Zibelesyo Zyesu Nzyotubelesya Mukuyiisya
1. Ino bakambausi Banakristo bakozyanya buti abasikupanga zintu?
1 Basikupanga zintu balabelesya zibelesyo zisiyene-siyene. Nokuba kuti zibelesyo zimwi inga ziyandika buyo muziindi, pesi izimwi zilabelesyegwa lyoonse. Basikupanga zintu bacibwene lyoonse balaba azibelesyo eezyi ziyandika kapati mucibikkilo cabo cazibelesyo, alimwi eezyi nzezibelesyo nzyobazyi kapati kubelesya. Ibbaibbele likulwaizya Munakristo umwi aumwi kubeleka canguzu mumulimo wakukambauka alimwi akuba “mubelesi uutakwe cintu cimuusya nsoni.” (2Tim. 2:15) Ino ncibelesyo nzi ciyandika kapati akati kazibelesyo nzyotujisi? Ndi Jwi lya Leza—icibelesyo cipati ncotubelesya mukuyiisya bantu “kuti babe basikwiiya.” (Mt. 28:19, 20) Aboobo, tweelede kuba bantu bacibwene “kupandulula ijwi lyakasimpe bweelede.” Nokuba boobo, kuli zibelesyo azimbi zibelesyegwa kanji-kanji mukuyiisya, eezyo Banakristo nzyobeelede kwiiya mbozibelesyegwa kutegwa bacikonzye kuyiisya bantu kasimpe.—Tus. 22:29.
2. Ino nzibelesyo nzi nzyotubelesya mukuyiisya?
2 Zibelesyo Nzyotubelesya Mukuyiisya: Kunze lyakubelesya Bbaibbele, ino nzibelesyo nzi zimwi nzyotukonzya kubelesya? Cibelesyo cipati ncotubelesya kuyiisya kasimpe kamu Bbaibbele ndibbuku lyakuti Ino Ncinzi Cini Bbaibbele Ncoliyiisya? Twamana kwiiya bbuku eeli asikwiiya, tweelede kutalika kwiiya bbuku lyakuti “Amuzumanane Kukkala Muluyando lwa Leza” kutegwa tumuyiisye kubelesya njiisyo zyamu Bbaibbele mubuumi bwakwe bwabuzuba abuzuba. Aboobo, tweelede kuba bantu bacibwene mukubelesya mabbuku aaya obilo. Mabroshuwa aamwi ayelede kubikkilizyigwa akati kamabbuku ngotubelesya mukuyiisya. Broshuwa yakuti Makani Mabotu Aazwa Kuli Leza! ncimwi cazibelesyo nzyotubelesya kutalisya ziiyo zya Bbaibbele. Ikuti mucilawo cesu kamuli bantu batacizyi kubala naa aabo baambaula mwaambo ngotujisi buyo mabbuku masyoonto naa uutajisi mabbuku eesu naaceya, nkokuti tulakonzya kubelesya broshuwa yakuti Amumuswiilile Leza naa yakuti Amumuswiilile Leza Kutegwa Mukapone Kukabe Kutamani. Cibelesyo cipati cakuyiisya kugwasya basikwiiya kubasololela kumbunga nibroshuwa yakuti Ino Mbaani Bacita Kuyanda Kwa Jehova Mazuba Aano? Tuvidiyo tumwi tugwasya kuyiisya bantu kuba basikwiiya, mbuli twakuti Nkaambo Nzi Ncomweelede Kwiiya Bbaibbele?, Ino Ncinzi Cicitika ku Ŋanda ya Bwami?, alimwi akamu Chingisi kakuti Does God Have a Name?, azyalo nzibelesyo nzyotweelede kwiiya mbotukonzya kuzibelesya kabotu.
3. Ino zibalo zyakumbele zyamu Mulimo Wesu wa Bwami ziyootugwasya kucita nzi?
3 Zibalo zyakumbele zyamu Mulimo Wesu wa Bwami ziyootugwasya kuba bantu bacibwene kubelesya mabbuku eesu ngotujisi. Mbotuyaabusolekesya kubelesya zibelesyo eezyi cabupampu, tunootobela lulayo lwakasololelwa amuuya oolo Paulo ndwaakalembela Timoteyo naakati: “Lyoonse kolibamba omwini akubikkila maano kapati kukuyiisya kwako. Kakatila kuzintu eezyi, nkaambo kwiinda mukucita boobo uyoolifwutula omwini alimwi abaabo bakuswiilila.”—1Tim. 4:16.