Amubabikkile Maano Ibamwi—Kwiinda Mukuba Aluzyalo
1 Kayeeya ciindi cakusaanguna naakayaanya umwi wa Bakamboni ba Jehova, mukaintu umwi watakali kubayanda Bakamboni wakaamba kuti: “Mubwini nseciyeeyi ncotwakali kwaamba, pele ncondiyeeya ncakuti wakali mukaintu siluzyalo, uusamausya alimwi uulicesya. Eeci cakapa kuti ndimuyande kapati.” Majwi aaya atondezya mbokuyandika ikubabikkila maano bantu mbotukambaukila.—Flp. 2:4.
2 Luyando Luli Aluzyalo: Inzila imwi mbotukonzya kutondezya luyando kuli bamwi nkwiinda mukuba aluzyalo. (1 Kor. 13:4) Muntu siluzyalo ulabikkila maano kapati kubukkale bwa bamwi alimwi ulasoleka kubacitila zintu zikonzya kubagwasya. Masimpe, mulimo wakukambauka ulacitwa akaambo kaluzyalo. Pele, tuyootondezya kuti tulababikkila maano ncobeni bantu kutali buyo kwiinda mukubakambaukila. Zyoonse nzyotucita notuli abantu—bulongwe bwesu, ikulilemeka kwesu, mbotuswiilila, zintu nzyotwaamba ambotuzyaamba kubikkilizya ambotuboneka kubusyu notubandika abali aŋanda—ziyootondezya kuti tulababikkila maano ncobeni.—Mt. 8:2, 3.
3 Alimwi ikubabikkila maano bantu caluyando kuyootukulwaizya kuti tubagwasye. Naakali kukambauka kuŋanda aŋanda, mukwesu umwi mupainiya wakatandwa abamukamufwu bacembele mbobakazyibila buyo kuti wakali Kamboni. Bakaamba kuti bakalitantide amanela muŋanda yakujikila kabapapalisya kucinca golopo ciindi walo naakakonkomona amulyango. Mukwesu wakabaambila kuti: “Cabija kuti mwali kucita mulimo ooyu molikke.” Bakamwiitila muŋanda. Wakacinca golopo mpoonya wakabalaya. Nokwakainda ciindi cisyoonto, mwanaabo musankwa wakabaswaya, eelyo bakamwaambila icakacitika. Wakakkomana kapati cakuti wakayanda kuti abonane amukwesu ooyu kutegwa amulumbe. Eeci cakapa kuti babe amubandi mubotu alimwi mulombwana ooyu wakazumina kuba aciiyo ca Bbaibbele.
4 Kwiinda mukuba aluzyalo, tulatondezya luyando ndwajisi Jehova kubantu alimwi tupa kuti mulumbe wa Bwami ulemekwe. Aboobo, lyoonse ‘atulitondezye kuti tuli basimilimo ba Leza kwiinda muluzyalo.’—2 Kor. 6:4, 6.