Mbomukonzya Kuyoopona Munyika Mpya

Zibalo zyainda, zyatondezya kuti ino-ino Leza uyoobanyonyoona bantu babyaabi alimwi akugwisya mapenzi oonse. Tuli masimpe kuti eeci ciyoocitika. Nkaambo nzi? Nkaambo kakuti Jwi lya Leza Bbaibbele, mbolisyomezya:

“Inyika ilamana.”—1 JOHANE 2:17.

Tulisinizyide kuti kuli bayoofwutuka nkaambo alimwi kapango nkoonya aaka kasyomezya kuti:

“Ooyo uucita kuyanda kwa Leza unooliko lyoonse mane kukabe kutamani.”

Aboobo, ikuti katuyanda kuyoofwutuka tweelede kucita kuyanda kwa Leza. Pele kutegwa tuzyibe kuyanda kwa Leza, cakusaanguna tweelede kumuzyiba.

AMUKAFWUTUKE MAMANINO KWIINDA ‘MUKUZYIBA LEZA’

Zifwanikiso: 1. Nesi wakkala afulo yacibbbadela kakatede kapati alimwi akutyompwa. 2. Ulalyookezya mubusena bwakulida, mpoonya wabona mubelesinyina uubala magazini calukkomano. 3. Mubelesinyina wamubalila kapango kamu Bbaibbele alimwi akumupa kakkaadi ka jw.org.

Jesu wakaamba kuti: “Eeci caamba buumi butamani, ikuti bakuzyiba yebo O Leza mwini-mwini ooli olikke.” (Johane 17:3) Kutegwa tukafwutuke alimwi akuyoopona kukabe kutamani, tweelede ‘kumuzyiba Leza.’ Eeci tacaambi kuzyiba buyo kuti Leza nkwali naa kuzyiba twaambo tumwi twamasimpe kujatikizya nguwe. Tweelede kuba balongwe bakwe. Ikuti katuyanda kuti cilongwe cesu ciyume, tweelede kujana ciindi cakuba abalongwe besu. Oobo mbocibede akuba aacilongwe ciyumu a Leza. Amubone twaambo tumwi twamasimpe ituyandika kapati ntotwiiya mu Bbaibbele twalo itutugwasya kuba acilongwe ciyumu a Leza.

Twaambo Twamasimpe Ntotwiiya Kuzwa mu Bbaibbele

Twiiya kuti Leza wakali kuyanda kuti katukkala mu Paradaiso.

Wakalenga bantu bakusaanguna ba Adamu a Eva, akubabikka mubusena bweebeka kapati bwiitwa kuti muunda wa Edeni. Bakalilondokede, alimwi Leza wakabapa zintu zyoonse nzyobakali kuyandika kutegwa kabakkomene. Bakali kukonzya kupona mane kukabe kutamani. Kufwumbwa buyo kuti nobakazumanana kuba balongwe ba Leza, nobatakafwa. Pele bakasala kutatobela mulawo wa Leza uutakatazyi ngwaakabapede.

Tulaiya kaambo ncotupengela.

Kwiinda mukutamvwida Leza, muntu wakusaanguna Adamu, wakasweekelwa coolwe cakupona mane kukabe kutamani walo alimwi abantu boonse. Bbaibbele lyaamba kuti: ‘Cibi cakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse.’ (Baroma 5:12) Mbubonya muntu mbwakonzya kukona kalengwa kamwi kuzwa kubazyali bakwe, boonse bana ba Adamu bakakona kutalondoka kuzwa kulinguwe. Akaambo kaceeci, tulacembaala alimwi akufwa.

Tulaiya ncaakacita kale Leza kutegwa atugwasye.

Bbaibbele lyaamba kuti: “Leza wakaiyanda kapati nyika cakuti wakapa Mwanaakwe simuzyalwaalikke, kutegwa muntu uuli woonse uumusyoma atanyonyoonwi, pele abe abuumi butamani.” (Johane 3:16) Leza wakatuma Jesu anyika kuti azikwaabe buumi bwakwe akaambo kandiswe. Kujatikizya luyando oolu ndwaakatondezya, mwaalumi umwi waku India uutegwa Prabhakar uujisi myaka iili 86 wakaamba kuti: “Eeci citondezya luyando lupati ndwajisi Jehovaa kulindime. Luyando lwakwe lwandipa bulangizi bwakuyoopona mane kukabe kutamani.”

Tulaiya mbotukonzya kutondezya kulumba akaambo kazintu Leza nzyaatucitila.

Bbaibbele lyaamba kuti tulakonzya kutondezya kulumba akaambo kazintu Leza nzyaatucitila kwiinda ‘mukubamba milawo yakwe.’ (1 Johane 2:3) Caluyando, Jehova Leza ulatwaambila ncotweelede kucita kutegwa tube alukkomano noliba lino. (Isaya 48:17, 18) Leza tayandi kuti katupenga. Utusyomezya kuti, ikuti naa twaitobela milawo yakwe, tatukaponi buyo buumi bukkomanisya lino, pele alimwi tuyooba acoolwe cakupona mane kukabe kutamani.

AMUBALE JWI LYA LEZA BBAIBBELE ABUZUBA

Nesi ulanga mujulu naamana kubala Bbaibbele kali anze ciindi cakulyookezya. — Mulakonzya kuyoofwutuka mamanino aanyika kwiinda mukupaila kuli Leza kulomba lugwasyo alimwi akucita kuyanda kwakwe

Lyoonse tulalya kutegwa tuzumanane kupona. Pele Jesu wakaamba kuti: “Muntu teelede kuponena acinkwa cilikke pe, pele weelede kuponena amajwi oonse aazwa kumulomo wa Jehova.”—Matayo 4:4.

Mazuba aano, tulaajana majwi aa Jehova mu Bbaibbele. Ciindi nomwiiya bbuku eeli lisetekene, muyoozyiba zintu Leza nzyaakacita kaindi, nzyacita lino alimwi anzyayoocita kumbele.

AMUPAILE KULI LEZA KULOMBA LUGWASYO

Ncinzi ncomukonzya kucita kuti kamuyanda kutobela busolozi bwa Leza pele kacimuyumina kuleka kucita zintu nzyaamba kuti zibi? Mubukkale buli boobu, inga camugwasya kapati kumuzyiba kabotu Leza.

Amubone mukaintu umwi ngotutiite kuti Sakura, walo iwakali kupona buumi bwakutalilemeka. Ciindi naakatalika kwiiya Bbaibbele, wakaiya kujatikizya mulawo wa Leza wakuti “amubutije bwaamu!” (1 Bakorinto 6:18) Ba Sakura bakapaila kuli Leza kulomba nguzu, aboobo bakacikonzya kuleka cilengwa eeci cibyaabi. Pele bakacili kuyandika kulwana masunko amwi. Bakaamba kuti: “Ciindi nondakali kutalika kuyeeya kucita bwaamu, ndakali kupaila kuli Jehova kuzwa ansi aamoyo nkaambo ndakalizyi kuti tandikonzyi kulizunda sunko eeli munguzu zyangu. Kubona nguzu nzyoujisi mupailo kwandigwasya kuba acilongwe a Jehova.” Mbubonya mbuli ba Sakura, mamiliyoni aabantu bamuzyiba Leza. Ulabapa nguzu nzyobayandika kutegwa bacince buumi bwabo alimwi akupona munzila iimukkomanisya.—Bafilipi. 4:13.

Ikuti mwamuzyiba kabotu Leza, nkokuti ‘muyoozyibwa anguwe’ kuti muli balongwe bakwe bayandika. (Bagalatiya 4:9; Intembauzyo 25:14) Mpoonya muyoofwutuka, akunjila munyika mpya ya Leza. Pele ino nyika eeyi mpya inooli buti? Cibalo citobela cilapandulula.

a Jehova ndezina lya Leza kweelana ambolyaamba Bbaibbele.