Amucenjele Ciindi Nomuli Mubukambausi
1. Nkaambo nzi ncotweelede kucenjela mubukambausi?
1 “Mbuli mbelele akati kabaumpe,” babelesi ba Leza balakambauka “akati kazyalani lyabantu bampelenge alimwi bapilingene.” (Mt. 10:16; Flp. 2:15) Malipooti aamanyongwe muzisi, aakuumwa ankamu zyabantu, alimwi aakubba bantu avwula kapati, icitondezya kuti bantu babyaabi ‘babijila limwi.’ (2 Ti. 3:13) Ino ninjiisyo nzi zyamu Magwalo nzyotukonzya kutobela izikonzya kutugwasya ‘kucenjela’ mubukambausi?—Mt. 10:16.
2. Ino mbukkale buli buti bukonzya kupa kuti cibe camaano kuzwa mucilawo cimwi akuyookambaukila mucilawo cimbi?
2 Amucite Cabusongo: Ilugwalo lwa Tusimpi 22:3 lukulwaizya ‘kuyuba’ twabona mapenzi. Amucenjele lyoonse! Zyintu zilakonzya kucinca cakutayeeyelwa nomuba mumasena muli luumuno. Mulakonzya kubona bamapulisa kababilingana naa makamu aabantu kaalundana mumugwagwa. Zimwi ziindi mukamwini ŋanda silubomba ulakonzya kumucenjezya. Muciindi cakuwayawaya akaambo kakuyanda kuzyiba cacitika, ncamaano kufwambaana kuzwa abusena aawo akuzumanana kubusena bumbi.—Tus. 17:14; Joh. 8:59; 1 Te. 4:11.
3. Ino njiisyo iili mulugwalo lwa Mukambausi 4:9 ibeleka buti mumulimo wesu wabukambausi?
3 Amubelekele Antoomwe: lugwalo lwa Mukambausi 4:9 lwaamba kuti: “Bantu bobile mbabotu kwiinda omwe.” Ambweni mulizyibide kubeleka nyolikke mubukambausi kakunyina kunjila muntenda, sena kucili kabotu asunu kucita oobo? Mumasena amwi kucili kabotu. Pele mumasena amwi, mucizyi naa mukubusi ulakonzya kuba muntenda kuti kabeleka mumulimo wakuŋanda aŋanda alikke ikapati kuti naa lyabbila zuba. Izicitika zitondezya kuti kuba amulongwe uupakamene kulayandika kapati. (Muk. 4:10, 12) Amuzumanane kubikkila maano kuntenda zikonzya kubacitikila aabo mbomubeleka limwi mubukambausi. Ikuti kamukambauka abamwi mucilawo, amumuzyibye umwi kuti muyanda kuzwa mucilawo.
4. Ino inga twabakwabilila buti bakwesu abacizyi boonse bali mumbungano?
4 Baalu bajisi mukuli wakupa malailile aayandika kweelana abukkale bwamucilawo eeco, nkaambo ‘mbabalanganya buumi bwesu.’ (Heb. 13:17) Jehova uyootulongezya kuti twazumanana kutondezya kulibombya kwa Bunakristo alimwi akucita zyoonse nzyobatwaambila. (Mik. 6:8; 1 Ko. 10:12) Aboobo babelesi ba Leza boonse abagwasyilizye mukupa bumboni mucilawo cesu, pele lyoonse kabacenjede.