Penzi lya Nyika Yoonse Lyamalwazi Aamumizeezo
“Kanji-kanji inga ndilalibilika, nokuba kuti kunyina akaambo kaya koomoonga.”
“Ciindi nondikkomene kapati, inga nditalika kulibilika. Cili boobu akaambo kakuti ndilizyi kuti kalitanalampa ndilatalika kulimvwa kuusa kapati.”
“Ndilasoleka kubikkila maano kuzintu zicitika buzuba abuzuba. Nokuba boobo, zimwi ziindi nditalika kulibilika kujatikizya zintu zinji aciindi comwe.”
Majwi aaya akaambwa abantu ibaciswa bulwazi bujatikizya mizeezo. Sena andinywe naa muntu uumwi ngomuzyi, mujisi penzi eeli?
Amuzyibe kuti tamuli nyolikke. Bantu banji mazuba aano balijatikizyidwe apenzi eeli, ambweni lwabo kubagama naa ibayandwa babo.
Cakutadooneka, tupona ‘muziindi zikatazya ncobeni’ zyalo zipa kuti kakuli kupenga kutaambiki. (2 Timoteyo 3:1) Kwaambwa kuti munyika yoonse, muntu omwe akati kabantu bali 8 uciswa bulwazi bwamumizeezo. Mu 2020, ibulwazi bwa COVID-19 bwakapa kuti mweelwe wabantu baciswa bulwazi bwakulibilika alimwi akutyompwa uyungizyike abantu babalilwa ku 78 miliyoni.
Nokuba kuti cilayandika kuzyiba mweelwe wabantu baciswa bulwazi bwakulibilika alimwi akutyompwa, iciyandika kapati nkuzyiba mbomulimvwa nywebo abayandwa banu, alimwi ambomupona.
Ino malwazi aamumizeezo apa kulimvwa buti?
Ikuti kamujisi bulwazi bwamumizeezo, tamulimvwi kabotu alimwi tamuciti zintu munzila yeelede. Milimo njomucita tamwiibeleki kabotu, mulalibilika kapati mubuumi alimwi ikuti mwakatala buyo asyoonto, penzi lilakomena.
Kuciswa mumizeezo . . .
TAKUBOOLI akaambo kakulezya kwamuntu kumwi.
NKUCISWA kwalo kunyonganya kapati mbwayeeya muntu, mbwalimvwa alimwi ambwacita zintu.
Kanji-kanji kupa muntu kutayanzana kabotu abamwi alimwi akwaalilwa kucita kabotu zintu mubuumi.
Kulakonzya kubajatikizya bantu boonse tacikwe makani aciimo, zilengwa, mubala, musyobo, cikombelo, lwiiyo, naa mali ngobajisi.
Kujana lugwasyo kubulwazi bwamumizeezo
Ikuti nywebo naa muyandwa wanu cakutayeeyela mwabona kucinca kumwi mbuli, koona cakuciindizya naa kutoona bweelede, kulya cakuciindizya naa kutalya munzila yeelede, kulibilika kapati naa kulimvwa kuusa kapati, nkokuti inga mwayandika kubonana amusilisi kutegwa amugwasye kuzyiba cileta kucinca ooku alimwi ambomukonzya kulimana penzi.
Muntu musongo kwiinda boonse bakaponede, Jesu Kristo, wakaamba kuti: “Bantu bataciswi tabayandiki musilisi, pele aabo baciswa mbabayandika musilisi.” (Matayo 9:12) Ibantu baciswa kuti baunka kucibbadela balakonzya kupegwa busilisi bwalo bukonzya kucesya penzi lyabo akubagwasya kupona buumi bukkomanisya. Aboobo cilayandika kuti bafwambaana kutalika kusilikwa ikuti zitondezyo zyabulwazi kaziliko alimwi zyatola ciindi.a
Nokuba kuti Bbaibbele talili bbuku lyaamba zyabusilisi, pele zintu nzyolyaamba zilakonzya kutugwasya kupona buumi buli kabotu. Tumukulwaizya kuti mulange-lange zibalo zitobela zyalo izibandika Bbaibbele mbolikonzya kutugwasya kulwana malwazi aajatikizya mizeezo.
a Ngazi Yamulindizi eeyi tayaambi busilisi buyandika kubelesyegwa. Muntu uuli woonse weelede kubulanga-langa busilisi mbwaapegwa katanasala cakucita.