Malifalensi Aamu Kabbuku Kamuswaangano Wabuumi Amulimo Wesu
© 2024 Watch Tower Bible and Tract Society of Pennsylvania
JANUARY 6-12
MBONO IZILI MU JWI LYA LEZA INTEMBAUZYO 127-134
Nobazyali—Amuzumanane Kulanganya Lukono Lwanu
Amucikkomanine Coolwe Cakuba Mumukwasyi wa Jehova
9 Jehova wakapa bantu coolwe cakuba abana, alimwi amukuli wakuyiisya bana kumuyanda alimwi akumubelekela. Ikuti naa muli muzyali, sena mulalumba kuba acoolwe eeci? Nokuba kuti Jehova wakapa bangelo zyoolwe zinji, pele tanaakabapa coolwe cakuba abana. Aboobo kuti kamuli muzyali, amutondezye kulumba kucoolwe cakuba abana. Bazyali bakapegwa mukuli uusetekene wakukomezya bana “mululayo alwiiyo lwa Jehova.” (Ef. 6:4; Dt. 6:5-7; Int. 127:3) Ikugwasya bazyali, mbunga ya Leza yapanga zibelesyo zinji ziyeeme a Bbaibbele, mbuli mabbuku, mavidiyo, nyimbo alimwi azibalo zyaa intaneti. Cilalibonya kuti, Taateesu wakujulu alimwi a Mwanaakwe balabayanda bana. (Lk. 18:15-17) Ciindi bazyali nobasyoma Jehova, alimwi akubeleka canguzu kulanganya bana babo bayandwa, Jehova ulakkomana. Alimwi bazyali bali boobu, bagwasya bana kuba abulangizi bwakuba cibeela camukwasyi wa Jehova mane kukabe kutamani!
Nobazyali—Amubayiisye Bana Banu Kuyanda Jehova
20 Amubazyibe kabotu bana banu. Lugwalo lwa Intembauzyo 127 lukozyanisya bana kumivwi. (Amubale Intembauzyo 127:4.) Mbubwenya mbuli mimvwi mboikonzya kupangwa kwiinda mukubelesya zintu ziindene-indene alimwi ilakonzya kwiindana kukomena, mbubwenya buyo mwana umwi aumwi uliindene. Aboobo bazyali beelede kusala kujatikizya mbobeelede kumuyiisya mwana umwi aumwi. Banabukwetene ibakkala kucisi ca Israel yamazuba aano, ibakazwidilila kuyiisya bana babo bobilo kubelekela Jehova bakaamba kuti: “Twakali kusololela ciiyo ca Bbaibbele kumwana umwi aumwi.” Aboobo, silutwe wamukwasyi aumwi ulakonzya kusala naa inga waibelesya nzila eeyi kuti kacikonzyeka.
Mbono Zyakumuuya
Amukondwe Akuyaambele Kwanu!
6 Ciiyo ciyandika kapati ncobakonzya kwiiya bazyali cilajanika ku Intembauzyo 131:1, 2. (Amubale.) Mwami Davida wakaamba kuti, ‘kunyina naakali kulombozya zintu zipati kapati’ naa zintu nzyaatakali kukonzya kujana. Kulicesya alimwi akulibombya kwakwe, ‘zyakamuumbulizya akumuumuzya.’ Ncinzi bazyali ncobakonzya kwiiya kumajwi aa Davida? Bazyali balakonzya kulicesya alimwi akulibombya kutali buyo kuzintu nzyobalombozya lwabo, pele alimwi anzyobalombozya kubana babo. Bazyali balakonzya kumwaambila mwanaabo zintu nzyakonzya kucita alimwi anzyatakonzyi ciindi nobamugwasya kulibikkila mbaakani nzyakonzya kuzuzikizya. Mucizyi Marina wakaamba kuti: “Bamaama kunyina nobakali kundeezyanisya abanabokwesu naa abana bamwi buyo. Bakandiyiisya kuti umwi aumwi ulaacipego alimwi akuti umwi aumwi ulayandika kuli Jehova. Aboobo ndilabalumba, akaambo kakuti tandilyeezyanisyi abamwi.”
JANUARY 13-19
MBONO IZILI MU JWI LYA LEZA INTEMBAUZYO 135-137
“Mwami Wesu Mupati Kwiinda Baleza Bambi Boonse”
Kristo Nguzu zya Leza
15 Nguzu zya Kristo zizwa kuli Jehova, aboobo tulijisi twaambo tulimvwisya twakusyoma kuti Leza Singuzuzyoonse ulakonzya kweendelezya zilengwaleza. Amubone zikozyanyo eezyi zitobela. Kaitanatalika Zambangulwe, Jehova wakaamba kuti: “Kwainda buyo mazuba aali ciloba ndilawisya mvwula anyika mazuba aali 40, syikati amasiku.” (Matl. 7:4) Lugwalo lwa Kulonga 14:21 alwalo lwaamba kuti: “Jehova wakapa kuti maanzi aandaane kwiinda mukubelesya guwo ilyakali kuzwa kujwe.” Alimwi alugwalo lwa Jona 1:4 lwaamba kuti: “Jehova wakatuma guwo pati mulwizi, eelyo kwakaba mayuwe mapati kapati mulwizi cakuti bwato bwakali kuyanda kunyonyooka.” Cilayumya-yumya kuzyiba kuti Jehova ulakonzya kweendelezya zintu nzyaakalenga. Cilakkomanisya kuzyiba kuti munyika mpya Leza unooyendelezya zilengwaleza.
Ino Luyando lwa Jehova Lutamani Lwaamba nzi Kulindinywe?
16 Ciindi Jehova nali mayubilo eesu, tulimvwa kukwabililwa. Pele zimwi ziindi tulakonzya kutyompwa alimwi akuzumanana kulimvwa boobo. Aziindi zili boobo, ncinzi Jehova ncayootucitila? (Amubale Intembauzyo 136:23.) Uyootujatilila amaanza aakwe, kutunyamuna kabotu-kabotu alimwi akutugwasya kwiimikila. (Int. 28:9; 94:18) Mbotugwasyigwa: Kuzyiba kuti lyoonse tulakonzya kusyoma lugwasyo lwa Leza kulatugwasya munzila zyobilo. Yakusaanguna, tacikwe makani ankotukkala, tulizyi kuti Jehova mayubilo eesu. Yabili, Taateesu siluyando ulatubikkila maano kapati.
Mbono Zyakumuuya
Ilufwutuko Alimwi Alukkomano Mubweendelezi bwa Mesiya
25 Ilusyomo ndobajisi muli Jehova bana Israyeli bapilusyidwe lwasinizyigwa cakumaninina, aboobo boongolola ategwa: “Ncobeni Leza ndufutuko lwangu. Njoosyoma akutayoowa, nkaambo Mwami Jehova ninguzu zyangu, ndolwiimbo lwangu, lino waba lufutuko lwangu. Nkaambo kako muyooteka maanzi cakukondwa mumikalo yalufutuko.” (Isaya 12:2, 3) Ibbala lya Chihebrayo lyakasandululwa kuti “ndolwiimbo” mukapango 2 lilakonzya alimwi kwaamba “kutembaula.” Ibakombi boongolola kwiimba akaambo kalufwutuko ndwaapa “Mwami Jehova.” Mu Chihebrayo cakusaanguna kulembedwe kuti: “Ja Jehova ninguzu zyangu, ndolwiimbo lwangu.” Ikubelesya kaambo kakuti “Ja Jehova”—nkokuti ikulibelesya ziindi zyobile zina lya Leza mbuli mbokubelesyedwe mu Bbaibbele mumwaambo wakusaanguna kutondezya kumutembaula akumulumba kapati.
AMUSUNGWAALE MUMULIMO WAMUMUUNDA
Sena Bakamboni ba Jehova Mbanakristo?
Inzya. Tuli Banakristo akaambo katwaambo ootu tutobela:
Tulasola kutobela njiisyo abukkale bwa Jesu Kristo.—1 Petulo 2:21.
Tulasyoma kuti Jesu nenzila yalufwutuko, kuti “kunyina lufwutuko mumuntu uuli woonse, nkaambo kunyina zyina limbi munyika lyapegwa kubantu ndyotweelede kufwutulwa andilyo.”—Milimo 4:12.
Ciindi bantu nobaba Bakamboni ba Jehova, balabbapatizyigwa muzyina lya Jesu.—Matayo 28:18, 19.
Tulapaila kwiinda muzyina lya Jesu.—Johane 15:16.
Tulasyoma kuti Jesu ngo Silutwe, naa uupedwe nguzu zyakweendelezya bantu.—1 Bakolinto 11:3.
Nokuba boobo, munzila zinji tuliindene atubunga twabukombi tumbi twiitwa kuti Banakristo. Mucikozyanyo, tusyoma kuti Bbaibbele liyiisya kuti Jesu Mwana wa Leza, ikutali kuti ncibeela ca Butatu. (Maako 12:29) Tatusyomi kuti muntu tafwidilili, tatusyomi kuti kuli Magwalo aamba kuti Leza ulasubula bantu mumulilo uutamani wa helo, naa kuti aabo beendelezya muzyintu zyabukombi beelede kupegwa mazyina aabulemu aabasumpula kwiinda bamwi.—Mukambausi 9:5; Ezekiele 18:4; Matayo 23:8-10.
JANUARY 20-26
MBONO IZILI MU JWI LYA LEZA INTEMBAUZYO 138-139
Mutalekeli Buyoofwu Kumulesya Kutola Lubazu Lyamiswaangano
Amumutembaule Jehova Mumbungano
10 Sena mulayoowa kapati kufwumbwa ciindi nomuyanda kutambika kutegwa mwiingule? Ikuti kacili boobo, tamuli mulikke pe. Bwini mbwakuti, bunji bwesu tulayoowa twayanda kwiingula. Ikutegwa mulilwane penzi eeli lyakuyoowa ilimupa kutaingula, mweelede kuzyiba icimupa kuyoowa. Sena muyoowa kuti mulaziluba nzyomuyanda kwaamba naa muyoowa kulubizya? Sena mulalibilika kuti bwiinguzi bwanu tabukoobota mbuli bwiinguzi bwabamwi? Kwaamba masimpe, kuyoowa kuli boobo kulakonzya kuba citondezyo cibotu. Kutondezya kuti mulalicesya akuti bamwi mubabona kuti balamwiinda. Jehova ulabuyanda bube oobu. (Int. 138:6; Flp. 2:3) Pele awalo Jehova uyanda kuti kamumutembaula alimwi akukulwaizya basyominyoko kumiswaangano. (1Tes. 5:11) Ulamuyanda alimwi uyoomupa busicamba mbomuyandika.
Amukulwaizyanye Kumiswaangano Yambungano
7 Mulakonzya kujana nzila zigwasya mumagazini aa Ngazi Yamulindizi aakamwaigwa musyule. Mucikozyanyo, amulibambile kabotu. (Tus. 21:5) Ikuti naa mwacimvwisya kabotu cibalo ciyiigwa, tamukayoowi kupa bwiinguzi. Kunze lyaboobo, amusole kupa bwiinguzi bufwaafwi. (Tus. 15:23; 17:27) Kupa bwiinguzi bufwaafwi inga tiikwamupa kuyoowa kapati. Alimwi bwiinguzi bufwaafwi, ambweni ibujisi buyo kaambo komwe, bulakonzya kubagwasya kapati bakwesu abacizyi kwiinda bwiinguzi bulamfwu bujisi twaambo tunji. Aboobo kwiinda mukupa bwiinguzi bufwaafwi kubelesya majwi aanu, ciyootondezya kuti mwakalibambila kabotu alimwi mwakacimvwisya cibalo ciyiigwa.
Mbono Zyakumuuya
‘Amulekelelane’
15 Ino kuti bamwi batubisizya munzila yatucisa kwiindilila pele kakunyina kuzumina cibi eco, kakunyina kweempwa alimwi kakunyina kulilekelela kuzwa kuli sikutubisizya? (Tusimpi 28:13) Magwalo alatondezya munzila iisalala kuti Jehova talekeleli basizibi bayumu myoyo bateempwi. (Ba-Hebrayo 6:4-6; 10:26, 27) Ino mbuti swebo? Ibbuku lya Insight on the Scriptures lyaamba kuti: “Ibanakristo tabayandiki kulekelela baabo bacita cibi acaali kakunyina kweempwa. Ibali boobu baba basinkondonyina Leza.” (Volume 1, peeji 862) Kunyina Munakristo walo wakeendelezyegwa munzila iitaluzi, mbyaabi naa iisesemya weelede kulimvwa kusinikizigwa kulekelela naa kujatila sikubisya uuteempwi.—Intembauzyo 139:21, 22.
AMUSUNGWAALE MUMULIMO WAMUMUUNDA
Ino Mbuti Mbondikonzya Kulwana Penzi Lyansoni?
Cuusisya ncakuti: Nsoni zilakonzya kupa kuti mutabi abalongwe babotu alimwi akwiindwa zintu mubuumi.
Bubotu mbwakuti: Talili lyoonse nsoni nozili zibi. Zilakonzya kumugwasya kuyeeya kamutanaambaula alimwi akumupa kuba basikulangilila abaswiilizi babotu.
Cikkomanisya ncakuti: Penzi lyansoni lilakonzya kumana, ciyandika buyo nkutazilekela kumweendelezya. Cibalo eeci cilamugwasya mbomukonzya kucita oobo.
Amuzizyibe zintu zimupa kuyoowa
Nzyomweelede kucita
Nzyobaamba beenzinyoko
Amuzizyibe zintu zimupa kuyoowa
Nsoni zilakonzya kumupa kuyoowa kwaambaula amuntu cantongolameso. Akaambo kaceeci, mulakonzya kulimvwa kulendelelwa, mbuli kuti muli nyolikke muluumu iisiya mbi. Eeco cilayoosya. Pele ikuti mwazizyiba zintu zimupa kuyoowa, mulakonzya kubona kuti tamweelede kuyoowa pe. Amulange-lange zikozyanyo eezyi zyotatwe.
Cimupa Kuyoowa #1: “Tandizyi makani ngondeelede kubandika.”
Kaambo kamasimpe: Bantu balaluba nzyomwaamba, pele bayeeya buyo mbozibajatikizya. Aboobo mulakonzya kucileka kuyoowa kwiinda mukuba baswiilizi babotu, ibabikkila maano kuli nzyobaamba bamwi.
Ncomweelede kuyeeya: Ino mbalongwe bali buti mbomuyanda, sena mbaabo batakkalwi nzinini amulomo nobaambaula, naa muyanda baswiilizi babotu?
Cimupa Kuyoowa #2: “Bantu bayeeya kuti ndilalendelezya.”
Kaambo kamasimpe: Bantu mbabayakwaamba naa mulaansoni naa pe. Mulakonzya kuzyeendelezya nsoni kwiinda mukubatondezya bwini mbomubede bantu, mpoonya akubalekela kuti baambe naa muli bantu bali buti.
Ncomweelede kuyeeya: Ikuti naa muyeeya kuti bantu boonse bamuyeeyela munzila iitaluzi, ambweni ndinywe mubayeeyela munzila iitaluzi kwiinda mukubona kuti tabamuyandi.
Cimupa Kuyoowa #3: “Ndilafwa nsoni kuti ndaambe cintu citaluzi.”
Kaambo kamasimpe: Eeco cilacitika kumuntu uuli woonse. Mulakonzya kubweendelezya buyoofwu kwiinda mukubona kulubizya kwanu kuti ncoolwe cakutondezya kuti tamulondokede.
Ncomweelede kuyeeya: Sena tacimukkomanisyi kuba abantu ibazumina kuti tabalondokede?
Sena mulizyi? Bantu bamwi bayeeya kuti tabajisi nsoni akaambo kakuti batuma tumeseji tunji twaafooni. Pele ncuuba-uba kupanga balongwe beni-beni ciindi nomubandika cantongolameso. Syaazibwene mumakani aatekinoloji wazina lyakuti Sherry Turkle wakalemba kuti: “Ciindi notwabonana cantongolameso alimwi akumvwa jwi lyaumwi aumwi notuba acilongwe ciyumu amuntu.”
Nzyomweelede kucita
Amweelebe kulyeezyanisya. Tamweelede kuciindizya kusangalizya bamwi. Muciindi caboobo, mbaakani yanu njakuti nsoni ziceye-ceye kutegwa mutaindwi coolwe cakuba abalongwe babotu alimwi akwiindwa zintu mubuumi.
“Mibandi tayeelede kuba milamfwu, alimwi tamweelede kuba ndinywe nomubikkilwa maano. Amulizyibye kumuntu umwi mupya, alimwi akumubuzya mibuzyo misyoonto buyo.”—Alicia.
Njiisyo yamu Bbaibbele: “Umwi aumwi alingule nzyacita lwakwe mwini, mpoonya ulajana kaambo kamupa kukondwa lwakwe mwini, ikutali akaambo kakulyeezyanya amuntu uumbi.”—Bagalatiya 6:4.
Kamulangisisya. Amulangilile baabo bakkomanina kuyanzana abantu akubona mbobabandika abantu aabo. Ninzila nzi iibabelekela? Ninzila nzi iitababelekeli kabotu? Ino ninzila nzi nzyobabelesya nywebo nzyomulombozya kwiiya?
“Amulangilile akwiiya kuli baabo batakatazyigwi kupanga balongwe. Amulangilile mbobacita alimwi ancobaamba ciindi nobaswaanya muntu ciindi cakusaanguna.”—Aaron.
Njiisyo yamu Bbaibbele: “Mbubonya butale mbobukwenga butalenyina, awalo muntu ulasensemuna mweenzinyina.”—Tusimpi 27:17.
Amubuzye mibuzyo. Kanji-kanji bantu balayanda ikwaamba mbobayeeya kujatikizya cintu cimwi, aboobo kubuzya mibuzyo ninzila mbotu yakutalisya mibandi ambabo. Alimwi cipa kuti bantu batabikkili kapati maano kulindinywe.
“Kulibambilila limwi cilakonzya kumugwasya kucesya kulibilika. Mulakonzya kuyeeya notuba twaambo naa mibuzyo misyoonto kacitanasika ciindi cakuyanzana abamwi, kutegwa mwaswaangana amuntu mupya kulibilika kuceye-ceye.”—Alana.
Njiisyo yamu Bbaibbele: “Mutabikkili buyo maano kuzintu nzyomuyanda nywebo zilikke, pele akuzintu nzyobayanda bamwi.”—Bafilipi 2:4.
JANUARY 27–FEBRUARY 2
MBONO IZILI MU JWI LYA LEZA INTEMBAUZYO 140-143
Amucite Zintu Izyeendelana Amipailo Yanu
‘Komvwa Majwi Aabasongo’
13 Lulayo amulubone kuti ncitondezyo caluyando lwa Leza. Jehova uyanda kutucitila zintu ziinda kubota. (Tus. 4:20-22) Ciindi natupa lulayo kwiinda mu Jwi lyakwe, mubbuku lyaamba zyamu Bbaibbele, naa kwiinda mumusyomima uusimide, utondezya luyando lwakwe kulindiswe. Bahebrayo 12:9, 10 yaamba kuti, ‘Ulacita oobo kuti tugwasyigwe.’
14 Amubikkile maano kululayo, ikutali mbolwapegwa. Zimwi ziindi tulakonzya kulimvwa kuti lulayo ndotwakapegwa tiilwakapegwa munzila iili kabotu. Mubwini, kufwumbwa yooyo uupa lulayo, weelede kusoleka kulupa munzila iikonzya kumuubila kulutambula sikupegwa lulayo oolo. (Gal. 6:1) Pele kuti naa ndiswe twapegwa lulayo, inga twacita kabotu kubikkila maano kuli ncotukonzya kwiiya kululayo, nokuba kuti tulimvwa kuti sikutupa lulayo tanaalupa munzila iili kabotu. Tulakonzya kulibuzya kuti: ‘Nokuba kuti tiindakkomana ambolwapegwa lulayo, sena kuli twaambo twamasimpe itwaambwa? Sena inga tiindakuluba buyo kutalondoka kwasikundipa lulayo akubikkila maano kululayo?’ Inga twacita cabusongo kubona mbotukonzya kugwasyigwa kululayo luli loonse ndotukonzya kupegwa.—Tus. 15:31.
Amuzumanane ‘Kusalala Mumoyo’ Mumazuba Aano Aakatazya
Ikukazigwa, mapenzi aakubula mali alimwi akuciswa kapati kwapa babelesi ba Leza bamwi kutyompwa. Zimwi ziindi balapenga kapati mumoyo. Eeci cakamucitikila awalo Mwami Davida: “Muuya wangu wawizuka; Moyo wangu wayoowa mukaango kangu.” (Int. 143:4) Ino ncinzi cakamugwasya kuti aliyumye muziindi zili boobu? Davida wakayeeya zyintu Leza nzyaakacitila babelesi bakwe alimwi awalo kumugama mbwaakamufwutula. Wakayeeya zyintu Jehova nzyaakacita kutegwa asalazye zyina lyakwe. Wakali kwiiyeeya milimo ya Leza lyoonse. (Int. 143:5) Mbubwenya buyo andiswe, ikuyeeya Mulengi wesu azyintu zyoonse nzyaakatucitila alimwi anzyatucitila kulatugwasya ciindi notuli mumapenzi.
Sena Lulayo Lwakukwata naa Kukwatwa “Buyo mu Mwami” Lucibeleka Asunu?
2 Ziindi zimwi inga mwalimvwa mbuli mbwaakalimvwa sintembauzyo Davida, iwakaamba kuti: “Kofwambaana kondivwiila, O Jehova; Nguzu zyangu zyamana. Utandisisi busyu bwako.” (Int. 143:5-7, 10) Muziindi zili boobu, amumupe ciindi Uso wakujulu kutegwa amutondezye makanze aakwe kujatikizya ndinywe. Mulakonzya kucita boobu kwiinda mukujana ciindi cakubala Jwi lya Leza alimwi akuzinzibala kuyeeya nzyomubala. Muyoozyiba ncoyaamba milawo yakwe alimwi muyoobona nzyaakabacitila bantu bakwe bamusyule. Kwiinda mukumuswiilila, lusyomo lwanu luyooyuma, muyoobona kuti kuswiilila nguwe cilagwasya.
Mbono Zyakumuuya
Bukombi Bwakasimpe Bulakonzya Kutupa Kuba Alukkomano
7 Tulamukomba Jehova ciindi notupaila kulinguwe. Magwalo akozyanisya mipailo yesu kutununkilizyo tubambidwe kabotu itwakali kupegwa kutente lyakubunganina, mpoonya kumbele, kutempele. (Int. 141:2) Tununkilizyo ooto twakali kupa bweema bubotu ibwakali kumukkomanisya Leza. Mbubwenya buyo, mipailo yesu iizwa ansi aamoyo ‘ilamubotela’ Leza, nokuba kuti twabelesya mabala mauba-uba. (Tus. 15:8; Dt. 33:10) Tulijisi kaambo kabotu ikeelede kutupa kusyoma kuti cilamukkomanisya Jehova kutumvwa katwaamba mbotumuyanda alimwi akumulumba. Uyanda kuti katumwaambila nzyotulibilika alimwi anzyotulombozya. Aboobo katutanapaila kuli Jehova, mbuti kuti twasaanguna kuyeeya nzyotuyanda kwaamba? Kwiinda mukucita boobo, tuyoopa ‘tununkilizyo’ twiinda kubota kuli Taateesu wakujulu.
AMUSUNGWAALE MUMULIMO WAMUMUUNDA
Nkaambo Nzi Bakamboni ba Jehova Ncobatazumini Kubikkwa Bulowa?
Zyintu zyakubeja nzyobasyoma bantu
Makani aakubeja: Bakamboni ba Jehova tabasyomi kuti bamadokota balakonzya kubagwasya aboobo tabaunki kukusilikwa.
Makani aamasimpe: Swebo amikwasyi yesu tulabikkila maano kuyandaula busilisi bubotu. Iciindi notwaciswa, tulaunka kumadokota ibalaaluzyibo mubusilisi amukwaandula bantu kakunyina kubelesya bulowa. Tulalumba kujatikizya lusumpuko lwacitwa mumakani abusilisi. Masimpe ngakuti busilisi bupegwa kakunyina kubelesya bulowa ibwakabambilwa Bakamboni ibaciswa, lino bulabelesyegwa kugwasya bantu boonse. Muzisi zinji, mulwazi uuli woonse ulakonzya kusala kutabikkwa bulowa akweeleba ntenda ziboola akaambo kakubikkwa bulowa, mbuli malwazi aboola akaambo kakubikkwa bulowa, ikunyonganizyigwa kwamaseelo aakwabilila mubili alimwi akulubizya kwabasilisi.
Makani aakubeja: Bakamboni ba Jehova basyoma kuti lusyomo lulakonzya kuponya bulwazi bwamuntu.
Makani aamasimpe: Tatubelesyi lusyomo mukusilikwa.
Makani aakubeja: Kukaka kubikkwa bulowa ciladula kapati.
Makani aamasimpe: Busilisi bucitwa kakunyina kubelesya bulowa tabuyandiki mali manji kapati.
Makani aakubeja: Bakamboni banji, kubikkilizya abana balafwa mwaka amwaka akaambo kakukaka kubikkwa bulowa.
Makani aamasimpe: Makani aaya anyina bumboni buli boonse. Bamadokota balasilika kwiinda mukwaandula moyo, kwaandula mumafwuwa, alimwi akucinca zizo zimwi kakunyina kubelesya bulowa. Balwazi, kubikkilizya abana, ibatabikkwi bulowa balaba kabotu mbubwenya mbuli baabo ibabikkwa bulowa nokuba kubainda buya. Kufwumbwa mbocibede, kunyina uukonzya kuzyiba naa mulwazi ulafwa akaambo kakukaka kubikkwa bulowa naa kuti ulapona akaambo kakuti wazumina.
Nkaambo nzi Bakamboni ba Jehova ncobatazumini kubikkwa bulowa?
Aaya makani ajatikizya nzyobasyoma ikutali busilisi. Cizuminano Cakale alimwi a Cizuminano Cipya zyoonse zitulailila kutantamuka bulowa. (Matalikilo 9:4; Levitiko 17:10; Deuteronomo 12:23; Milimo 15:28, 29) Leza ubona kuti mubulowa momuli buumi. (Levitiko 17:14) Aboobo tulabutantamuka bulowa ikutali buyo akaambo kakumvwida Leza, pele akaambo kakuti tulamulemeka mbwali Sikutupa buumi.
Ikucinca mizeezo
Aciindi cimwi, bamadokota bakali kubona busilisi bwakutabelesya bulowa kuti bwakali cintu citali kabotu alimwi kuti bwakali kukonzya kupa kuti muntu afwe, pele mumyaka misyoonto yainda zyintu zyacinca. Mucikozyanyo, mu 2004, cibalo icakalembwa mubbuku lyaamba zyabusilisi cakaamba kuti “nzila zinji zibelesyegwa mukusilika Bakamboni ba Jehova zilaba nenzila zinoobelesyegwa mumyaka iili kumbele.” Mumwaka wa 2010, cibalo cimwi mumagazini itegwa Heart, Lung and Circulation cakaamba kuti: “‘busilisi bwakutabelesya bulowa’ tabweelede kubelesyegwa buyo kuli Bakamboni ba Jehova pele bweelede kuba cibeela ciyandika mubusilisi bwabuzuba abuzuba.”
Lino bamadokota banji nyika yoonse babelesya nzila yakubambilila bulowa mukwaandula baciswa kakunyina kubabikka bulowa. Nzila zili boobu izyakutabelesya bulowa mubusilisi zilabelesyegwa nomuba muzisi zisumpukide alimwi nobaba balwazi batali Bakamboni ba Jehova balalomba kuti basilikwe kwiinda mukubelesya nzila eezyi.
FEBRUARY 3-9
MBONO IZILI MU JWI LYA LEZA INTEMBAUZYO 144-146
“Balikkomene Bantu Aabo Bajisi Jehova Kali Leza Wabo!”
Mibuzyo Yabasikubala
2. Mabala aabelesyedwe aleendelana kabotu atupango tutobela muntembauzyo. Kubelesyegwa kwabbala lyakuti “aboobo” mukapango 12 caamba kuti zilongezyo izitobela mukapango 12 kusikila ku 14 zibonwa kuti zyaamba balulami—aabo ibalomba ‘kuvwunwa akufwutulwa’ kumaanza aababi (kapango 11). Kucinca ooku alimwi kulitondezyedwe mukapango 15, mwalo ibbala lyakuti “balikkomene” nkolyaambidwe ziindi zyobilo munzila ziindene. Munzila imwi, muzibeela zyoonse zyobilo, ‘bantu bakkomene” mbantu bomwe—aabo bajisi “Jehova kali Leza wabo!” Alimwi mutalubi kuti, malembe aakusaanguna aamumwaambo wa Chihebrayo tanaakajisi twaandaanyo mbuli tooto itutondezya majwi aazubuludwe (ma quotation marks). Aboobo, basanduluzi beelede kusala muzeezo uuluzi, kumwi kabayeeya amboulembwa mwaambo wakweema wa Chihebrayo, twaambo tweengelede alimwi azibalo zikozyenye zyamu Bbaibbele.
3. Mabala aabelesyedwe aleendelana azibalo zyamu Bbaibbele izisyomezya zilongezyo kubantu ba Leza basyomeka. Akaambo kakucinca kwancolikonzya kwaamba ibbala lyakuti asher, ntembauzyo lino itondezya bulangizi bwini-bwini mbwaakajisi Davida bwakuti Leza naakavwuna cisi ca Israyeli kuli basinkondonyina, wakali kukonzya kubalongezya bantu kwiinda mukubapa lukkomano akukkala kabotu. (Lev. 26:9, 10; Dt. 7:13; Int. 128:1-6) Mucikozyanyo, lugwalo lwa Deuteronomo 28:4 lwaamba kuti: “Bayoolongezyegwa bana banu, butebuzi bwanu alimwi abana babanyama banu bavwubwa alimwi abana baŋombe zyanu abambelele zyanu.” Masimpe, mubulelo bwa Solomoni mwana wa Davida, cisi cakajana luumuno lutaambiki alimwi akukkala kabotu. Ciinda zyoonse, zibeela zyabulelo bwa Solomoni zyaamba kumbele kubulelo bwa Mesiya.—1Bam. 4:20, 21; Int. 72:1-20.
Amuzumanane Kuyumya Bulangizi Bwanu bwa Bunakristo
16 Bulangizi bwesu bwabuumi butamani ncipego citaliboteli kapati kuzwa kuli Leza. Tulangila buumi bubotu kumbele, bwalo mbotusinizyide kuti buyoobako ncobeni. Buli mbuli ngobyo, iitugwasya kutegwa tucikonzye kuliyumya mumasunko, ciindi notupenzyegwa alimwi nociba ciindi notuyanda kujaigwa. Buli mbuli cimpoompo, cikwabilila mizeezo yesu kutegwa tukake zintu zibyaabi alimwi akukakatila kucintu ciluzi. Bulangizi bwesu ibuyeeme a Bbaibbele buyumya cilongwe cesu a Leza alimwi butondezya luyando ndwajisi kulindiswe. Tulagwasyigwa kapati ciindi notuzumanana kuyumya bulangizi bwesu.
17 Mulugwalo ndwaakalembela bana Roma, mwaapostolo Paulo wakabakulwaizya kuti: “Amukondwe akaambo kabulangizi.” (Rom. 12:12) Paulo wakali kukonzya kukondwa nkaambo wakalisinizyide kuti ikuti wazumanana kusyomeka, wakali kuyooba abuumi butamani kujulu. Andiswe tulakonzya kukondwa akaambo kabulangizi bwesu nkaambo tulisinizyide kuti Jehova uyoozizuzikizya zisyomezyo zyakwe. Sintembauzyo wakalemba kuti: “Ulikkomene ooyo . . . uulangila Jehova Leza wakwe, . . . Ooyo uusyomeka lyoonse.”—Int. 146:5, 6.
Ino Musyobo Nzi Waluyando Uuletela Lukkomano Lwini-lwini?
19 Lino kwiindide myaka iisika ku 6,000 kabapenga bantu, nyika ya Saatani ilaafwaafwi kumana. Nyika izwide bantu ibaliyanda cakuzwa munzila, ibayandisya mali alimwi azyakulikondelezya. Mbantu ibabikkilide maano kujana kufwumbwa nzyobayanda, alimwi ibabikka zintu nzyobayandisya lwabo beni mubusena bwakusaanguna mubuumi bwabo. Bantu ibali boobo kunyina nobakonzya kukkomana ncobeni. Muciindi caboobo, cili buyo mbubonya mbwaakalemba sintembauzyo kuti: “Ulikkomene ooyo uujisi Leza wa Jakobo kali mugwasyi wakwe, uulangila Jehova Leza wakwe.”—Int. 146:5.
20 Luyando lwa Leza nkoluli akati kabantu ba Jehova, alimwi tuyaabuvwula mwaka amwaka. Oobu mbumboni bwakuti Bwami bwa Leza bulalela alimwi ino-ino buyooleta zilongezyo zitaambiki anyika. Lukkomano lwini-lwini alimwi lutamani lulaboola kwiinda mukucita kuyanda kwa Leza, akuzyiba kuti tukkomanisya Mupatikampatila. Alimwi aabo ibamuyanda Jehova bayookkomana kukabe kutamani! Mucibalo citobela, tuyoolanga-langa bube bumwi ibuboola akaambo kakuliyanda alimwi akubona mbobwiindene abube bujanwa akati kababelesi ba Jehova.
Mbono Zyakumuuya
Amube Alukkomano Kwiinda Mukupa Bamwi
6 Jehova ulatupa zintu nzyotuyandika kumubili akaambo kakuti ulatuyanda. Amubone majwi aa Jesu aajanika kulugwalo lwa Matayo 6:25, 26. (Amubale.) Jesu wakabelesya zikozyanyo zyazilenge. Kaamba kujatikizya bayuni, Jesu wakati: “Tabasyangi mbuto naa kutebula nokuba kuyobola mumatala.” Nokuba boobo, amubone ncaakaamba kuzwa waawo, wakati: “Uso wakujulu ulabasanina.” Kumane Jesu wakabuzya kuti: “Sena tamuyandiki kwiinda mbabo?” Ino twiiya nzi? Jehova ubona bakombi bakwe kuti balayandika kapati kwiinda banyama mbaakalenga. Aboobo kuti Jehova kakonzya kulanganya banyama, tulakonzya kuba masimpe kuti andiswe uyootupa nzyotuyandika! Mbubwenya mbuli usyi muntunsi uubikkila maano, Jehova ulabapa nzyobayandika bamukwasyi wakwe akaambo kaluyando ndwajisi kulimbabo.—Int. 145:16; Mt. 6:32.
AMUSUNGWAALE MUMULIMO WAMUMUUNDA
lmd makani aayungizyidwe A kaambo 7
Makani Aamu Bbaibbele Ngotukkomanina Kuyiisya
7. Mukaintu weelede kumulemeka kapati mulumaakwe.—Ef. 5:33; Kol. 3:18.
FEBRUARY 10-16
MBONO IZILI MU JWI LYA LEZA INTEMBAUZYO 147-150
Tulijisi Twaambo Tunji Ncotweelede Kumutembaula Ja
“Amumutembaule Ja!”—Nkaambo Nzi Ncotweelede Kucitila Boobo?
5 Jehova wakapa luumbulizyo ikutali buyo kucisi ca Israyeli kaili nkamu, pele akumuntu umwi aumwi kumugama. Oobu mbocibede amazuba aano. Sintembauzyo wakalemba boobu kujatikizya Leza: “Ulabaponya aabo batyompedwe mumoyo; alimwi ulaanga zilonda zyabo.” (Int. 147:3) Inzya, Jehova ulabalanganya aabo ibajisi mapenzi—kufwumbwa naa ngakumubili naa ngaayo aalwanina mumizeezo. Naaba mazuba aano, Jehova ulayandisisya kutuumbulizya alimwi akutugwasya mumapenzi aatukatazya mumizeezo. (Int. 34:18; Is. 57:15) Ulatupa busongo alimwi anguzu kutegwa tucikonzye kuliyumya mumapenzi aali woonse ngotukonzya kujana.—Jak. 1:5.
6 Mpoonya sintembauzyo wakaamba kujatikizya zintu izili kujulu kumane wakati, Jehova “ulabala mweelwe wanyenyeezi” alimwi “ulaziita zyoonse mazina aazyo.” (Int. 147:4) Ino nkaambo nzi ncaakacincila makani ngaakali kwaamba kumatalikilo akutalika kwaamba zyanyenyeezi? Amuyeeye kaambo aaka: Sintembauzyo wakali kukonzya kubona nyenyeezi ameso aakwe, pele taakwe naakalizyi kuti zili zyongaye. Mazuba aano, imweelwe wanyenyeezi nzyobakonzya kubona bantu wakomena citaambiki. Bamwi bayeeya kuti kuli mabbiliyoni aanyenyeezi mumulalabungu wesu uutegwa Milky Way galaxy. Alimwi ambweni kuli milalabungu minji kapati mububumbo boonse! Kulindiswe tobantu, nyenyeezi nzinji kapati cakuti tazibaliki pe! Pele Mulengi ulazipa mazina zyoonse. Eeci caamba kuti nyenyeezi imwi aimwi ililibedelede kuli Jehova. (1Kor. 15:41) Pele ino mbuti kujatikizya bantu ibakkala anyika? Leza, walo uuzyi nyenyeezi imwi aimwi mpoibede, ulituzyi umwi aumwi wandiswe kumugama—nkokuti busena bugaminide aumwi mpabede, ulizyi bwini mbotulimvwa alimwi ulizyi kabotu-kabotu zyoonse nzyotuyandika!
“Amumutembaule Ja!”—Nkaambo Nzi Ncotweelede Kucitila Boobo?
7 Kunze lyakumubikkila maano nywebo lwanu kumugama, Jehova ulijisi nguzu iziyandika kutegwa amugwasye ciindi nomwasikilwa mapenzi mubuumi. (Amubale Intembauzyo 147:5.) Ambweni inga mwalimvwa mbuli kuti mapenzi aanu manji kapati alimwi akuti ali mbuli cibbudu cilema kapati ncomutakonzyi kunyamuna. Jehova ulakumvwisya kulezya kwanu, ‘ulizyi kabotu kuti muli bulongo buyo.’ (Int. 103:14) Akaambo kakuti tatulondokede, tulalubizya cakwiinduluka-induluka. Eelo kaka cilatuusisya ikwaamba zintu nzyotuteelede kwaamba, kwaalilwa kulwana zisusi zyesu zyanyama naa kunyonokela zintu nzyobajisi bamwi! Jehova talezyi mumbazu zyoonse eezyi; pele ulatumvwisya kapati!—Is. 40:28.
“Amumutembaule Ja!”—Nkaambo Nzi Ncotweelede Kucitila Boobo?
18 Sintembauzyo wakalizyi Leza mbwaakali kubayanda bantu bakwe bansiku. Bantu aaba ncecakali cisi celikke icakapedwe “jwi” lya Leza ‘amalailile aakwe alimwi ambeta zyakwe.’ (Amubale Intembauzyo 147:19, 20.) Mazuba aano, tulaacoolwe cakuba tolikke anyika notwiitwa azina lya Leza. Akaambo kakuzyiba Jehova alimwi akusololelwa a Jwi lyakwe mubuumi bwesu, tulikkomene kuti tujisi cilongwe cilibedelede anguwe. Mbubwenya mbuli mulembi wa Intembauzyo 147, sena andinywe mulijisi twaambo tubotu itumupa kwaamba kuti “Amumutembaule Ja!” alimwi akukulwaizya bamwi kucita mbubwenya oobo?
Mbono Zyakumuuya
Inguzu Zyakulenga—“Mulengi Wajulu Anyika”
16 Alimwi ibbuku lya Intembauzyo 148:10 lyaamba zya “bayuni bauluka.” Amweezeezye buyo kuvwula kwamisyobo yabayuni! Jehova wakaambila Jobu zyampowani naa impye, “ilaseka bbiza ayooyo uutantide aalindilyo.” Masimpe, ooyu muyuni imulamfwu kapati kusika amamita obile acisela nokuba kuti tauluki, ulakonzya kulunduka kusika kumakkilomita aali 65 muwoola lyomwe, kataamuka mamita aali one acisela ntaamu yomwe! (Jobu 39:13, 18) Kulubazu lumbi, muyuni mupati uuli mbuli jule uutegwa albatross bunji bwaziindi uuluka buyo atala alwizi. Mbuli ndeke, imuyuni ooyu ujisi buyale bwamababa busika kumamita aali otatwe. Ulakonzya kayile kufwuumuka kwaciindi cilamfwu kakunyina kuvwupaula mababa aakwe. Mukwiimpana, ikansyoma kalya buci (bee hummingbird) nkayuni kainda kuceya aatuyuni toonse munyika ikalampa buyo masentimita aali osanwe. Kalakonzya kuvwupaula mababa aankako ziindi zili makumi aali lusele mukavwaluvwalu komwe buyo! Itunsyoma, ituŋaima mbuli tubwe tuyandisi tujisi mababa, tulakonzya kupepuluka mbuli ndeke zyacipolopela alimwi mane akuuluka cifwuteesule.
AMUSUNGWAALE MUMULIMO WAMUMUUNDA
Amuswiilile Jwi lya Jehova
7 Amubale Matayo 17:1-5. Ciindi cabili Jehova naakaambaula kuzwa kujulu, cakali ciindi Jesu ‘naakasanduka.’ Jesu wakatamba Petro, Jakobo alimwi a Johane kuti bamusangane kuunka atala aacilundu cilamfwu. Nobakali kooko, bakabona cilengaano cilibedelede. Busyu bwa Jesu bwakabala alimwi zisani zyakwe zyakamweka. Mpoonya bantu bobilo, ibaimininwa a Musa alimwi a Elija, bakatalika kubandika a Jesu kujatikizya lufwu lwakwe ilwakali kumbele alimwi abubuke. Nokuba kuti baapostolo botatwe aaba “bakafwide ŋonzi,” bakacibona cilengaano eeci cigambya ciindi nobakasinsimuka. (Lk. 9:29-32) Mpoonya kkumbi limweka lyakabavwumbilila alimwi bakamvwa jwi kuzwa mukkumbi, nkokuti ijwi lya Leza! Mbubwenya mbwaakacita ciindi Jesu naakabbapatizyigwa, Jehova wakatondezya mbwaakamukkomanina Mwanaakwe alimwi aluyando ndwaakajisi kulinguwe, kwiinda mukwaamba kuti: “Ooyu Mwanaangu ngweyandisya, ooyo ngwekkomanina.” Pele aciindi eeci Jehova wakayungizya majwi aakuti: “Amumuswiilile.”
8 Cilengaano cakatondezya bulemu alimwi anguzu Jesu nzyaakali kuyooba anzizyo kumbele kali Mwami wa Bwami bwa Leza. Cakutadooneka, Kristo wakakulwaizyigwa alimwi akuyumizyigwa kumapenzi alimwi alufwu lucisa kapati ilwakali kuyoomucitikila. Cilengaano alimwi cakayumya lusyomo lwabasikwiiya. Eeci cakabagwasya kulibambila masunko ngobakali kuyooyaanya alimwi amulimo mupati ngobakeelede kuyoocita kumbele. Myaka iitandila ku 30 yakatobela, mwaapostolo Petro wakacaamba cilengaano cakusanduka, kutondezya kuti wakacili kuciyeeya.—2Pet. 1:16-18.
9 “Amumuswiilile.” Jehova wakacisalazya kuti uyanda kuti swebo katuswiilila kumajwi aa Mwanaakwe alimwi akumumvwida. Ncinzi Jesu ncaakaamba naakali anyika? Wakaamba zintu zinji izyakali kuyandika kapati kuziswiilila! Mucikozyanyo, caluyando wakayiisya basikumutobela kujatikizya mbwaakeelede kukambaukwa makani mabotu, alimwi cakwiinduluka-induluka wakabayeezya kuti bazumanane kulangila. (Mt. 24:42; 28:19, 20) Kuyungizya waawo, wakabakulwaizya kubeleka canguzu, alimwi wakabayumya-yumya kuti batatyompwi. (Lk. 13:24) Jesu wakakankaizya mbocakali kuyandika kuli basikumutobela kuti kabayandana alimwi akutobela milawo yakwe. (Joh. 15:10, 12, 13) Eelo kaka lulayo Jesu ndwaakapa basikwiiya bakwe lwakali kugwasya kapati! Lulayo oolu lulayandika kapati mazuba aano mbubonya mbolwakali kuyandika ciindi Jesu naakalupa.
10 Jesu wakaamba kuti: “Muntu woonse uuli kulubazu lwakasimpe ulaliswiilila jwi lyangu.” (Joh. 18:37) Tulatondezya kuti tulaliswiilila jwi lyakwe ciindi ‘notuzumanana kweengelelana akulekelelana camoyo woonse.’ (Kol. 3:13; Lk. 17:3, 4) Alimwi tulatondezya kuti tulaliswiilila jwi lyakwe kwiinda mukukambauka makani mabotu cabusungu “muziindi zili kabotu amuziindi zyamapenzi.”—2Tim. 4:2.
11 Jesu wakaamba kuti: “Imbelele zyangu zilaliswiilila ijwi lyangu.” (Joh. 10:27) Basikutobela ba Kristo balatondezya kuti balamuswiilila Jesu kwiinda mukutaswiilila buyo kujwi lyakwe, pele alimwi akucita ncolyaamba. Tabanyonganizyigwi ‘azyakulibilika zyamubuumi.’ (Lk. 21:34) Muciindi caboobo, kumvwida malailile a Jesu bakubikka mubusena bwakusaanguna mubuumi, nociba ciindi nobali mubukkale bukatazya. Bunji bwabakwesu bali mukuliyumya mumasunko aakatazya, kubikkilizya akulwanwa abasikukazya, bucete, alimwi antenda zilicitikila. Nokuba boobo, bazumanana kusyomeka kuli Jehova, tacikwe makani ambobakonzya kupenga. Kulimbabo, Jesu upa cisyomezyo eeci: “Kufwumbwa ooyo uutambula milawo yangu akwiitobela nguundiyanda. Alimwi kufwumbwa ooyo uundiyanda uyooyandwa a Taata.”—Joh. 14:21.
FEBRUARY 17-23
MBONO IZILI MU JWI LYA LEZA TUSIMPI 1
Nobakubusi—Nguni Ngomuyooswiilila?
Mutalekeli Cintu Cili Coonse Kumulesya Kujana Bulumbu
16 Mbuti kuti muli bakubusi alimwi mulimvwa kuti bazyali banu Banakristo tabamumvwisyi alimwi tabamupi lwaanguluko lwakucita zintu? Kutyompwa mane kulakonzya kumupa kudooneka akubona mbuli kuti kubelekela Jehova tacigwasyi. Pele ikuti mwalekela kutyompwa kuti kumupe kucileka kubelekela Jehova, kalitanalampa mulakonzya kujana kuti kunyina muntu uumubikkila maano kapati kwiinda bazyali banu ibayoowa Leza alimwi ambungano yanu.
17 Ikuti naa bazyali banu nobatakali kumululamika, sena nomwatali kulibuzya kuti naa balamubikkila maano ncobeni? (Heb. 12:8) Pele ambweni ninzila njobabelesya bazyali banu kumulaya iimupa kunyema. Muciindi cakubikkila maano mbuli mbobamulaya, amusole kubona ambweni kuli kaambo ncobacitila boobo. Aboobo amukkazike moyo alimwi mutanoonyemi kapati ikuti bamwaambila majwi aatali kabotu. Ijwi lya Leza lyaamba kuti: “Muntu uujisi luzyibo ulalijata kwaambaula, alimwi muntu uulaamaano ulazumanana kukkazika moyo.” (Tus. 17:27) Amulibikkile mbaakani yakuba muntu uusimide uukonzya kutambula lulayo cakukkazika moyo, akugwasyigwa alulayo oolo kakunyina kubikkila kapati maano kujatikizya mbolwakapegwa. (Tus. 1:8) Ncilongezyo ikuba abazyali basyoma ibamuyanda ncobeni Jehova. Cakutadooneka inga bayanda kumugwasya kutegwa mukajane bulumbu bwabuumi.
Atubukwabilile Bunakristo Bwesu
11 Amusoleke kukkomanisya Leza ikutali muntu. Ncilengwa buya ncotwakazyalwa ancico cakuyanda kuzyibwa kwiinda mukuzulilwa kunkamu imwi yabantu. Aumwi ulayanda kuba abalongwe alimwi eeci cilatukkomanisya akutupa kulimvwa kuliiba. Mubukubusi alimwi anaakomena muntu, kuyungwa abamusela wakwe kulakonzya kukatazya kapati, alimwi kupa kuba akulombozya kapati ikwiiya antela kuyanda kukkomanisya bamwi. Pele balongwe alimwi abamisela yesu talili lyoonse nobabikkila maano kubukkale bwesu. Zimwi ziindi inga bayanda buyo muntu wakubasangana mumilimo iitaluzi. (Tusimpi 1:11-19) Ciindi Munakristo naayungwa abamuselanyina, kanji-kanji usoleka kulisisa mbwabede. (Intembauzyo 26:4) Imwaapostolo Paulo wakacenjezya kuti: “Mutakozyanizigwi aziyanza zyaciindi ecino.” (Ba-Roma 12:2) Jehova ulatupa nguzu nzyotuyandika kutegwa tuliyumye akuti tutayungwi abamwi.—Ba-Hebrayo 13:6.
12 Eelyo kuyungwa nokulibonya kuti kuyanda kunyonyoona bube bwesu bwa Bunakristo, tweelede kuyeeya kuti ikusyomeka kwesu kuli Leza kulayandika kapati kwiinda kuyeeya kwabantu antela zilengwa zyabanabunji. Majwi aali kubbuku lya Kulonga 23:2 ajisi njiisyo iibeleka yakuti: “Utatobeli buleya kukucita zibi.” Eelyo bana Israyelinyina banji nobakazidooneka nguzu zya Jehova zyakuzuzikizya zisyomezyo zyakwe, cabusicamba Kalebe wakakaka kutobela bantu banabunji. Wakalisinizyide kuti zisyomezyo zya Leza zilasyomeka alimwi wakalongezyegwa kapati akaambo kanzila njaakabweza. (Myeelwe 13:30; Joshua 14:6-11) Sena andinywe mulikanzide kutayungwa abanabunji ikutegwa mucikwabilile cilongwe canu a Leza?
Mbono Zyakumuuya
Busongo Bwini-Bwini Buloompolola
7 ‘Batakwe luzyibo’ mbaabo batasimide mumizeezo, batakatazyi kuyunga naa kucenga. (Tus. 14:15) Kanji-kanji, tulabajana bantu bali boobu mubukambausi. Mucikozyanyo, amuyeeye buyo kujatikizya bantu banji ibacengwa abasololi bazikombelo naa basimapolitikisi. Bamwi balagambwa ciindi nobazyiba kuti bakacengwa abasololi bali boobu. Pele aabo baambidwe ku Tusimpi 1:22 basala kuzumanana kabatakwe luzyibo, akaambo kakuti mbobayanda kuba oobo. (Jer. 5:31) Bayanda kucita ncobayanda alimwi tabayandi kwiiya ncolyaamba Bbaibbele naa kutobela milawo iili mumo. Banji balimvwa mbuli mukaintu umwi waku Canada iwakalyaabide kapati kubukombi, walo iwakaambila Bakamboni bakamuswaide kuti, “Kuti naa mupaizi wakatucenga, nkokuti nguulaamulandu kutali ndiswe pe.” Swebo tatuyandi kwiiya cikozyanyo cabaabo ibaliyandila buya kuzumanana kabatakwe luzyibo.—Tus. 1:32; 27:12.
FEBRUARY 24–MARCH 2
MBONO IZILI MU JWI LYA LEZA TUSIMPI 2
Nkaambo Nzi Ncomweelede Kuba Basungu Kucita Ciiyo Canu Nobeni?
‘Amuzumanane Kweenda Mukasimpe’
16 Tobanji tatukukkomanini kubala akwiiya. Pele Jehova utwaambila kuti tweelede ‘kuzumanana kuyandaula’ alimwi ‘akuzumanana kulangaula’ kutegwa tukamvwisye kabotu kasimpe. (Amubale Tusimpi 2:4-6.) Ciindi notubeleka canguzu, tulagwasyigwa kapati. Kujatikizya ciiyo cakwe ca Bbaibbele, mukwesu Corey wakaamba kuti ubikkila maano kukapango komwe aciindi comwe. Wakati: “Ndilabala bupanduluzi ibuli mumajwi aayungizyidwe, Magwalo aamba makani aakozyenye aatondezyedwe mukapango aako alimwi ndilavwuntauzya. . . . tandimanizyi kumvwuntauzya makani oonse aali mukapango aciindi comwe nondibelesya nzila eeyi, pele ndilagwasyigwa kapati!” Kufwumbwa naa tubelesya nzila eeyi naa imbi, tulatondezya kulumba kukasimpe kwiinda mukubelesya ciindi alimwi anguzu kukaiya.—Int. 1:1-3.
Busongo Bwini-Bwini Buloompolola
3 Busongo nkucizyiba kubelesya luzyibo kutegwa tusale camaano. Nokuba boobo, busongo bwini-bwini bulainda aawo. Bbaibbele lyaamba kuti: “Kuyoowa Jehova ngamatalikilo aabusongo, alimwi kumuzyiba Ooyo Uusalalisya ngamaano.” (Tus. 9:10) Aboobo ciindi notuyanda kusala cakucita mumakani aayandika kapati, tweelede kusaanguna kulanga-langa Jehova mbwayeeya kujatikizya makani aayo. Tulakonzya kucita oobo kwiinda mukulingula Bbaibbele amabbuku aamba zyamu Bbaibbele. Notucita boobo, tutondezya busongo bwini-bwini.—Tus. 2:5-7.
4 Jehova ngonguwe alikke uukonzya kutupa busongo bwini-bwini. (Rom. 16:27) Nkaambo nzi ncali Kasensa kabusongo? Cakusaanguna, Jehova ngo Mulengi alimwi ulaazyi makani oonse aajatikizya zintu nzyaakalenga. (Int. 104:24) Cabili, zyoonse nzyacita Jehova zitondezya kuti musongo. (Rom. 11:33) Catatu, lulayo lwabusongo ndwapa Jehova, lyoonse lulabagwasya aabo ibalutobela. (Tus. 2:10-12) Kuti katuyanda kuba abusongo bwini-bwini, tweelede kuzumina ntalisyo eezyi zyotatwe zyakasimpe alimwi akukazumizya kuti katusololele notusala zyakucita mubuumi.
Nobakubusi, Amuyumye Lusyomo Lwanu
2 Mbomuli mubelesi wa Jehova uucili mwana naa uuciiya kujatikizya nguwe, sena andinywe mulimvwa kuti mweelede kusyoma zintu nzyobasyoma bantu banji, zintu mbuli njiisyo yakusanduka, ikutali kusyoma kuti kuli Mulengi? Ikuti kacili boobo, kuli ntaamu nzyomukonzya kubweza kutegwa muyumye lusyomo lwanu. Ntaamu yakusaanguna njomukonzya kubweza njakubelesya maano Leza ngaakamupa, alo aakonzya ‘kumulinda.’ Ayoomukwabilila kunjiisyo zyabasyaabusongo zyalo izikonzya kunyonganya lusyomo lwanu.—Amubale Tusimpi 2:10-12.
3 Lusyomo lwini-lwini luyeeme aluzyibo lwini-lwini kujatikizya Leza. (1Tim. 2:4) Aboobo, ciindi nomwiiya Jwi lya Leza alimwi amabbuku eesu aa Bunakristo, mutabali buyo cakwiinzya mulawo. Amubelesye maano aanu kutegwa ‘mumvwisye’ ncomubala. (Mt. 13:23) Lino atubone kucita boobo mbokukonzya kumugwasya kuyumya lusyomo lwanu mu Mulengi alimwi amu Bbaibbele—makani alo aajisi ‘bumboni busalede.’—Heb. 11:1.
Mbono Zyakumuuya
‘Amuzumanane Kweenda Mukasimpe’
16 Tobanji tatukukkomanini kubala akwiiya. Pele Jehova utwaambila kuti tweelede ‘kuzumanana kuyandaula’ alimwi ‘akuzumanana kulangaula’ kutegwa tukamvwisye kabotu kasimpe. (Amubale Tusimpi 2:4-6.) Ciindi notubeleka canguzu, tulagwasyigwa kapati. Kujatikizya ciiyo cakwe ca Bbaibbele, mukwesu Corey wakaamba kuti ubikkila maano kukapango komwe aciindi comwe. Wakati: “Ndilabala bupanduluzi ibuli mumajwi aayungizyidwe, Magwalo aamba makani aakozyenye aatondezyedwe mukapango aako alimwi ndilavwuntauzya. . . . tandimanizyi kumvwuntauzya makani oonse aali mukapango aciindi comwe nondibelesya nzila eeyi, pele ndilagwasyigwa kapati!” Kufwumbwa naa tubelesya nzila eeyi naa imbi, tulatondezya kulumba kukasimpe kwiinda mukubelesya ciindi alimwi anguzu kukaiya.—Int. 1:1-3.
AMUSUNGWAALE MUMULIMO WAMUMUUNDA
lmd makani aayungizyidwe A kaambo 8
Makani Aamu Bbaibbele Ngotukkomanina Kuyiisya
8. Mulumi amukaintu beelede kusyomeka kuli umwi amweenzinyina.—Malk. 2:16; Mt. 19:4-6, 9; Heb. 13:4.