Mbotukonzya Kulubambilila Luyando Ndotujisi Kuli Leza Alimwi Akuli Basimukoboma

Nokuba kuti Banakristo tabaangidwe a Mulawo wa Musa, milawo yobilo mipati iijanika mumulawo ooyu, nkokuti mulawo wakuyanda Leza alimwi abasimukoboma, ilatondezya Jehova ncayanda kulindiswe. (Mt. 22:37-39) Luyando luli boobu talulibooleli buya pe. Lweelede kuyiigwa. Munzila nzi? Nzila imwi iiyandika kapati, nkwiinda mukubala Bbaibbele abuzuba. Ciindi notulanga-langa bube bwa Leza bwiindene-indene kweelana ambokutondezyedwe mu Magwalo, tubona “bubotu bwa Jehova.” (Int. 27:4) Akaambo kaceeco, luyando lwesu kulinguwe luyookomena alimwi tunooyeeya mbuli mbwayeeya. Eeci citupa kuti katutobela milawo ya Leza, kubikilizya amulawo wakutondezya luyando kuli bamwi. (Joh. 13:34, 35; 1Joh. 5:3) Nzeezyi nzila zyotatwe zikonzya kupa kuti kubala Bbaibbele kakukkomanisya:

• Amweezeezye nzyomubala. Amweezeezye kuti nkomuli. Ino mubona nzi, kumvwa alimwi akununkizya? Ino balimvwide buti aabo bajatikizyidwe?

  

• Amubelesye nzila ziindene-indene. Nzeezyi nzila zimwi: Amubale cakupozya naa kutobelezya ciindi nomuswiilila zyakalekkodwa. Amubale kujatikizya muntu umwi wamu Bbaibbele naa makani aagaminide muciindi cakubala zyaandano kweelana ambozitobelene. Mucikozyanyo, amubelesye cibeela ca Makani Aayungizyidwe A7 naa B12 mu Bbaibbele lya Busanduluzi Bwanyika Mpya kutegwa mubale zinji kujatikizya Jesu. Amubale caandaano coonse oomo imwazwa lugwalo lwabuzuba. Amubale mabbuku aamu Bbaibbele kweelana ambwaakatobelana kulembwa.

  

• Amubale kutegwa mumvwisye. Ikubala caandaano nociba comwe abuzuba akucimvwisya alimwi akuzinzibala kuyeeya kujatikizya ncinco, kuli kabotu kwiinda kubalikila kuti mubale zyaandaano zinji. Amulange-lange bukkale mbobwakabede ciindi eeco. Amulange-lange twaambo tujatikizyidwe. Amwaabelesye mamaapu alimwi amulongo wamagwalo aajisi twaambo tukozyenye. Amuvwuntauzye kaambo nokaba komwe nkomutamvwisyi. Ikuti kacikonzyeka, ciindi ncomubelesya kubala ceelede kweelana aciindi cakuzinzibala kuyeeya.