Ncinzi Ncomukonzya Kwiiya ku Banakristo Ibamubelekela Jehova Kwamyaka Minji?

Mumbungano zyesu, tulijisi bakwesu abacizyi ibamubelekela Jehova kwamyaka minji kapati. Aboobo tulakonzya kwiiya mbobamusyoma Jehova. Tulakonzya kubabuzya makani aakaindi aajatikizya mbunga ya Jehova alimwi ambwaabagwasya Jehova kuliyumya mumapenzi. Mane buya tulakonzya kutamba umwi wabacembeede ciindi notucita Kukomba Kwamumukwasyi kutegwa azootwaambile zyakuluula.

Ikuti naa muli Munakristo iwamubelekela Jehova kwamyaka minji, amwaanguluke kubaambila zyakuluula Banakristo ibacili bana-bana. Jakobo a Josefa bakali kubaambila bana babo kujatikizya zintu nzyaakabacitila Jehova. (Matl. 48:21, 22; 50:24, 25) Mukuya kwaciindi, Jehova wakalailila basilutwe bamikwasyi kuyiisya bana babo kujatikizya milimo yakwe mipati. (Dt. 4:9, 10; Int. 78:4-7) Mazuba aano, bazyali alimwi abamwi mumbungano balakonzya kwaambila bakubusi kujatikizya zintu zibotu Jehova nzyaazuzikizya kwiinda mumbunga yakwe.

AMWEEBELELE KAVIDIYO KAKUTI KUZUMANANA KUKAMANTANA CIINDI MULIMO WESU NOUKASYIDWE, MPOONYA MWIINGULE MIBUZYO IITOBELA:

• Ino mutabi waku Austria wakabagwasya buti bakwesu muzisi zimbi ooko mulimo wesu nkowakakasyidwe?

• Ino bakwesu bamuzisi eezyi bakazumanana buti kuyumya lusyomo lwabo?

• Nkaambo nzi basikumwaya banji baku Romania ncobakaisiya mbunga ya Jehova, alimwi ino bakapiluka buti?

• Ino eezyi izyakacitika ziluyumya buti lusyomo lwanu?