Kuyiisya Kwiinda Mukubelesya Broshuwa ya Makani Mabotu
1. Ino broshuwa ya Makani Mabotu ibambidwe buti?
1 Mbubwenya mbokwakabandikwa mu Mulimo Wesu wa Bwami wamu July, cibelesyo cimwi ciyandika kapati mukuyiisya kwesu nibroshuwa yakuti Makani Mabotu Aazwa Kuli Leza! Magwalo manji aalembedwe taazubulwidwe pe kutegwa bamukamwini ŋanda balibalile kuzwa mu Bbaibbele kuligama. Nokuba kuti mabbuku eesu manji aakwiiya akalembwa munzila yakuti sikubala ulakonzya kuliyiisya mwini, broshuwa eeyi yakabambilwa kuti kaibandikwa asikuyiisya. Aboobo ciindi notwayaabila, tweelede kusolekesya kutondezya mbocicitwa ciiyo kutegwa mukamwini ŋanda wabona mbocikkomanisya kwiiya makani mabotu aazwa mu Bbaibbele.—Mt. 13:44.
2. Ino inga twaibelesya buti broshuwa ya Makani Mabotu mulweendo lwakusaanguna?
2 Mulweendo Lwakusaanguna: Mulakonzya kwaamba kuti: “Ndamuswaya akaambo kakuti bantu banji balalibilika kujatikizya ciyoocitikila bantu kumbele. Sena muyeeya kuti bukkale kuli nobuyooba kabotu? [Amulindile bwiinguzi.] Ibbaibbele lilijisi makani mabotu aakonzya kutupa bulangizi. Amubone mibuzyo imwi iingulwa mu Bbaibbele.” Amumupe broshuwa mukamwini ŋanda, akumulomba kuti asale mubuzyo akati kamibuzyo iili kupeeji yamamanino. Mpoonya amumutondezye mbocicitwa ciiyo kwiinda mukulanga-langa muncali wakusaanguna mucibalo eeco. Nzila imwi njomukonzya kubelesya nkubuzya mukamwini ŋanda mubuzyo uuli kabotu uuyeeme aciiyo ncomwasala, mpoonya amumutondezye broshuwa mboikonzya kumugwasya kujana bwiinguzi bwamu Bbaibbele. Ikuti ciiyo eeco kaceendelana avidiyo imwi iili a jw.org, mulakonzya kuyeebelela antoomwe anguwe.
3. Amupandulule mbomukonzya kweendelezya ciiyo kwiinda mukubelesya broshuwa ya Makani Mabotu.
3 Mbotukonzya Kweendelezya Ciiyo: (1) Amubale mubuzyo uulembedwe mumabala aasiisya kugwasya mukamwini ŋanda kubikkila maano kukaambo kapati. (2) Amubale muncali uutobela. (3) Amubale magwalo aasendekedwe, alimwi akubelesya mibuzyo iili kabotu kugwasya mukamwini ŋanda kubona magwalo mbwaawiingula mubuzyo. (4) Ikuti naa kuli muncali uumbi ansi aamubuzyo ooyo, amwiinduluke nzila yabili alimwi ayatatu. Ikuti vidiyo kayeendelana amubuzyo alimwi kakuli tamuna kumutondezya mukamwini ŋanda, mulakonzya kuyeebelela ciindi nomwiiya. (5) Mwamana, amumulombe mukamwini ŋanda kuti aingule mubuzyo uulembedwe kutegwa musinizye kuti wamvwisya.
4. Ino ncinzi ciyootugwasya kubelesya broshuwa eeyi munzila iili kabotu?
4 Amucizyibe kabotu cibelesyo eeci ciyandika kapati. Amucibelesye kufwumbwa ciindi noceelela kucita oobo. Kamutanaunka kuciiyo cimwi acimwi, amuyeeye kujatikizya sikwiiya alimwi anzila mbotu yakumugwasya kumvwisya twaambo kwiinda mukubelesya magwalo aali mucibalo. (Tus. 15:28; Mil. 17:2, 3) Mbomuyabuyungizya luzyibo lwanu, muyoobona broshuwa eeyi kuba cibelesyo ncomunooyandisya kapati kubelesya mukuyiisya bantu kasimpe.