akuba aŋanda yangu, ndiyoobatamba Bakamboni ba Jehova kutegwa bazikundipandulwide Bbaibbele.” Oobo mbwakacita, calo cakapa kuti Bakamboni aaba bakamuswaide bakkomane.
8 Sena Inga Mwagwasya Kapati?: Talili lyoonse ibantu mbotuswaya nobakonzya kupa kuti cilibonye kuyuma kubeleka mucilawo ciindi aciindi. Zimwi ziindi ndiswe buya kutugama. Sena tutalika mulimo amizeezo iitali kabotu? Eeco cilakonzya kubujatikizya bube bwesu, noliba jwi lyesu buya alimwi ambotulibonya kumeso. Amutondezye muuya uuli kabotu alimwi abusyu bukkomene. Amusole kubelesya nzila mpya. Amucince-cince inzila zyanu zyakukambauka alimwi akusola kuzisumpula. Ambweni mulakonzya kucinca mubuzyo wanu wakutalisya naa kubelesya lugwalo lumbi mumubandi. Amubabuzye bakwesu bamwi alimwi abacizi nzila njobajana kuti ilazwidilila nobabeleka mucilawo cabo. Amubeleke abasikumwaya alimwi abapainiya basiyene-siyene mumulimo alimwi akubona cabagwasya kuti bacite kabotu mumulimo wabo.
9 Imulimo wakukambauka Bwami ulazuminwa akulongezegwaa Jehova alimwi notutola lubazu citondezya kuti tulamuyanda walo abasimukoboma. (Mt. 22:37-39) Aboobo atuubeleke mulimo wesu mane do kumamanino, tutakatali akaambo kakubeleka mucilawo comwe ciindi aciindi.