Amubelesye Nzila Iibeleka Kabotu
1. Ncinzi ncotukonzya kwiiya kunzila ziindene-indene izyakusikila bantu nzyobakabelesya Banakristo bakusaanguna?
1 Banakristo bakusaanguna bakakambauka makani mabotu kubantu baindene-indene alimwi bazwa muzikombelo zisiyene-siyene. (Kol. 1:23) Nokuba kuti mulumbe wakalikozyenye nkokuti, Bwami bwa Leza, inzila nzyobakali kubelesya zyakalisiyene-siyene kweelana abantu mbokali kujana. Mucikozyanyo, ciindi Petro naakali kubandika aba Juda ibakali kwaalemeka kapati Magwalo, wakatalika mubandi wakwe kwiinda mukuzubulula majwi aamusinsimi Joeli. (Mil. 2:14-17) Kulubazu lumwi, amubone Paulo mbwaakabandika aba Giliki mbuli mbokulembedwe mulugwalo lwa Milimo 17:22-31. Mazuba aano, bantu bamuzilawo zimwi balaalemeka Magwalo, alimwi tulakonzya kulibelesya Bbaibbele cakwaanguluka ciindi notukambauka kuŋanda aŋanda. Nokuba boobo, tuyandika kucenjela ciindi notubandika abantu batalikkomanini Bbaibbele naa batakkomanini bukombi naa batazulilwi kucikombelo ca Bunakristo.
2. Mbuti mbotukonzya kubelesya mabbuku aakwaabila kugwasya bantu balilemeka Bbaibbele alimwi abaabo batalilemeki?
2 Amwaabelesye Kabotu Mabbuku Aakwaabila: Mabbuku aakwaabila mumwaka wamulimo uuno anoocinca kwainda myezi yobilo alimwi anootondezya mamagazini, matulakiti, amabroshuwa. Nokuba kuti bantu bamucilawo cesu tabalikkomanini Bbaibbele, tulakonzya kubandika ambabo cibalo cikonzya kubakkomanisya kuzwa mumamagazini, mumatulakiti, naa mumabroshuwa. Ambweni inga tiicakonzyeka kubala lugwalo mulweendo lwakusaanguna naa kutondezya ncolyaamba Bbaibbele, pele kuti muntu watondezya luyandisisyo tulakonzya kupilukila katujisi makanze aakugwasya mukamwini ŋanda kuba aalusyomo mu Mulengi alimwi amu Jwi lyakwe lyakasololelwa amuuya. Munzila imwi, ikuti katukambaukila mubusena bantu mobalilemeka Bbaibbele, tulakonzya kubelesya mabbuku alimwi anzila iitondezya kuti balalilemeka Bbaibbele. Alimwi tulakonzya kwaabila bbuku lya Bbaibbele Ncoliyiisya naa broshuwa yakuti Amumuswiilile Leza naa yakuti Amumuswiilile Leza Kutegwa Mukapone Kukabe Kutamani aciindi cili coonse, kufwumbwa naa mabbuku nzi aabilwa mumwezi ooyo. Kaambo kapati nkakubelesya nzila iikonzya kukulwaizya bantu kuyanda Jehova.
3. Muunzila nzi myoyo yabantu bamucilawo cesu moili mbuli bulongo?
3 Amulime Kamutanasyanga: Moyo wamuntu uli mbuli bulongo. (Lk. 8:15) Bulongo bumwi buyandika kulimwa kapati kasimpe kamu Bbaibbele kakatanasyangwa akukomena. Bakambausi bamumwaanda wamyaka wakusaanguna bakacikonzya kusyanga mubulongo buli boonse, alimwi eeci cakabapa kukkutila akukkomana. (Mil. 13:48, 52) Aswebo tulakonzya kuzwidilila kwiinda mukubikkila maano kunzila nzyotubelesya.