Amukambauke Cabusicamba Mumasena Aacitilwa Makwebo
1. Nkaambo nzi ncotuteelede kutyompwa kuti naa tulimvwa kuti kukambaukila mumasena aacitilwa makwebo kulayoosya?
1 Sena mulayoowa kukambaukila mumasena aacitilwa makwebo? Ikuti naa mbocibede oobo, mutayoowi nkaambo awalo Paulo iwakali mukambausi sicamba alimwi uutayoowi wakapegwa “busicamba” kutegwa akambauke. (1 Te. 2:2) Ansi aawa, tulabandika buyumuyumu bujanika kanji-kanji alimwi anzila zikonzya kutugwasya kubuzunda.
2. Nkaambo nzi ncotuteelede kulibilika kuti tulabanyemya babelesi?
2 Sena Cilabanyemya Babelesi Kubatyokezya Ncobacita? Mumasena manji aacitilwa makwebo, babelesi bacita mulimo wakugwasya muntu uuli woonse iwasika, aboobo balalangila kutyokezyegwa ncobacita. Ziindi zinji, balaseka-seka, nkaambo bayeeya kuti mwabaletela makwebo. Kwiinda mukusama cabulemu alimwi akuseka-seka, bayoomweenzya munzila yabulemu.
3. Mbuti mbotukonzya kweeleba kunyemya bantu baula?
3 Sena Ndeelede Kwaambaula Kumbele Lyabasikuula Banji? Naa cilakonzyeka, amusale ciindi nobatanavwula basikuula, mbuli mafwumofwumo nobajalula buyo. Amulindile kusikila mupati wamulimo naa kalaliki nali alikke kutegwa mubandike anguwe. Amubandike ambabo mubufwaafwi.
4. Ncinzi ncotukonzya kwaamba notubelekela muzilawo mucitilwa makwebo?
4 Ncinzi Ncindeelede Kwaamba? Amubandike amupati wamulimo ikuti naa kuli babelesi banji. Mulakonzya kwaamba kuti: “Cilakatazya kujana basimakwebo kuŋanda nkobakkala, aboobo twamuswaya okuno nkomubelekela. Ndilizyi kuti mulabeleka, aboobo ndilaamba buyo mubufwaafwi. Kutegwa batatuyeeyeli kuti tulasambala, ziindi zinji cilagwasya kutabwaamba bubambe bwakusanga ccita kuti batubuzya mboweendelezyegwa mulimo wesu. Kweelana amulimo ngobabeleka mboubede, mulakonzya kulomba kumupati wamulimo kwaambaula mubufwaafwi ababelesi. Amwiinduluke kubaambila makani ngomujisi. Ikuti mubelesi kajisi bubi, amwaambe mubufwaafwi alimwi akumusiila katulakiti. Ikuti kacitakonzyeki kubandika ababelesi, ambweni inga bamuzumizya kusiya mamagazini muŋanda mobapumunina naa abusena mpobakonzya kwaabona boonse.
5. Ntwaambo nzi tuliko tweelede kutupa kubeleka cabusicamba mumasena mucitilwa makwebo?
5 Jesu a Paulo bakakambauka cabusicamba mumasena aacitilwa makwebo, aboobo anywebo inga mwacikonzya. (Mt. 4:18-21; 9:9; Mil. 17:17) Amumulombe Jehova kuti amukkazyike moyo alimwi amupe busicamba. (Mil. 4:29) Mumasena mucitilwa makwebo, bantu balajanika lyoonse, aboobo amusole nzila eeyi mbotu yakukambauka.