“Amwaabile Magazini Yakaindi naa Broshuwa Iili Yoonse Iijisi Makani Aamujatikizya Muntu”
Mumyezi njotwaabila bbuku lya Bbaibbele Ncoliyiisya akutalisya ciiyo ca Bbaibbele mulweendo lwakusaanguna, tukulwaizyigwa “kwaabila magazini yakaindi naa broshuwa iili yoonse iijisi makani aamujatikizya muntu” ikuti mukamwiniŋanda kajisi kale bbuku eeli alimwi katayandi ciiyo ca Bbaibbele. Nkaambo nzi ncotukulwaizyigwa kucita oobo?
Mabroshuwa amamagazini aakaindi ajisi makani aaindene-indene aakonzya kugwasya noliba lino. Makani amwi mumabroshuwa naa mumamagazini aayo alakonzya kumujatikizya mukamwiniŋanda. Aboobo, nomuunka mumulimo wakukambauka, amubwezelezye mabroshuwa manji aaindene-indene alimwi amamagazini aakaindi. Ikuti naa tamujisi mamagazini aakaindi, ambweni mulakonzya kubweza kumbungano. Mpoonya, ikuti mukamwiniŋanda kajisi kale bbuku lya Bbaibbele Ncoliyiisya alimwi katayandi ciiyo ca Bbaibbele, mulakonzya kumutondezya mamagazini naa mabroshuwa ngomujisi akumulomba kuti abweze ngayanda. Mwamana, amupangane lweendo lwakupilukila kutegwa mukabandike twaambo atumwi. Ambweni mukuya kwaciindi inga wazumina ciiyo ca Bbaibbele.