‘Amupe Bumboni Cakulomya’
1. Ino ncikozyanyo nzi cibotu mwaapostolo Paulo ncaakatondezya mumulimo wakukambauka?
1 “Uuzuzikizye cakumaninina mulimo wako.” (2 Ti. 4:5) Mwaapostolo Paulo wakalaangulukide kumwaambila majwi aaya Timoteo. Kayi wakeenda nyendo zyotatwe zyabumisyinali akati kamyaka ya 47 alimwi a 56 C.E. Ibbuku lya Milimo lilainduluka-induluka kwaamba kuti Paulo ‘wakalungulula makani mabotu.’ (Mil. 23:11; 28:23) Mbuti mbotukonzya kucita oobo mazuba aano?
2. Mbuti mbotukonzya kupa bumboni cakulomya ciindi notukambauka kuŋanda aŋanda?
2 Kuŋanda Aŋanda: Kutegwa tubonane abamukamwini ŋanda batanaamvwide makani mabotu, inga twayandika kubaswaya aciindi cimbi. Mutwe wamukwasyi ulakonzya kujanika aŋanda kumangolezya naa awikkeendi. Tweelede kusolekesya kubandika amuntu umwi aŋanda imwi aimwi, akujokela alimwi kulibaabo mbotwatajana. Ino kuti kusoleka kwanu kwakuti mubandike amuntu umwi tiikwazwidilila? Ambweni kulemba lugwalo naa kutuma fooni kulakonzya kugwasya.
3. Ino nzyoolwe nzi nzyomujisi zyakupa bumboni kubuleya alimwi amukwiizya?
3 Kubuleya Alimwi Amukwiizya: Ibabelesi ba Jehova mazubaano balabuzyibya “busongo” kubantu boonse baswiilila. Zimwi ziindi eeci cilacitika “mumigwagwa” naa “mumasambalilo.” (Tus. 1:20, 21) Ciindi notubeleka milimo yabuzuba abuzuba, sena inga tulilibambilide kupa bumboni? Sena inga twaambwa kuti ‘tumanina ciindi cesu coonse kukukambauka jwi lya Leza’? (Mil. 18:5) Ikuti kacili boobo, nkokuti tuzuzikizya mukuli wesu ‘wakupa bumboni cakulomya.’—Mil.10:42; 17:17; 20:20, 21, 24.
4. Ino mupailo alimwi akuzinzibala kuyeeya kutugwasya buti mukupa bumboni cakulomya?
4 Nokuba boobo, zimwi ziindi akaambo kakulezya kwesu naa kuba ansoni, tulakonzya kuwayawaya kupa bumboni. Bwini mbwakuti, Jehova ulikuzyi kulezya kwesu. (Int. 103:14) Pele ciindi notulimvwa boobu, tulakonzya kupaila kulinguwe kutegwa tube abusicamba bwakwaambaula. (Mil. 4:29, 31) Alimwi ciindi notucita ciiyo cesu tobeni akuzinzibala kuyeeya Jwi lya Leza, tulakonzya kubikkila maano kulumba mpindu mpati yamakani mabotu. (Flp. 3:8) Eeci ciyootukulwaizya kwaambilizya makani mabotu cabusungu!
5. Mbuti mbotukonzya kutola lubazu mukuzuzikizyigwa kwabusinsimi bwa Joeli?
5 Musinsimi Joeli wakaambila limwi kuti buzuba bupati buyoosya bwa Jehova kabutanasika, bantu ba Leza ‘bayoozumanana’ alimwi akutalekela cintu cilicoonse kubatyompya kukambauka. (Joel. 2:2, 7-9) Atusolekesye kusikila mpotugolela kucita mulimo ooyu wakupa bumboni uutakaindulukwi limbi!