Amubakambaukile ‘Bantu Bamisyobo Yoonse’
1. Mbuti mbobakozyenye bakambausi babeleka kabotu abantu bacibwene kupanga zyintu?
1 Muntu uucibwene kupanga zyintu ulijisi zibelesyo zinji, alimwi ulizyi mbozibelesyegwa anaelede kuzibelesya. Mbubwenya buyo, aswebo tulijisi zibelesyo ziindene-indene zikonzya kutugwasya kuzuzikizya mulimo wesu wakukambauka. Mucikozyanyo, kwasimbwa mabroshuwa aajisi zibalo ziindene-indene aatugwasya kukambaukila ‘bantu bamisyobo yoonse.’ (1 Ko. 9:22) Pepa lyamukati mu Mulimo Wesu wa Bwami ooyu lilijisi mulongo wamabroshuwa amwi, lilapandulula ibakalembelwa, alimwi lilapa nzila mbwaakonzya kwaabilwa.
2. Ndilili notukonzya kubelesya mabroshuwa mumulimo wakukambauka?
2 Ciindi Nomweelede Kubelesya Mabroshuwa: Muntu uucibwene kupanga zyintu ulacibelesya cibelesyo kufwumbwa nokwayandika. Mbubwenya buyo, andiswe tulakonzya kwaabila broshuwa kufwumbwa twabona kuti ilakonzya kumugwasya muntu, kutali buyo myezi eeyo noyaabilwa broshuwa. Mucikozyanyo, ikuti katwaabila bbuku lya Bbaibbele Ncoliyiisya alimwi katukambaukila mucisi cabantu ibatali Banakristo mwalo bantu mobatakkomanini kapati kwiiya Bbaibbele, inga cagwasya kwaabila broshuwa yeelela mpoonya akwaabila bbuku lya Bbaibbele Ncoliyiisya twamana kugwasya muntu kuba aluyandisisyo.
3. Nkaambo nzi ncotweelede kuzizyiba kabotu zibelesyo zyesu zyamubukambausi?
3 Ibbaibbele lilabalumbaizya bantu bacibwene mukubeleka mulimo wabo. (Tus. 22:29) Mubwini, kunyina mulimo uuyandika kapati mazuba aano kwiinda “mulimo uusalala wamakani mabotu.” (Lom. 15:16) Kutegwa tube ‘basimilimo batakwe cintu cibausya nsoni,” tuyoosolekesya kubelesya zibelesyo zyesu munzila iigwasya.—2 Ti. 2:15.