Kwiiya Kuli Basikumwaya Bacibwene
Tulabayanda kapati basikumwaya bacibwene ibali mumbungano. Bamwi bamubelekela Jehova cakusyomeka kwamyaka minji. Bamwi ambweni bakaiya caino-ino nzila zibotu zyakubelesya mubukambausi. Basikumwaya aaba babona Jesu mbwasololela mbungano ya Bunakristo mumazuba aaya aakumamanino kwiinda mukuyungizya mulimo wakukambauka akupanga basikwiiya. (Mt. 28:19, 20) Akaambo kakutola lubazu mumulimo ooyu, batambula “nguzu zigambya iziinda zyabantu” ciindi nobasikilwa buyumuyumu bugaminide alimwi amasunko. (2Kor. 4:7) Tulakonzya kwiiya zinji kuli basikumwaya aaba bacibwene. Kuti naa baba acoolwe, balakkomana kapati kwaambila bamwi zintu nzyobaiya. (Int. 71:18) Aboobo tweelede kujana ciindi cakwiiya kulimbabo. Ino inga twacita buti oobo?
Mumulimo. Kutegwa babe basungu mumulimo wakukambauka, basikumwaya bapya naa aabo bajisi luzyibo lusyoonto beelede kuyiisyigwa. Tulakonzya kwiiya zinji kwiinda mukulangilila basikumwaya basimide mbobaubeleka mulimo wabo. (Amubone cibalo cakuti “Amuzumanane Kuba Basungu Mumulimo Wakukambauka,” muncali watatu munsi aakatwe kakuti, “Kugwasya Basikumwaya Bapya” mu Ngazi Yamulindizi yamu February 15, 2015) Ino mwagwasyigwa buti akaambo kakubeleka abantu bali boobo mumulimo wakukambauka?
Amutambe sikumwaya uucibwene kutegwa mubeleke limwi mubukambausi. Ikuti naa sikumwaya ooyo kali mulema, ambweni zimwi ziindi mulakonzya kusololela ciiyo canu ca Bbaibbele kuŋanda yakwe. Camana ciiyo, amumubuzye sikumwaya uucibwene kutegwa aambe mboceenda ciiyo alimwi alugwasyo ndwanga wapa kutegwa muyaambele.
Amujane Ciindi Cakwiizya Ambabo: Amubazyibe kabotu basikumwaya bacibwene kwiinda mukwiizya ambabo. Amubatambe ciindi nomukomba mumukwasyi mpoonya akubabuzya-buzya. Ikuti naa sikumwaya kali mulema, amupange bubambe bwakuti kukomba kwamumukwasyi kukacitilwe kuŋanda yakwe. Amumubuzye mbwaakakaiya kasimpe. Ino nzilongezyo nzi nzyaajana? Ino nkuyaambele kuli buti nkwaabona mucilawo canu? Ino mbubotu nzi mbwaajana akaambo kakubelekela Jehova?
Mbwaanga basikumwaya bacibwene abalo kuli mpobalezya, tatweelede kulangila kuti balakonzya kutugwasya mumbazu zyoonse. Mbubwenya mbuli ndiswe toonse, basikumwaya bakaindi balijisi luzyibo lwiindene-indene mumulimo wakukambauka. (Rom. 12:6-8) Bamwi balicembeede alimwi eeci inga capa kuti batakonzyi kubeleka ciindi cilamfwu andiswe mumulimo. Nokuba boobo, tulakonzya kwiiya zinji kulimbabo akaambo kaluzyibo ndobajisi mukubelekela Jehova cakusyomeka.