Mbotukonzya Kugwasya Baabo Ibajisi Buyumuyumu Bwakubala

1. Kuyiisya Bbaibbele bantu bajisi buyumuyumu bwakubala kuleta buyumuyumu nzi?

¹ Bantu mbotukambaukila ibajisi buyumuyumu bwakubala balakonzya kuti kabayanda kwiiya kujatikizya Leza, pele mabbuku mapati mbuli Bbaibbele aamwi alakonzya kubatyompya. Ikupa bantu bali boobu bbuku lya Bbaibbele Ncoliyiisya kumatalikilo, inga tiicabagwasya kapati. Ino mbuti mbotukonzya kubagwasya kumuzyiba Leza. Twakabuzya-buzya basikumwaya bacibwene kuzwa muzisi zili 20 kujatikizya mbobacita. Nzyeezi nzila nzyobakapa.

2. lno nzibelesyo nzi zikonzya kugwasya baabo bajisi buyumuyumu bwakubala?

² Ikuti ngotuyiisya Bbaibbele ujisi buyumuyumu bwakubala naa tacizyi kubala, inga mwatalika a broshuwa yakuti Amumuswiilile Leza naa Amumuswiilile Leza Akupona Kukabe Kutamani. Mupainiya umwi waku United States inga utondezya muntu mabroshuwa oonse obilo akumubuzya kuti aambe ngubauba akati kangawo. Ofesi yamutabi ku Kenya ilipoota kuti mabroshuwa aaya alabagwasya kapati bantu mucisi eeci nkaambo mubukkale bwamu Africa bantu inga bayiisyigwa zintu kwiinda mutwaano muciindi cakubuzya mibuzyo akwiingula. Nokuba kuti aabo bayiide balakonzya kuzumina kubala alimwi akubuzyigwa mibuzyo, nzila eeyi inga yapa muntu ujisi lwiiyo lusyoonto kulibilika. Ikuti ngotuyiisya Bbaibbele ulasola-sola kubala, basikumwaya banji balabotelwa kutalikila amabroshuwa aa Makani Mabotu Aazwa Kuli Leza! naa Mulakonzya Kuba Mulongwe wa Leza! naa bbuku lyakuti Bbuku Lyangu Lyamakani Aamu Bbaibbele.

3. lno ntwaambo nzi tujatikizya baabo batacizyi kubala tuyootugwasya kubayiisya kabotu?

³ Amubalumbe: Aabo batanaiya mbokubalwa balakonzya kufwa nsoni, alimwi banji inga balalitenga. Kubagwasya kulimvwa kuliiba kanji-kanji nentaamu yakusaanguna yakubayiisya kasimpe. Bantu banji ibatacizyi kubala mbasongo alimwi balakonzya kwiiya. Amubape bulemu bubeelede. (1 Pe. 3:15) Bayookulwaizyigwa kuzumanana kwiiya kuti balimvwa kuti kusolekesya kwabo kulabagwasya alimwi akuti bayaambele mukwiiya kujatikizya Leza. Aboobo amubalumbe cakwiinduluka-induluka.

4. Mbuti mbotukonzya kukulwaizya baabo bajisi buyumuyumu bwakubala kulibambila ciiyo?

⁴ Nokuba kuti muntu ngomuyiisya Bbaibbele ujisi buyumuyumu bwakubala, amumukulwaizye kuti kalibambila ciiyo. Basikumwaya bamwi ku South Africa inga bakulwaizya mbobayiisya Bbaibbele kulomba basazinyina naa beenzinyina ibabala kabotu kuti babagwasye. Sikumwaya waku Britain inga ukulwaizya mbayiisya Bbaibbele kulibambila kwiinda mukubapa bbuku ndyabelesya ciindi nobaiya kutegwa babone mbocili cuubauba kujana bwiinguzi kuti kabweengedwe. Mukwesu umwi ku India inga ukulwaizya mbayiisya Bbaibbele kulanga azifwanikiso zili muzibalo zyansondo iitobela kutegwa bazinzibale kuyeeya kakucili ciindi.

5. Mbuti mbotukonzya kukkazika moyo ciindi notweendelezya ciiyo?

⁵ Amukkazike Moyo: Tacikwe makani kujatikizya bbuku ndyomubelesya, amubikkile maano kutwaambo tupati-pati alimwi amumugwasye ngomuyiisya kutumvwisya. Kumatalikilo inga cainda kubota kubandika kwamaminiti aali 10 naa 15. Mutanoobandiki twaambo tunji kapati, ambweni kubandika buyo mincali misyoonto ciindi nomumuyiisya. Amukkazike moyo kuti ngomuyiisya katafwambaani kubala. Uyookulwaizyigwa kuyaambele kubala kabotu ciindi nayaabumuzyiba Jehova. Kutegwa mumugwasye ngomuyiisya kucita oobo, cilayandika kumutamba kumiswaangano kuzwa kumatalikilo.

6. Mbuti mbotukonzya kugwasya bantu kwiiya kubala?

⁶ Ikuti aabo mbotuyiisya Bbaibbele bacizyiba kubala, bayoofwambaana kuyaambele mukwiiya kujatikizya Leza. (Int. 1:1-3) Banji babagwasya aabo mbobayiisya Bbaibbele kwiinda mukubelesya maminiti masyoonto kumamanino aaciiyo cili coonse kulanga langa bbuku lyakuti Amusungwaale Kukubala Akulemba. Ikuti ngomuyiisya Bbaibbele watyompwa, mulakonzya kumukulwaizya kwiinda mukwaamba zintu nzyaacikonzya kwiiya akucita. Amumwaambile kuti Jehova uyookulongezya kusolekesya kwakwe alimwi amumukulwaizye kulomba lugwasyo kwiinda mumupailo. (Tus. 16:3; 1 Joh. 5:14, 15) Basikumwaya bamwi baku Britain inga bakulwaizya mbobayiisya kulibikkila mbaakani nzyobakonzya kuzuzikizya nobayaabwiiya, mbuli kupeta mabala aamu alufabbeti, kujana alimwi akubala magwalo ngaasala, alimwi akubala mabbuku aamba zyamu Bbaibbele aatakatazyi kubala. Kugwasya bantu kwiiya kubala kanji-kanji kubikkilizya kubakulwaizya kuti bayande kucita oobo, ikutali kubayiisya buyo mbokubalwa.

7. Nkaambo nzi ncotuteelede kutyompwa kubayiisya kasimpe aabo ibajisi buyumuyumu bwakubala?

⁷ Jehova ulababikkila maano nibaba baabo bajisi lwiiyo lusyoonto. (Job. 34:19) Jehova ulingaula moyo wamuntu. (1 Mak. 28:9) Aboobo mutatyompwi kubayiisya kasimpe aabo ibajisi buyumuyumu bwakubala. Mulijisi zibelesyo zinji zibotu kapati nzyomukonzya kutalika anzizyo. Mukuya kwaciindi, mulakonzya kutalika kubelesya bbuku lya Bbaibbele Ncoliyiisya akumugwasya kwaamvwisya kabotu magwalo.