Amubagwasye Bantu Kutegwa Bamuswiilile Leza
1. Ino mabroshuwa nzi aakagwisyigwa Kumuswaangano Wacooko wa “Abuboole Bwami bwa Leza!” alimwi nkaambo nzi ncaagwasya kapati?
1 Amuswaangano Wacooko wakuti “Abuboole Bwami bwa Leza!” kwakagwisyigwa mabroshuwa mapya obilo, yomwe yakuti, Amumuswiilile Leza Kutegwa Mukapone Kukabe Kutamani alimwi aimwi yakalembwa munzila ngubauba yakuti Amumuswiilile Leza. Akaambo kakuti taajisi mabala manji, mabroshuwa aaya alakonzya kusandululwa cakufwambaana kakunyina penzi. Broshuwa ya Amumuswiilile Leza Kutegwa Mukapone Kukabe Kutamani yakalizumizyidwe kale kusandululwa mumyaambo iili 431 aciindi niyakagwisyigwa mu Cingisi.
2. Ino mbaani bayoogwasyigwa amabroshuwa aaya?
2 Ino mbaani kapati bayoogwasyigwa amabroshuwa aaya? Amulange-lange zyintu zitobela zicitika kanji-kanji munyika:
• Sikumwaya uubandika amukamwini ŋanda, andiza mulweendo lwakusaanguna naa mulweendo lwakupilukila, wajana kuti mukamwini ŋanda tacizyi kubala naa tabali kabotu.
• Sikumwaya wakambaukila bantu baambaula mwaambo uujisi buyo mabbuku masyoonto aakasandululwa. Naa bantu banji mucilawo tabakonzyi kubala mwaambo ngobaambaula kabotu.
• Sikumwaya ubelesya mwaambo wakutambaika kukambaukila basyataambi mucilawo cakwe.
• Muzyali uyanda kumuyiisya kasimpe mwanaakwe uutanacizyiba kubala.
3. Ino broshuwa ya Amumuswiilile Leza yakabambwa buti?
3 Mbwaabambidwe: Broshuwa ya Amumuswiilile Leza ijisi mabala masyoonto—andiza muzila buyo omwe alimwi a Lugwalo lutazubulwidwe ansi apeeji lutondezya twaambo tupati-pati. Ino nkaambo nzi? Amweezyeezye kuti muntu wamupa broshuwa iilembedwe mumwaambo ngomutakonzyi kubala, ambweni amabala meenzu kulindinywe. Sena inga mwaikkomanina nokuba kuti ijisi zifwanikiso zibotu? Bantu banji inga tiibaikkomanina. Mbubwenya buyo, bantu batacizyi kubala alabatyompya mabbuku aajisi mabala. Aboobo, apeeji imwi aimwi kuli zifwanikiso zyakabambwa kabotu alimwi atweengo tutondezya mubandi mboweelede kweenda kuzwa kucifwanikiso cimwi kuunka ali cimbi.
4. Ino broshuwa ya Amumuswiilile Leza Kutegwa Mukapone Kukabe Kutamani yakabambwa buti?
4 Broshuwa ya Amumuswiilile Leza Kutegwa Mukapone Kukabe Kutamani ijisi zifwanikiso zikozyenye azili muli Amumuswiilile Leza. Yakabambilwa kwiiya abantu bakatazyigwa kubala naa baiya kubala. Alimwi eeyi broshuwa ilakonzya kubelesyegwa asikuyiisya naiya amuntu uubelesya broshuwa ya Amumuswiilile Leza. Apeeji lili lyoonse lyabili, kujulu nkolili kulumwensyi, kuli mubuzyo wiingulwa amapeeji aayo. Kuyungizya azifwanikiso, kuli mabala aaliko alimwi amagwalo aatazubulwidwe. Kukkona ansi amapeeji manji, kuli kabbokesi kapentedwe kajisi twaambo tuyungizyidwe alimwi a Magwalo aatazubulwidwe aakonzya kubandikwa, kweelana ambwakonzya sikwiiya.
5. Ndiilili alimwi mbuti mbotukonzya kwaabila mabroshuwa aaya?
5 Mbwaakonzya Kubelesyegwa: Mulakonzya kwaabila broshuwa ili yoonse mumulimo wakuŋanda aŋanda nomwabona kuti inga cagwasya kucita oobo, nokuba kuti mumwezi ooyo takwaabilwi mabroshuwa. Nomucita nyendo zyakupilukila mulakonzya kumutondezya mwiniŋanda kwiinda mukumwaambila buyo kuti mujisi cimwi cintu ncomuyanda kumutondezya alimwi akumupa broshuwa.
6. Mbuti mbotuyooyendelezya ciiyo ca Bbaibbele kubelesya mabroshuwa aaya?
6 Mbwaanga broshuwa ya Amumuswiilile Leza tiijisi mibuzyo iisimbidwe, mibandi tiinooli yakubuzya akwiingula mbuli mbotucita notwiiya mubbuku lya Bbaibbele Ncoliyiisya. Muzisi zinji bantu balayanda kuswiilila makani. Aboobo amubelesye zifwanikiso kwaamba makani aakasololelwa amuuya aalembedwe mu Bbaibbele. Amupandulule caambwa muzifwanikiso. Amube basungu. Amumulombe sikwiiya aambe ncabwene naa ncayeeya. Amubale magwalo alaansi apeeji, akubandika anguwe ncaamba magwalo aayo. Amubuzye mibuzyo kutegwa awalo atole lubazu mumubandi alimwi akubona naa ulamvwisya. Kuti kabelesya broshuwa yakuti Amumuswiilile Leza Kutegwa Mukapone Kukabe Kutamani, amubale antoomwe mabala aaliko alimwi amagwalo nomubandika cifwanikiso cimwi acimwi.
7. Mbuti mbotukonzya kugwasya sikwiiya Bbaibbele wesu kuyaambele?
7 Amumugwasye Sikwiiya Kuyaambele: Tulombozya kuti kwiinda mukubandika asikwiiya wanu munzila iili boobu, uyooba aluyandisisyo lwakwiiya kubala kutegwa alijanine luzyibo lwa Jehova lwakwe mwini. (Mt. 5:3; Joh. 17:3) Aboobo, kuti naa mwiiya muli Amumuswiilile Leza, ambweni mukuyakwaciindi mulakonzya kulisungula kumuyiisya kubala sikwiiya wanu, mpoonya akutalika kwiiya muli Amumuswiilile Leza Kutegwa Mukapone Kukabe Kutamani. Kunyina makani abroshuwa njomubelesya, sikwiiya takonzyi kweelela kubbapatizyigwa mwamanizya kwiiya mubroshuwa. Mweelede kutalika kwiiya mubbuku lya Bbaibbele Ncoliyiisya naa bbuku limbi lyeelela likonzya kupa kuti alimvwisye kabotu Bbaibbele.
8. Nkaambo nzi ncomulumba zibelesyo eezyi zipya zyakubelesya mumulimo?
8 Bantu beelede kumuswiilila Mwami wabubumbo boonse kutegwa bakapone kukabe kutamani. (Is. 55:3) Alimwi kuyanda kwa Jehova nkwakuti “bantu boonse,” kubikkilizya abaabo batacizyi kubala, bayiye mbobakonzya kumuswiilila. (1 Ti. 2:3, 4) Eelo kaka tulalumba zibelesyo eezyi zipya nzyotukonzya kubelesya kuyiisya bantu mbobakonzya kumuswiilila Leza!