Amwaabelesye Mamagazini Aakaindi
Mbwaanga mamagazini aakaindi taakonzyi kugwasya muntu uuli woonse kuti kaayobwedwe naa kusoogwa, tweelede kusolekesya kwaabila. Magazini yomwe ilakonzya kupa muntu kuba aaluyandisisyo mukasimpe alimwi akumupa kuti atalike kwiita zina lya Jehova. (Lom. 10:13, 14) Ansi aawa kuli nzila zimwi zitondezya mbotukonzya kwaabelesya mamagazini aakaindi.
Ciindi nomukambaukila mucilawo citabelekelwi-belekelwi, aŋanda mpomwatajana bantu ambweni mulakonzya kusiya magazini yomwe aansi aamulyango kaitalibonyi.
Ciindi nomuli mubukambausi bwakubuleya mumasena mbuli muzitisyini zyamabbaasi naa zyacitima, amubabuzye bantu ikuti naa inga bayanda kubala mamagazini, amubatondezye mamagazini aasiyene-siyene aakaindi akubaleka kuti basale njobayanda.
Ciindi nomuswaya muzibbadela, naa mumasena aakozyenye ayaaya aali mucilawo cambungano yanu, amusiye mamagazini aakaindi masyoonto mumasena mobakkala kulindilila. Kanji-kanji cili kabotu kusaanguna kulomba muntu uulanganya busena ikuti naa kaliko kutegwa amuzumizye. Ikuti naa mwajana kuti kuli mamagazini aaliko kale, tamweelede kusiya aamwi.
Ciindi nomulibambila nyendo zyakupilukila, amuyeeye zintu nzyakonzya kukkomanina muntu umwi aumwi ngomuyanda kuyooswaya. Sena ulijisi mukwasyi? Sena ulayanda kweendeenda kuswaya masena? Sena ulayandisya kulima gaadeni? Amulange-lange mumamagazini aakaindi kutegwa mubone naa kuli cibalo ncakonzya kukkomanina kubala, mpoonya amukamutondezye mwaakupiluka.
Ciindi nomwamujana aŋanda muntu iwakatondezya luyandisisyo ngomwatakali kujana ziindi zinji, amumutondezye mamagazini aakaindi aakamwiinda.