Ino Nkaambo nzi Ncotuzumanana Kukambauka?
1 Sena mulimo wakukambauka zya Bwami wali kucitwa mucilawo canu kwaciindi cilamfwu? (Mt. 24:14) Ikuti naa kacili boobo, mulakonzya kulimvwa kuti cilawo cambungano cakambaukwa bweelede. Iciindi nomukambauka, ambweni bunji bwabantu mbomuyaanya balibonya buya kuti tabaayandi makani aa Bwami. Kufwumbwa naa cili boobo, amubone cakacitika kujatikizya basikwiiya ba Jesu bakasimpe mubbuku lya Ulosi wa Yesaya 2, apeeji 141 mpolyaamba kuti: “M’malo ena, zotsatira za utumiki wawo zingaoneke kukhala zosanunkha kanthu poyerekeza ndi ntchito imene agwira komanso kuyesetsa kumene anachita. Komabe, iwo amapirira.” Pele ino nkaambo nzi ncotuzumanana kukambauka?
2 Amuyeeye Jeremiya: Ikuswiilila kwabantu naa kukaka mulumbe wesu takali nkakaambo kakonzya kupa kuti tutaliyumyi mumulimo wakukambauka. Jeremiya waakambauka kwamyaka iili 40 mucilawo comwe, pele mbasyoonto buyo bakamuswiilila, ibunji bwabo bakaukaka mulumbe wakwe. Ino nkaambo nzi Jeremiya wakaliyumya? Akaambo kakuti wakali kucita mulimo ngwaakalaililwa a Leza kuti aucite alimwi aluzibo ndwaakajisi lwazintu izyakali kulangilwa kucitika kumpela, cakamupa kuti azumanane kukambauka.—Jer. 1:17; 20:9.
3 Ncimwi buyo abukkale bwesu. Jesu “wakatulailila kuti tukambaukile bantu, tulungulule kuti ngonguwe uwakabikwa Leza kuti abe mubetesi wabaumi abafwide.” (Inc. 10:42) Mulumbe ngotukambauka ulakonzya kubapa buumi aabo baswiilila, pele bataswiilili ndufwu. Bantu baya kubetekwa kweelana ambobaatambula makani mabotu. Mbwaanga cili boobo, mulimo wesu tunakuucita mbweena mbuli mbotwakalaililwa. Kufwumbwa naa bantu bakaka kuswiilila, eeci citupa ciindi cakutondezya luyando lwesu lwini-lwini ndotujisi kulimbabo alimwi akulyaaba kwesu kuli Jehova kwiinda mukuzumanana kucita ceeco ncotweelede kucita. Pele nkuzili azimwi ziyandika.
4 Tulagwasyigwa: Ikucita luyando lwa Leza, kufwumbwa naa bantu batutambula buti mucilawo, cilatupa luumumo, kulemunukwa alimwi akukkomana calo citakonzyi kujanwa kuli koonse. (Int. 40:8) Ibuumi bwesu bulabaa mpindu. Mbotuyaabutola lubazu mumulimo ooyu, imyoyo yesu alimwi amizeezo tulaigamika kuzintu ziyoocitika alimwi tuyooba alukkomano lwakupona munyika mpya ya Leza. Kuzibikkila mizeezo zyakasyomenzyegwa mu Magwalo, kuyakutuyumya munzila yakumuuya alimwi akuyumya cilongwe cesu aa Jehova.
5 Nokuba kuti inga tatukonzyi kwiibona mpindu mpoona-mpoona yamulimo wesu wakukambauka, imbuto yakasimpe inga kaisyangidwe mumoyo wamuntu yalo iyookomena muciindi ceelede ca Jehova. (Joh. 6:44; 1 Kor. 3:6) Taku naba omwe wandiswe uuzyi naa bacili bongaye baya kwiiya zya Bamwi kwiinda mukusoleka kwabantu ba Jehova, mubusena momukkala naa munyika yoonse.
6 Mbwaanga mulimo wakukambauka ulibindide kwiinda lyoonse, tweelede kuccilila malailile aa Jesu aakuti: “Amucenjele, kamulindila akukomba, nkaambo tamuzi ciindi nociyooba. Nkabela mbundamwaambila nywebo, mbubonya mbundaambila boonse. Ndati amulangile [akucenjela, NW].” (Mk. 13:33, 37) Eelyo toonse atuzumanane kukambauka makani mabotu aa Bwami akupa kuti moyo wa Jehova ukondwe notutola lubazu mukusalazya izina lyakwe lipati alimwi lisetekene.