2 | “Luumbulizyo Lwamu Magwalo”

BBAIBBELE LYAAMBA KUTI: “Zintu zyoonse izyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.”—BAROMA 15:4.

Bupanduluzi

Bbaibbele lilijisi mizeezo yuumbulizya yalo iikonzya kutupa nguzu alimwi akutupa kuliyumya ciindi notwatalika kuyeeya munzila iitaluzi. Kuyungizya waawo, mulumbe wamu Bbaibbele ulatupa bulangizi bwakuti ino-ino tuyoocileka kupenga mumizeezo.

Mbocikonzya Kutugwasya Eeci

Toonse zimwi ziindi tulaakulimvwa bubi; pele aabo bajisi penzi lyakuciswa mumizeezo naa ibalibilika balakonzya kumvwa kucisa ciindi coonse. Mbuti Bbaibbele mbolikonzya kugwasya?

Bbaibbele lilatwaambila zintu zili kabotu nzyotweelede kuyeeya mubusena bwakuyeeya zintu zitali kabotu. (Bafilipi 4:8) Lilakonzya kupa kuti katuyeeya zintu zyuumbulizya ncobeni zyalo zikonzya kutugwasya kuyeendelezya kabotu mizeezo yesu.—Intembauzyo 94:18, 19.
Bbaibbele lilakonzya kutugwasya kucileka kuyeeya kuti tunyina mpindu.—Luka 12:6, 7.
Zibalo zinji zyamu Bbaibbele zitusyomezya kuti tatuli tolikke alimwi akuti Leza, Mulengi wesu, ulamvwisya cakumaninina mbotulimvwa.—Intembauzyo 34:18; 1 Johane 3:19, 20.
Bbaibbele lisyomezya kuti Leza uyakuzigwisya zintu zitupa kuusa. (Isaya 65:17; Ciyubunuzyo 21:4) Ciindi notupenga mumizeezo, tujana kuti cisyomezyo eeci citupa nguzu zyakuliyumya.

Bbaibbele Mbolibagwasya Ba Jessica

Bulwazi Bwakutyompwa Mbobundijatikizya

“Nindakajisi myaka iili 25, ndakaciswa bulwazi bwakunyongana mumizeezo alimwi ndakaciswa bulwazi bwakutyompwa kapati. Ndakapenga akaambo kakuyeeya zintu zibi izyakali kundicitikila musyule. Bamadokota bakandigwasya kuzyiba kuti bulwazi bwangu bwakaboola akaambo kazintu zitali kabotu nzyondakali kuyeeya izyakali kundicitikila mubuumi. Kunze aamisamu njondakali kunywa, ndakali kuyandika lugwasyo lwakuzyiba ncondakeelede kucita alimwi akululamika kuyeeya kutali kabotu.”

Bbaibbele Mbolindigwasya

“Muziindi nondakali kutyompwa kapati, ndakali kuziluka mumizeezo, kulibilika cakuzwa munzila alimwi akuba acilabila. Kanji-kanji masiku ndakali kutyompwa kapati akaambo kamizeezo njondatakali kukonzya kweendelezya. Kweelana alugwalo lwa Intembauzyo 94:19 mbolwaamba, Leza ulakonzya kutuumbulizya akututontozya ciindi notujisi mizeezo iilibilisya. Aboobo ndakabikka Bbaibbele alimwi akabbuku mondakali kulemba magwalo aakulwaizya munsi-munsi abulo bwangu. Ciindi nondaba acilabila, ndakali kubala tupango twamu Bbaibbele, kutegwa mizeezo ya Leza induumbulizye.

“Bbaibbele litukulwaizya kwiimwaya mizeezo iiteendelani azintu nzyotuzyi kujatikizya Leza. Kaindi, ndakali kulimvwa kubula mpindu alimwi akutayandwa. Pele ndakaiya kuti kuyeeya kuli boobu takweendelani a Bbaibbele, lyalo litondezya Leza kuti ngu Taata siluyando alimwi silweetelelo uutubikkila maano umwi aumwi wesu kumugama. Asyoonto-syoonto ndakatalika kwiiyendelezya mizeezo yangu muciindi cakuti yalo kaindeendelezya. Kuyungizya waawo, ndakatalika kulibona mbuli mbwandibona Leza. Alimwi kucita boobu kwakandigwasya kuleka kulibona munzila iitaluzi.

“Ndilangila ciindi nondiyooleka kuyeeya zintu zibyaabi izyakandicitikila musyule. Ndilizyi kuti kumbele kunyina muntu uuyoociswa bulwazi bujatikizya mizeezo. Eeci cindipa kuliyumya lino alimwi akulangila kumbele, kuciindi nonditakaciswi bulwazi bwakutyompwa alimwi.”